HPO le CDF Hualngoram nih Meeting an tuah i a ttha taktak mi biakhiahnak an tuahmi an langhter colh
A Voi Thumnak HPO General Conference Tlamtling Tein An Tuah Khawh | 27 March 2024 Nizan March 26 ah a voi thumnak Hualngoram Peoples Organization General Conference cu Chinram, Hualngoram chung, Administrative Hall ah tlamtling tein tuah a si i, ramchung ramleng in palai 120 hrawng an i tel kho, tiah theih a si. HPO General Conference ah cun ram le miphun ca ah nunnak pe mi pasalṭha hna upat peknak, Pathian bia i
hrawmṭinak, HPO rianṭuan ning zohṭhannak, Department cio an rianṭuan ning zohṭhannak, ralkap dirhmun le kadohnak kong report peknak ngeih a si i, hruaitu upa hna nih biacahnak le Hualngoram chung rianṭuan ningcang cuanhchungnak tiin caan hman a si. General Conference ah cun HPO Constitution & By-laws Amendment ngeih a si i palai hna nih
lungrual tein phunghram an ser. Cu pin ah phung ṭeng-nge (a) The Hualngoram Administrative Council Act-2024, (b) Education Rule, (c) Hualngoram Police Rule, (d) Army Rule hna cu General Conference nih a fehter. Peng pathum Falam, Tedim le Tonzang ah aa ṭhenṭhek mi Hualngoram cu hmunram pakhat ah umter ṭhan ding hi hmunram ngeitu diknak le covo a si, tiah Hualngoram Peoples Organization nih an langhter.
US Chin Nubu Hna nih CNA ca ah Motor 10 an Hlut. March 27 || US ram ah a um mi Chin nubu hna nih CNA rianṭuannak ca ah motor 10 an hlut, tiah thawng kan theih. CBCUSA Chinland Dirkamhtu Bu nih CNA rianṭuannak ca ah Truck Project an tuah i, atu bantuk hin motor 10 an cawkpiak hna hi a si. CNA Truck Project ah
DFW kan nule, CEBC Nubu, CBCUSA Nubu Department, ICWF kan nule le a dangdang bochan mi kan nule an i tel. CNA ca ah an cawkpiak mi hna motor pawl cu CNA kut cung ah tlamtling te in an phakter cang i, CNA nih rianṭuannak zong ah an hman cuahmah cang hna, tiah theih a si.
Hnahthial Ralzaam Tleirawl Pakhat Ti Ah A Paam || 27 March 2024 Chinram, Mindat khuapi in Mizoram ramkulh, Hnahthial khuapi ah ralzaam in aa dor mi Matupi khua mi Salai Thang Lian(kum 13) cu Hnahthial khua pawng, Tuichang tiva ah a paam. “Nihin March 27, chunhnu 1:00 hrawng ah Salai Thang Lian le a hawipa cu ti i liau ding in Hnahthial khuapi le Tarpho khua kar Tuichang tiva ah an kal i, ti an i liau hnu tlawmpal ah
Salai Thang Lian cu ti ah a tla i chanh manh lo in a nunnak a liam,” tiah thih-lohnak a tong mi chungkhar he naihniam in a um mi nih The Chin Post ah an chim. Salai Thang Lian ruak cu Hnahthial palik nih siizung ah an kalpi i siibawite nih an zohfel hnu ah an umnak ralzaam inn ah an suan i, thaizing March 28, zing suimilam 11:00 hrawng ah vui a si te lai.