Lawmhpi cio hna usih: Lai paih champion Rung Lian Ceu cu nupi dawh taktak a tthi cang lai

12,23,2023 Lawmhpi cio hna usih Vawleicung Laipa nih paih bak bak ah cun tei khawh lomi le Naga patthawng bik Venuzo Dawhuo hmanh nih a tei khawh dih hna. Rung Lian Ceu cu a dawt mi thaisung ding ah ai thimmi cu kan Lainu bak a thim tiah kan theih. Culawng si loin atu a nupi ding hi a min ah

Sui Cer Cin ti a si i, amah hi Lainu muidawh le pumrua ttha bak a si tiah kan theih. An pahnih in an hmanthlak zoh ahhin an i rem tuk hringhran. Rung Lian Ceu hi nupi a ngeih cang lai caah hmailei ah Lai Paih aa pai kho ti lai maw timi hi a fiang ti lo. Amah pumpak interview an tuahnak zong ah hmailei ahcun Lai Paih hi kaa paih bak lai tiah ka chim kho ti lo tiah a rak chim. zeiti a si poh ah thlacamnak he a nisunglawi nupi tthit puai ding ah thlacamnak he bawm cio hna usih kan in lawmhpi tuk ee.

Zualko a poi tuk ee; Mithi Kan Ngei. Pi Zing Thai 77 (Bawi Lian Pi0 Hermon sang ummi; nih nihin 2023 December 23; zanlei 5:00 ah an kan liam taak. A ruak cu a fapa Saya Ral Dun,  Hakha khua Bochok lam ah suan a si. Kan pi hi Khrihfabu a daw i a tlaihchan taktakmi a si. Thaizing 2023 December 24; zanlei sml. 1:00 ah

thlan a tla te lai. No 1 ah a si lai. Kaltaakmi chungkhar dihlak Bawipa nih in hnem ko hna seh. Atu bantuk in kan dawtmi kan nule hna nih an kan liam taak tik ah kan ngaih a chia hringhran. BawiPA Pathian nih in hnem hna sehlaw in umpi ko hna sehlaw.

Laukkai Khuapi Chung Ah SAC Ralkap Nih Vanlawng In Bomb An Thlak. 23 December 2023  Shan ramkulh chaklei, Laukkai khuachung ah kahdohnak a chuak i, SAC ralkap nih vanlawng in bomb an thlak pinah ralkap thazaang an chap caah kahdohnak a zual, tiah Tuluk-Myanmar rammi ummi hna nih an chim.  December 19 thawk in Laukkai peng kip ah kahdohnak a zual i SAC ralkap nih sakhan an sungh lonak ding ah ralkap thazaang tampi an chap, tiah theih a si.  SAC ralkap nih

Laukkai Dah Kah Sah sakhan pi ah ralkap thazaang tampi an chap i Parachute in ralkap an thlak hna. A bik in MNDAA nih an laakmi hmunram cheukhat ah raltuknak vanlawng an hman i bomb an thlaknak kong ramri ummi hna nih an chim.  Kahdohnak a daih khawhnak ding ah Tuluk palai hna zong nih kaphnih remdaihnak tuah an timh tawn i nawlnak zong an tuah tawn, tiah Naypyitaw um SAC ralkap chung ummi hna nih an chim.

Gangaw Peng Myint Thar Dam SAC Ralkap Sakhan Cu Chin Hriamtlai Phu Nih An Laak. 23 December 2023. Magway ramṭhen, Gangaw peng um Myint Thar Dam SAC ralkap sakhan cu nizan December 22 zinglei ah Chin hriamtlai phu nih an laak, tiah theih a si.  Myin Thar Dam um SAC ralkap pawl cu Gangaw hrambunh Khah Lah Yah 50 an si i an sakhan cu ZZLMS; CDF-Mindat, CNDF, CDF-KKG le PDF hna i bawm in an kah i an laak. Sakhan in a zaammi SAC ralkap pawl zong an dawi hna, tiah theih a si.  Myint Thar Dam SAC ralkap sakhan kahdohnak ah SAC ralkap Fighter pathum nih

bomb an thlak pinah sakhan chung um ralkap nih hriamngan an kah i, Chin hriamtlai phu lei in hliamhma pumi an umnak kong CDF – KKG he naihniam in a ummi pakhat nih The Chin Post ah a chim.  Myint Thar Dam kahdohnak ah CDF Mindat in rallam hruaitu pakhat a nunnak a liam, tiah theih a si. Myint Thar Dam um SAC ralkap hi kum khat leng chung umhmun an khuar cang i Gangaw khua chung ah motor in ral an va ven tawnnak kong tualchung mi hna nih an chim.

Breaking : January 13, 2024 Ah UFC Fighter Joshua Van Aa Ṭhua Lai. 22 December 2023 Myanmar ram chuak lakah UFC fighter hmasa bik a si mi, Chin fighter Joshua Van cu 2024, January 13 ah aa ṭhuat ṭhan lai kong Joshua nih amah social media ah a taar. 2024 kum chung ah UFC puai hmasa bik UFC Vegas 84 cu January 13 ah thok a si lai i, hi tan ah hin Joshua cu aa ṭhua ve lai tinak a si. A ṭhuatpi ding hi UFC lei nih Media ah official in thanhnak an tuah rih lo nain

Brazillian ṭhuat thiam Filipe Bunes he an cuannak hmanthlak cu Joshua nih a taar.  Joshua Van hi UFC ah vawi thum aa ṭhuatnak ding a si i, aa ṭhuat hmasa pahnih ah teinak a hmu veve cang. MMA aa celh vawi 10 ah vawi 9 teinak a hmu i, vawi khat a sung. Atutan MMA aa celhpi ding Filipe Bunes, kum 34 hi MMA aa celh vawi 19 ah vawi 13 teinak a hmu i, vawi 6 a sung cang. Tlaihkhih(BJJ) a thiam ngai mi a si.