Ttihnung ko cang: Laipa tthawng MMA Fighter Tial thang le American pa Chris Ocon an i thong ding nithla a fiang cang
November 11,2023 ah Tial Cung Thang Champion Aa Cuh Lai. October 12,2023 Aralaimi November 11,2023 ah Chin/Laipa Tial Cung Thang cu All in Combat bantam Weight champion aa cuh lai tiah theih a si . Tial Cung Thang hi kum (29) a si,amah he aa cuh ding mi hi Chris Ocon a si i kum (27) a si. A tutan champion cuhnak cu American ram
Mandeville/ Castine Centre ah tuah te ding a si. Hi champion cuhnak ding caah fak piin training ka tuah i kaa zuam cuahmah tiah Tial Cung Thang nih amah social media ah a tarlangh. Aluancia August 19 ah Tial Cung Thang nih American Fighter Darrius Johnson cu a tei i tubantuk in champion cuhnak ding caan tha a hmuh hi a si. November thla thiamthiam ah Chin/Laipa Joshua Van zong UFC ah aa thua ding a si ve i khitik ah Myanmar Flag ka aih cang lai tiah a timeline ah a langhter ve.
October 12, 2023: Tuchun Thantlang khuachung kahdohnak cu a poi tuk e. SAC Ralhrang nih nizan tih ni ahkhan Thantlang khuachung cu Jet Vanlawng in bomb voi 8 a den hnu ah kap hnih karlak kahdohnak a chuak tiah kan theih. Cun Thantlang khua chung ah nizan zing ah an i kap tthan tiah Khualhringtlang khua mi pakhat
nih cun a chim i, tuzing ah khan Hakha SAC Ralhrang nih Miakpi 122 in Thantlang lei hoih in a kah ruang ah kan pasaltha umnak a khen i CNA Paraltha Salai Hram Ceu a nunak a liam ee tiah theih a si. CDF lei zong in hliam an um ti a si i a zat a fiang kho rih lo. SAC Ralhrang lei in minung 3 an thi i hliam zong an um ve len lai zumh a si. Thantlang kahdohnak hi pehzulh in a um khawh caah biatak tein thla za cam cio hna usih
Kachin Ram Ralhrial Camp SAC Ralkap Nih Bomb An Thlakmi Hi Miphun Cihmih Timhnak A Si CNF 12 Oct 2023 Kachin ramkulh, Laiza khuapi um Munglaikhat ralhrial camp SAC ralkap nih bomb an thlakmi hi miphun cihmih tiang in kahdohnak an tuahmi a si, tiah CNF nih an thanh. SAC ralkap nih Kachin ramkulh, Laiza khuapi um Munglaikhat ralhrial camp cu
October 9 zan suimilam 11:30 hrawngah timh ciammam tein bomb an thlakmi cu kan cohlang hrimhrim lo i faak pin kan doh, tiah CNF nihathanh an chuah. Hi thil an tuahmi hi Min Aung Hlaing nih “ka tuah ngam lomi zeihmanh a um lo” tiah tlerhkhawnnak bia a rak chim balmi kha a tak in an tuah cang. Hi bantuk tualchung mi hna cung ah thahnawnnak an tuahmi hi
sualnak chia kha tuk a si, tiah an langhter. “Kan unau Kachin mizapi he kan ral a simi ralhrang SAC cu faak piin kan doh hna lai i kanmah he ramkhel hmuitinh aa khatmi tlangcung hriamtlai, NUG, dohthlennak hriamtlai phu le mizapi he hramhram uknak a dongh tiang kan doh lai,” tiah CNF nih cun an langhter.
Thla 9 chungah KNU le SAC ralkap voi 3500 renglo kahdohnak a chuak. Karen ram KNU Kawthoolei ram chung ah kum 2023 January thla in September thla tiangah SAC ralkap he voi 3500 renglo kan i kap tiah KNU nih cathanh an chuah. KNLA, KNDO le SAC ralkap hna cu thla 9 chung te ah voi 3570 an i kap. Cu kahdohnak ahcun SAC ralkap bawi ngan deuh deuh telh in
minung 3,865 an thi i minung 2,260 hliam an tuar tiah KNU nih cun an langhter. Asinain KNLA, KNDO lei in pasalttha minung 112 nih ram le miphun caah an nunnak sunglawi an pek, a dang minung 399 hliam an tuar ve. KNU ralkap hna nih cun SAC ralkap camp 62 bak an lak piak hna hlei ah hriamnam tor le cheng an chuh fawn hna tiah KNU nih an langhter ning in theih a si.