Thawngpangthar: CNDF-Falam nih SAC Ralhrang Camp laaknak ah Drone bomb 5000 bak ser kan i timh timi an phuan colh

CNDF Drone Phu Nih SAC Ralkap Sakhan Laaknak Ding Ca Ah Drone Bomb 5,000 Serchuah An Timh || 29 March 2024 Chin National Defense Force(CNDF) Drone ralkap nih SAC ralkap sakhan pawl laaknak ding ca ah Drone bomb 5,000 serchuah an i tim i SAC ralkap hman mi Jumper nak ṭha deuh mi Drone serchuah an i tim, tiah Khonumthung nih a ṭial. “SAC ralkap sakhan laak tik hman ding ca ah CNDF Drone Department nih

bomb tam ngai kan timhlamh cang, Project Team he bomb serhchuah ding ah kherhhlainak kan tuah hnu ah bomb tam ngai kan serchuah khawh cang,” tiah CNO/CNDF Drone Department hruaitu Salai Jonah nih a chim. CNDF nih cun nihin tiang ah Drone bomb 1,000 leng an ser cang i pehzulh in serchuah an timh, tiah Khonumthung nih an langhter. “Hlan deuh i kahdohnak hna ah cun SAC ralkap Jumper a ṭhat ngai ruang ah duhning in Drone hman khawh a si lo i,

a ralai ding mi i kahdohnak ah cun SAC ralkap Jumper nak ṭha deuh mi Drone pawl zong hman timh a si cang,” tiah Salai Jonah nih cun a chim chap. CNDF Drone phu nih an serchuah mi bomb pawl cu an hmunram chung le peng dang i kahdohnak ah 3,000 leng an hman cang i Drone phu thawng in teinak zong an hmu tawn. Drone phu hna cu CNA, CDF-Lautu le CDF-Matupi hna he zong an ṭangṭi, tiah Khonumthung nih a ṭial. A ralai ding mi kahdohnak ding ca ah Drone bomb pehzulh in serchuah a si khawh nakhnga ramchung ramleng um mizapi cu kutsamh rih ding in CNO/CNDF nih nawlnak an tuah.

A Biapi Ngai mi Yawyone SAC Ralkap Sakhaan KIA nih a Laa || SAC ralkap nih kum 40 dengmang hmun a khuarnak Yawyone Byuhakung cu KIA le dohthlengtu ralkap bu fonh nih March 27 ah tlamtling te in an laak khawh, tiah theih a si.  Yawyone SAC ralkap sakhaan hi Kachin ramkulh, Moemauk khua le Lwegel khua karlak ah a um i, 1985 ah KIA le Ba-Ka-Pa nih an doh nain an la kho lo.  Cu sakhaan cu KIA le dohthlengtu ralkap bu fonh hna nih

nizaan tihni March 27 ah doh hram an thawk ṭhan i, March 28 chun ah an laak khawh hi a si. Yawyone SAC ralkap sakhaan laak kahdohnak ah SAC ralkap lei in a thi mi le a zaam mi zong an um bang in hriam a chia mi zong an um. Sakhaan ah a um mi eidin tirawl tampi, hraimpi pawl, meithal le a dangdang ralhraim tampi KIA nih an laak.  KIA le dohthlengtu ralkap bu hna nih Yawyone SAC ralkap sakhaan an laak ni March 27 hi a kum 79nak SAC ralkap ni a si. Hi ni ah hin KIA nih Kachin ramkulh chung ah a um mi SAC ralkap sakhaan paruk a laak, tiah Myanmar Now nih a ṭial.

Lai Ralzaam Thilri Phortu Motor aa Let, a Mongtu a Nunnak Liam. March 29 Nihin March 29, zinglei sml. 2:30 hrawng ah Laitlang lei ah ralzaam thilri a phor tawn mi motor cu Saiha District, Tipang le Theiri karlak ah accident a ton caah a mongtu a nunnak a liam, tiah thawng kan theih.  Hi motor hi Laitlang lei ah

ralzaam pawl thilri a phor tawntu a si, taih Theiri MTP President nih a chim.  Tipang le Theiri karlak i Meter 40 tluk a sannak lamthlang ah a tla i, motor mongtu Pangkhua mi Malsawmthar (kum 18) a nunnak a liam, tiah theih a si.

Pakokku In A Rak Chuak Mi SAC Motor Bomb Puah Hnawh A Tong I A Cung Cuang SAC 11 An Thi. March 29,2024 Magway ramthen,Pakokku SAC division 101 in a rak chuak mi SAC motor 2 hna cu Kandaw khuate pawng an phak ah tualchung hriamtlai nih bomb an puah hnawh hna caah motor pakhat cu

ai thek i a chung cuang SAC 11 an thih leng ah 19 hliam an tuar tiah theih a si. Nizan March 28,zanlei slm 4:45 tluk ah SAC ralkap 72 a phur tu motor 2 cu Pakokku in Kandaw khuate pawng an phak ah a hlei in ser mi lung 8 phir bomb lun gkhat le Lung 6 phir bomb lungkhat in an puah hnawh hna caah SAC 11 cu a hmun ah an thi colh in a dang 19 hliam an tuar hi a si.