A tam taktak: Mizo hlasakthiam Kimkima nih Laimi ralzam caah Phaisa taltak hi zat bak bawmhnak a pek
Chin Hrin Mizo Hlasakthiam Kimkima Nih Chin Hrin Ralzaam Caah Rs Ting 13.50 Bawmh. Chin hrinsor Mizo hlasakthiam Kimkima nih hmunkip in Chin hrinsor Mizoram ah ralzaam in a lutmi hna caah India tangka sing 13 le cheu cu CYMA sinah a pek. KimKima hi “I zun ngaih lunglen vangin” ti mi le hla dang tampi in Chin hrinsor Mizo pawl lawng si lo in
Laimi cheukhat zong nih an uar ngaimi a si. “ Ralzaam a bawmchantu hna YMA nih ralzaam bawmhnak caah tangka an herh kong ka theih caah tu bantukin ka hlut hi a si ” tiah a chim. Mizoram ahhin kan Chin ralzam minung Thongsawmli hrawng kan um cuahmah lio tiah theih a si.
SAC Phihkhamnak Tuah Dingin Zatlang Bu 300 Leng Nih Singapore Cozah Sinah Nawlnak An Tuah 30 Oct 2023 SAC ralkap cu a rannak in phihkhamnak tuah dingah minung 27,700 leng nih min an thutmi he ramchung ramleng um zatlang bu 300 leng nih Singapore cozah sinah October 29 ah nawlnak ca an kuat, tiah theih a si. SAC phaisa thlennak phihkham piak ding, Singapore ram nih ngeihmi bank ah chiahmi Myanmar cozah phaisa dollar 4.5 billion cu SAC nih hman khawh lo dingin phihkham piak ding le
SAC he pehtlaihnak a ngeimi Singapore hrambunh Company hna cu chekhlatnak tuahpiak ding in nawlnak kan tuah, tiah Blood money campaign nih an thanh. October 25 – 31 tiang ramchung ramleng um zatlang bu hna le Democracy a dirpitu mizapi hna i bawm in Singapore cozah cu SAC phihkhamnak tuah dingin vawleicung huap in nawlnak an tuah lai, tiah theih a si. Blood money campaign nih an langhter ningah SAC hriamnam a bawmchantu ngan bik pathumnak hi Singapore a si i SAC hriamnam le vanlawng datsi zong pehtlai in
an cawk khawh nak ding ah fek tein a dirmi a si, tiah an langhter. A luancia August thla dongh ah Singapore hrambunh Company nih SAC ralkap cu hriamnam, ral lei hmanmi thilri le IT lei fimthiamnak a rak zuarh caah phihkhamnak tuah dingin ramchung ramleng um zatlang bu 200 deng nih Singapore cozah cu nawlnak ca an rak kuat bal cang.
Operation 1027 Ah Tlangcung Hriamtlai Dihlak I Tel Ve Ding In KNPP Nih Sawmnak An Tuah 29 Oct 2023 SAC ralkap a hram bongh khawh nak ding le Federal Democracy rampi ser nakding ca ah chaklei hriamtlai ṭangṭi phu thum nih operation 1027 min in kahdohnak an tuahmi ah tlangcung hriamtlai dihlak i tel ve dingin Karenni National Progressive Party(KNPP) nih sawmnak an tuah. Chaklei hriamtlai ṭangṭi phu thum MNDAA, TNLA le AA nih operation 1027 an tuahmi hi kan cohlan pinah operation ah
kanmah zong kan i tel ve lai, tiin KNPP nih an langhter. KNPP nih Karenni ramkulh chung le Myanmar ram dihlak ah PDF he pehtlaihnak kan ngeih pinah ral lei zong ah kan ṭangṭi i Federal rampi ser khawh nakding zong ah a hram in kan i zuam cuahmah. SAC ralkap cu ramkhel rian in an chuah hlei lo caah kan khelmi remdaihnak le Federal Democracy rampi ser ding cu a si kho lo mi a si. Cu ruangah
SAC ralkap hi a hram in kan bongh a hau, tiah an langhter. Myanmar ram um PDF hriamtlai vialte, mizapi le ramkip nih SAC ralkap hi kan doh i phihkhamnak kan tuah ahcun hramhram uknak cu kan tei ko lai. Cu ruangah tlangcung hriamtlai vialte hinak faak deuh in SAC hi doh ding in kan in sawm hna, tiah KNPP nih faak piin nawlnak an tuah.