Zualko: Thlanglei Laitlang ah SAC Ralhrang nih Bomb a thlak Chinmi minung hi zat bak an thi ee
||SAC nih vanlawng in Mindat peng Vomthu sii-inn bomb a thlak. April 26 April 25 zaan sml 8:00 ah Mindat peng, Circel-2 ah a um mi Vomthu Sii-inn cu SAC nih Jet Fighter in bomb a thlak caah sii-inn ah aa thlop lio mi tampi hma an pu i minung pahnih nak tam an thi tiah CDF-Mindat nih a thanh. Vomthu Sii-inn lawng siloin khuami umnak hmun dang zong ah
vanlawng in bomb an thlak tiah an langhter i thil sining a dikthlir in theih khawh a si rih lo nain minung 2 cu an thi cang i, minung tampi an i hliam tiah theih a si. Mindat peng ah kahdohnak a um lonak hi kum cheu a si cang ko nain AA Rakhine ralkap an um ruang ah SAC Ralhrang nih zarh chiar Jet vanlawng in bomb a thlak hi a si.
Dohthlengtu ralkap phu komh nih Hpapun hrambunh LIB-434 battalion an laak. April 26 || Karen ramkulh, Hpapun khua hrambunh LIB-434 SAC ralkap battalion cu dohthlengtu ralkap phu komh nih an laak i hriamnam tampi zong an laak khawh tiah theih a si. April 25 zinglei ah Karen miphun hriamtlai KNLA, PDF, Force for Federal Democracy-FFD le BPLA i bawm in an laak mi a si tiah NUG, Runvennak Minister Zung nih a thanh. Hpapun operation cu 2024 March 19 in an rak thawk mi a si i, March 24 ah
Hpapun khuachung palek sakhan le outpost pawl an rak laak khawh. March 30 ah Hpapun khua hrambunh IB-19 SAC ralkap battalion cu an rak laak cang i, hriamnam kuanzen tampi zong an laak. Hpapun khua hrambunh ṭhiam ṭhiam a si mi LIB-340 battalion zong an kah cuahmah lio a si tiah NUG, Runvennak Minister Zung nih a langhter.
CDF-Kanpetlet sin ah Meithal Zun 3 he Palek Pakhat a Zaam April 25 ll Mindat khua SAC palek sakhaan in palek pakhat cu meithal zun 3 le kuan tampi i put in CDF-Kanpetlet (Tumee Battalion) sin ah a zaam, tiah theih a si. Tumee Battalion sin ah a zaam mi palek pa hi Salai Htet Shein Aung tiah auh mi a si i, G4 meithal zun 1, BA94 meithal zun 1, Revolver (Pistol) zun 1, meithal kuan 500 leng le kutcheh bomb 1 he April 10 ah Tumee Battalion sin ah a zaam. Meithal zun 3 he a rak zaam mi Salai Htet Shein Aung cu Tumee Battalion nih sing 100 MMK laksawng an pek, tiah theih a si.
Rezua ah SAC ralkap nih an rak hmanh mi bomb rap a puak i pa ngakchia pakhat a thi April 25 || Nihin April 25, zanlei sml. 6:00 hrawng ah Zotung tlang, Rezua khuapi, Lawngye sang ah SAC ralkap nih an rak hmanh ta mi bomb a puak i taang ruk a kai lio mi pa ngakchia pakhat a nunnak a liam. SAC bomb rap ruang ah a thi mi cu Bawi Lian Naing a si i, siang cachim in CDM a tuah mi Saya U Than Naing le Pi Van Sui fapa a si. U Than Naing te cu Rezua khua in an chuahkehnak Lailen khua ah raal an va zaam an rak kirnak a sau rih lo tiah theih a si. Lawngye sang cu SAC ralkap camp tang zawn ah
a um mi a si i bomb rap tampi an hmanhnak zong a si tiah kan theih. “CDF-Zotung nih kan si khawhchung in bomb rap kan thianh ko nain kan hmuh khawh lo bomb rap a taang mi cheukhat ruang ah khuami pakhat kan sungh mi cung ah kan ngaih a chia tuk hringhran,” tiah CDF-Zotung in chimphuannak nawlngeitu Salai Danny nih social media ah a tial.CDF-Zotung nih kal um an khapnak Rezua khua chung hmun cheukhat le sakhan pawngkam ah chawhvah rih lo ding, lunghrin mi thil hmuh ahcun tawnghtham lo in tuanvo ngeitu sin thawngthanh ding zong theihternak a tialchih.Credit: The Hakha Post