Lung a faak hringhran: Kan Laitlang Mindat ah SAC Ralhang nih Bomb a thlak le minung hi zat an thi

SAC nih vanlawng in Vomthu sii-inn bomb a thlak ruangah minung 4 an thi i 15 hma an pu April 26 || Mindat peng, Vomthu khuate ah a um mi sii-inn cu April 25 zaan sml. 8:00 ah SAC nih vanlawng in bomb a thlak caah minung 4 an thi i 15 hma an pu tiah theih a si. A thi mi hna cu sii-inn ah aa thlop lio mi hna le mizaw congtu an si. Vanlawng bomb thlak ruang ah sii-inn le sii-inn quarter pawl zong an kaang, an rawkral dih tiah tualchung mi sin in kan theih.  “A thi mi pali an si. Pahnih hi bomb a thlak lio ah

an thi i a dang pahnih cu an thi a chuah tuk caah a hnu deuh ah an thi tiah kan theih. Sii-inn le quarter cu remh awk tha lo in an rawk dih cikcek,” tiah tualchung mi pakhat nih a chim.  Vomthu khua cu Mindat khua in Chaklei meng 20 leng a hlatnak hmun ah a um mi a si i, Vomthu Sii-inn cu Mindat peng lawng si lo in Kanpetlet peng, Matupi peng, Magwe ramthen, Pakokko peng, Gangaw peng Yaw hmunram mizapi tiang nih an fuhpanh mi sii-inn a si tiah kan theih.  Photo: Salai Naing Hung, Law Thang

Paletwa Peng Phukip Tonnak An ngei I Chinland Council He Rianṭuanṭi Ding In Biakhiahnak An Tuah || 26 April 2024 Chinram, Paletwa peng phukip tonpumhnak cu a luancia April 5-6 tiang, ni hnih chung CDF-Paletwa uk mi hmunram chung ah tlamtling tein tuah a si i Chinland Council he rianṭuanṭi ding in biakhiahnak an tuah. Cu tonpumhnak ah cun mizapi aiawh in sawm mi palai 122, Interim Khumi Affairs Corridination Council(IKACC) le Paletwa Autonmous District Council(PADC) in palai 96 le khuallian 18, an zate 236 an i tel kho. Paletwa peng phukip tonpumhnak ah cun Paletwa Autonmous District Council(PADC) kum khat chung a rianṭuannak zohṭhan in

Paletwa peng ramkhel, kahdohnak kong le zatlang ukhruainak kong ceihmainak ngei in a hlan ah an rak ser mi Paletwa Autonmous District Council(PADC) rak ti mi cu Paletwa Council, tiah an thlen. Paletwa Council nih aa tinh mi cu, “Chinland Council he rianṭuanṭi in tinh mi aa khat mi pau dohthlennak ah thazaang a chuah mi vialte he ṭangṭi in Paletwa Council chung ah a um mi mizapi he a herh mi phunglam le hmailei rianṭuannak ding suaisam in SAC ralkap nawlngeihnak a hram bongh in Federal Democracy ramkomh ser le tlukruannak kalpi a si”, tiah Paletwa District Council nih an thanh.

Japan Um Mi Chitlay Chin Chungkhar Nih Vakok-PDF Cu Uniform Cawknak An Bawmh Hna || 26 April 2024 Japan ram ah a um mi Chitlay Chin chungkhar nih Vakok-PDF ralkap pawl Uniform cawknak ca ah tiin tangka Kyats 500,000 bawmhnak an pek hna.  SAC ralkap nawlngeihnak ṭha lo a hram bongh ding le Federal Democracy ramkomh sernak ca ah ruahchannak nganpi he dohthlennak a tuahtu Vakok-PDF ralkap Uniform cawknak ca ah Japan ram ah a um mi Chitlay Chin chungkhar nih bawmhnak pek mi cu tlamtling tein kan hmuh i kan i lawm tuk hringhran, tiah Vakok-PDF nih bawmhnak petu Chitlay Chin chungkhar sin ah lawmh bia an chimnak cu

cathanh in an langhter. A liamcia 2023 October thla zong ah Japan ram ah a um mi Chin mino Chin Brother’s FC nih CNF/A cu tangka Kyats 7,000,000 bawmhnak an rak pek hna i, 9 December 2023 ni ah CNF/A nih Chin Brother’s FC sin ah lawmhbia an chim kong Chin Brother’s FC in ṭuanvo ngei pakhat nih The Chin Post ah a chim. Chin Brother’s FC cu Japan ram ah a um mi Chin mino pawl nih an dirh mi a si i CNF/A ca ah biatak tein aa zuam mi an si kong le hi hnu pinlei zong ah CNF/A sin ah bawmhnak pek an i timh kong cu Chin Brother’s FC in ṭuanvo ngei pakhat nih cun a chim. Chin Brother’s FC chungtel pumpak in CDF-Thantlang ca ah bawmhnak an pek cang kong zong a chim chih.

||SAC nih vanlawng in Mindat peng Vomthu sii-inn bomb a thlak. April 26 April 25 zaan sml 8:00 ah Mindat peng, Circel-2 ah a um mi Vomthu Sii-inn cu SAC nih Jet Fighter in bomb a thlak caah sii-inn ah aa thlop lio mi tampi hma an pu i minung pahnih nak tam an thi tiah CDF-Mindat nih a thanh. Vomthu Sii-inn lawng siloin khuami umnak hmun dang zong ah

vanlawng in bomb an thlak tiah an langhter i thil sining a dikthlir in theih khawh a si rih lo nain minung 2 cu an thi cang  i, minung tampi an i hliam tiah theih a si. Mindat peng ah kahdohnak a um lonak hi kum cheu a si cang ko nain AA Rakhine ralkap an um ruang ah SAC Ralhrang nih zarh chiar Jet vanlawng in bomb a thlak hi a si.