Thawngpangttha taktak: CNF/CNA he rianttuantti Vakok PDF cu Japan ummi nih Phaisa hi zat bak an bawmh hna

Japan Um Mi Chitlay Chin Chungkhar Nih Vakok-PDF Cu Uniform Cawknak An Bawmh Hna || 26 April 2024 Japan ram ah a um mi Chitlay Chin chungkhar nih Vakok-PDF ralkap pawl Uniform cawknak ca ah tiin tangka Kyats 500,000 bawmhnak an pek hna.  SAC ralkap nawlngeihnak ṭha lo a hram bongh ding le Federal Democracy ramkomh sernak ca ah ruahchannak nganpi he dohthlennak a tuahtu Vakok-PDF ralkap Uniform cawknak ca ah Japan ram ah a um mi Chitlay Chin chungkhar nih bawmhnak pek mi cu tlamtling tein kan hmuh i kan i lawm tuk hringhran, tiah Vakok-PDF nih bawmhnak petu Chitlay Chin chungkhar sin ah lawmh bia an chimnak cu

cathanh in an langhter. A liamcia 2023 October thla zong ah Japan ram ah a um mi Chin mino Chin Brother’s FC nih CNF/A cu tangka Kyats 7,000,000 bawmhnak an rak pek hna i, 9 December 2023 ni ah CNF/A nih Chin Brother’s FC sin ah lawmhbia an chim kong Chin Brother’s FC in ṭuanvo ngei pakhat nih The Chin Post ah a chim. Chin Brother’s FC cu Japan ram ah a um mi Chin mino pawl nih an dirh mi a si i CNF/A ca ah biatak tein aa zuam mi an si kong le hi hnu pinlei zong ah CNF/A sin ah bawmhnak pek an i timh kong cu Chin Brother’s FC in ṭuanvo ngei pakhat nih cun a chim. Chin Brother’s FC chungtel pumpak in CDF-Thantlang ca ah bawmhnak an pek cang kong zong a chim chih.

||SAC nih vanlawng in Mindat peng Vomthu sii-inn bomb a thlak. April 26 April 25 zaan sml 8:00 ah Mindat peng, Circel-2 ah a um mi Vomthu Sii-inn cu SAC nih Jet Fighter in bomb a thlak caah sii-inn ah aa thlop lio mi tampi hma an pu i minung pahnih nak tam an thi tiah CDF-Mindat nih a thanh. Vomthu Sii-inn lawng siloin khuami umnak hmun dang zong ah

vanlawng in bomb an thlak tiah an langhter i thil sining a dikthlir in theih khawh a si rih lo nain minung 2 cu an thi cang  i, minung tampi an i hliam tiah theih a si. Mindat peng ah kahdohnak a um lonak hi kum cheu a si cang ko nain AA Rakhine ralkap an um ruang ah SAC Ralhrang nih zarh chiar Jet vanlawng in bomb a thlak hi a si.

Dohthlengtu ralkap phu komh nih Hpapun hrambunh LIB-434 battalion an laak. April 26 || Karen ramkulh, Hpapun khua hrambunh LIB-434 SAC ralkap battalion cu dohthlengtu ralkap phu komh nih an laak i hriamnam tampi zong an laak khawh tiah theih a si. April 25 zinglei ah Karen miphun hriamtlai KNLA, PDF, Force for Federal Democracy-FFD le BPLA i bawm in an laak mi a si tiah NUG, Runvennak Minister Zung nih a thanh. Hpapun operation cu 2024 March 19 in an rak thawk mi a si i, March 24 ah

Hpapun khuachung palek sakhan le outpost pawl an rak laak khawh. March 30 ah Hpapun khua hrambunh IB-19 SAC ralkap battalion cu an rak laak cang i, hriamnam kuanzen tampi zong an laak. Hpapun khua hrambunh ṭhiam ṭhiam a si mi LIB-340 battalion zong an kah cuahmah lio a si tiah NUG, Runvennak Minister Zung nih a langhter.

CDF-Kanpetlet sin ah Meithal Zun 3 he Palek Pakhat a Zaam  April 25 ll Mindat khua SAC palek sakhaan in palek pakhat cu meithal zun 3 le kuan tampi i put in CDF-Kanpetlet (Tumee Battalion) sin ah a zaam, tiah theih a si.  Tumee Battalion sin ah a zaam mi palek pa hi Salai Htet Shein Aung tiah auh mi a si i, G4 meithal zun 1, BA94 meithal zun 1, Revolver (Pistol) zun 1, meithal kuan 500 leng le kutcheh bomb 1 he April 10 ah Tumee Battalion sin ah a zaam.  Meithal zun 3 he a rak zaam mi Salai Htet Shein Aung cu Tumee Battalion nih sing 100 MMK laksawng an pek, tiah theih a si.