Thawngpangttha taktak: KIA, CNA le AA nih SAC Ralhrang kum 10 umnak Gate cu an laak khawh i, tuchun ah onnak an tuah colh
Laiza Luhnak Gate Cu Kum 10 Leng A Rauh Hnu Ah KIA Nih An On Ṭhan || 27 April 2024 Kachin Independence Army(KIA) Headquaters umnak Laiza khuapi luhnak Gate cu kum 10 leng a rauh hnu ah nizan April 26 ni ah KIA nih an on ṭhan cang. “SAC ralkap nih kum tampi chung umhmun an khuarnak Laiza luhnak Gate cu KIA nih an laak khawh ṭhan mi cu kahdohnak kong ah a biapi ngai mi teinak hmuh bantuk a si,” tiah Laiza khuapi tualchung mi pakhat nih a chim. KIA Lieutenant General Sumlut Gun Maw nih cun,
“Teinak hmuh lawmh si lo in kum 10 leng hnu ah Laiza luhnak Gate kan on khawh ṭhan mi cu tualchung mi ca ah luatnak hmuh bantuk a si i ram pumpi in luatnak kan hmuh khawh nakhnga pehzulh in kan i zuam lai,” tiah amah pumpak hman mi Facebook ah ah a ṭial. Hi kong he pehtlai in SAC lei nih thawng an thanh mi a um lo i SAC chimnak nawlngei Major General Zaw Min Tun cu RFA nih phone in an pehtlaih nain phone a tlaih duh lo kong RFA nih an langhter. KIA nih a luancia March 7 ni in
Operation an kalpi hram an thawk i thla khat leng i kahdohnak ah KIA Headquaters pawngkam SAC ralkap sakhan pahnih an laak i a hlan ah KIO Headquaters a rak si mi Narhpawt SAC ralkap sakhan an laak hnu ah atu bantukin Laiza khuapi luhnak Gate an on ṭhan khawhnak kong le SAC ralkap sakhan 60 leng an laak cang kong cu KIA Information Center in ṭuanvo ngei Colonel Nawbu nih RFA a chimh.
Chinland Council, Chinland Cozah Upa Hna Le CBCUSA Hruaitu Hna Tonnak An Ngei II 27 April, 2024 Chinland Council, Chinland Cozah upa hna le CBCUSA hruaitu hna cu April 26 ah Aizawl ah tonnak an ngei tiah theih a si. Tutan tonnak ah Chinland Council in Vice Chairman 1 le 2, Secretary le Assit-Secretary, member pakhat, Chinland Cozah in PM, Minister of Foriegn , Minister of Woman/Youth and Children, Minister of Finance, Minister of Commerce, Minister of Humanitarian le Minister of Health hna an i tel kho. Cu pin ah Chinland Parliament Speaker, Deputy Speaker, MP pali le biaceihbawi hna an i tel. CBCUSA lei in GS, President, Vice President pin ah
Rev. Cung Lian Hup, Rev. Za Thawng Cin le Pu Van Ceu Uk hna an i tel kho. Tutan tonnak ah CBCUSA nih rawl an dangh hna i Chinland Cozah nih rianthawknak caah a herh mi tangka zong pekchanhnak an ngei kho. Tonnak ah aa tel mi Chinland Council Vice Chairman Salai Bawi Kung nih “Tutan kan i ton cu meeting ngaingai a si lo nain hmailei riantuanti nak dingah bawmtu a si ko lai. Ruahnak thatha tampi kan i cheu hna i santlaihnak a ngei hrimhrim ko lai” tiah The Chin Post ah a chim. Hmanthlak: CC, CG upa hna le CBCUSA hruaitu hna