Salai Lung Thli Tum nih Chin Star hlasak zuamnak a tuahmi ah Mai Van Mal Nei nih pakhatnak a hmuh ding a fiang tuk VIDEO+

Atang ah Video kan chiah: Chin Star hlasak zuamnak ah teinak a hmu ding cu a fiang uk cang Falam nungak Mai Van Mal Nei nih teinak a hmuh lai aruang cu hlasak a thiam, atang ah lei Mirang hla a sakmi hi zoh lebang cu zei hla poh a sak khawh hi a thiam khunnak a si. Mai Van Mal Nei nih Falam peng Ngawn nungak a si.Lung Thli Tum zong nih

a duhsak lai zumh a si Salai Lungthli Tum nih a tialmi cu “Winner thimnak mark cu judge nih 12.5% an pek cang. STAR Vote 10% pek lio asi. Nov 1 zaan ah judge nih 12.5% an pek rih lai i 35% mark ah a tlawm bik 3 an tla te lai.  A donghnak zaan(Nov 08) phak hlan ah  winner thimnak mark 70% cu rel cia a si te lai caah Nov 7 hrawng khi cu ahodah ‘sui arfi’ cotu ding timi tuaktan khawh pah cia asi te lai.  Top 8 finalists hna hi an thiam nak an i thlau hna lo. Anmah le tanpitu mit ah cun

winner caah an i tlak dih. Judge pekmi mark zong ah an i thlau hna lo. Mipi tanpi nak STAR Vote belte ah cun ceilak an i thlau. Aho te dah Nov 1 zaan ah an tla te hnga? An tlak ding ka sian lomi lawngte an si, nain zeiti tha hlah, rule ning in mark tlawm bik 3 cu byebye tuah an hau te ko lai.” Tiah a tial.

Monekoe Um SAC Ralkap Sakhan 3 Le Chinshwehaw Um SAC Ralkap Sakhan Pakhat MNDAA Nih An Laak Chap. 30 Oct 2023 Shan ramkulh, chaklei Monekoe hmunram um SAC ralkap sakhan 3 nak tlawm lo cu nihin October 30 zinglei ah kan laak ṭhan, tiah MNDAA in chimphuannak nawlngeitu Li Kyia Win nih a chim.  “Nihin zinglei ah Monekoe hmunram um SAC ralkap sakhan 4 tluk kan laak chap. Nizan October 29 zong ah

\Chinshwehaw hmunram chaklei kam ah a ummi Shante sakhan zong kan laak khawh i cu sakhan in a zaammi SAC ralkap 12 zong kan tlaih hna” tiah a chim chap.  SAC ralkap cheukhat cu mi sawhsawh thuam hruk buin sakhan chung in an zaam. Cu pinah Lashio-Theinni lam um Theinni hlei zong MNDAA nih

bomb in an puahhnawh, tiah theih a si.  Cu pinah TNLA nih nizan October 29 ah Theinni um SAC ralkap sakhan pakhat an laaknak kong an thanh. Theinni peng Maili sakhan an laak lioah SAC ralkap meithal zun 15, kuan tampi le ralkap thilri tampi an laak, tiah theih a si. SAC ralkap nih nihin October 30 ah Helicopter nih Monekoe, Manyan, Pansai hrawng bomb in a thlakmi muicawl zong MNDAA nih an langhter.

SAC Ralkap Mai-li Sakhaan TNLA Nih An Lak Chap Ṭhan. 2023 October 30 — Shan ram chaklei, Hsenwi peng ah, Operation 1027 min in SAC ralkap Mai-li sakhaan pakhat cu October 29 zaanlei ah Ta’ang National Liberation Army (TNLA) nih an kah i sakhaan an lak beh tiah an thanh. October 29 zaan sml 8:00pm hrawng ah SAC ralkap sakhaan an lak hi a si i kahdohnak chung ah SAC ralkap meithal zuun 14, Pistol zuun 1, Grenade 10, 40MM bom lung 12, kuan pawl le

kahdohnak thilri pawl an lak khawh tiah theih a si. Cubantuk in October 30 zinglei sml 4:15am hrawng ah Lashio peng ah a um mi Mai-kyat ralkap sakhaan cu TNLA nih an kah i an hrawh dih tiah theih a si. Cun October 30 zinglei sml 5:30am hrawng ah Shan ram chaklei, Kutkai le Nan-phet-ka karlak ah a um mi Nan-khai SAC ralkap gate cu unau hawikom phu (MNDAA, AA, TNLA) nih an kah hna caah kahdohnak a fah lio a si tiah theih a si.

WCCCC Hruainak In A Voihnihnak Chinland Phunghrampi A Hran Zoh Ṭhannak An Ngei. 30 Oct 2023 Working Committee For Chinland Council Conference(WCCCC) hruainak in Chinland phunghrampi cu a hran an lim cang, tiah theih a si. Chinland Council Conference tuah khawh nakding ah CNF/A, Chin Hluttaw Palai hna, peng le khuate hrambunh hriamtlai CDF hna nih dirhmi Working Committee For Chinland Council Conference(WCCCC) a voihnihnak meeting cu

a himnak hmun pakhat ah October 24-28 tiang kan tuah i tlamtling tein kan lim, tiah WCCCC nih cathanh an chuah.  October 24-28 tiang an tuahmi meeting ah Chinland phunghrampi a hran a voihnihnak remh le chapnak an ngei kho.  Dohthlennak caan chung ah Chinland phunghrampi a chuah nakding, Chinland Council ser ding le upadi sernak, ukhruainak le biaceihnak tungtlang pathum a um khawh nakhnga kan i zuam i, a rauh hlan ah tuah dingmi Chinland Council Conference ca ah a herhmi dang tete zong kan tawlrel cang, tiah WCCCC nih an thanh.

CDF-Thantlang Ralkap 3 Kan Thah Hna Tiah SAC Nih An Thanh Mi Cu CDF Thantlang Nih Thawng Dik Lo A Si Tiah An Chim. 30 October 2023 SAC ralkap thawngzamhnak Fifty Two Telegram Channel nih October 29 ah CDF-Thantlang he i kahdohnak ah CDF-Thantlang ralkap 3 kan thah khawh hna. Cu pin ah corner 25, kutser kutcheh bomb 21, kutser hmanhmi bomb 15, sniper 1, khuankham angki 1 le kuankham lukhuh 4 kan laak khawh, tiah nihin October 30 ah an thanh.Hi kong he pehtlai in

CDF Thantlang ralkap pakhat nih cun, “A langpar in i kahdohnak cu a um pah lengmang ko nain CDF-Thantlang in aa hliammi an um lo. SAC ralkap nih thawng an thanhmi cu a dik lomi a si,” tiah Zalen ah a chim. “Thawngpang zeihmanh kan thei lo, kanmah chungtel hmanh nih theih lomi cu thawngpang dik lo a si lai,” tiah CDF-Thantlang ralkap pakhat nih cun a chim ve. “Fifty Two Telegram Channel cu SAC ralkap nih thawng dik lo an thanh tawnnak channel pakhat a si i kahdohnak thawng he pehtlai in thawng dik lo an thanh tawn caah mipi zong nih i zumh lo ding,” tiah CDF-Thantlang nih ralrin peknak an chim. Crd; The Chin Post