Thinlung a kuai dih ee: SAC Ralhrang nih Ngakchia kum tling lo hi zat bak an thah mi hna an langhter
SAC Ralhrang Nih Hngakchia 491 An Thah Cang Hna| 2023 October 5 — SAC ralkap nih hramhram in uknak a lak hnu thawk in hngakchia 491 a thah cang hna i hihi War Cime (kahdohnak chung i buar mi sualnak) a buar si tiah NUG Human Rights Minister U Aung Myo Min nih October 4 Press Conference ah a chim. Hramhram in uknak lak a si hnu ah SAC ralkap nih a phunphun in minung a thah hna i, vanlei kahdohnak, hriamngan in kahnak, ral bantuk in ruh i thah, cu bantuk thahnawnnak vialte hi
War Crime a buar mi a si caah taza cuainak lam kawl a hau tiah a chim fawn. Cun SAC ralkap nih kahdohnak ruang ah sianginn 119 a rawk cang i September 27 ah SAC ralkap kah mi hriamngan nih Sagaing ramṭhen, Wantu peng, Kyodaungma khua sianginn in sayamah 1 le hngakchia 21 cu hriamngan ci nih a peh hna i an i hliam, SAC ralkap nih mipi cung ah vanlei kahdohnak le hriamngan kahdohnak voi 2,351 a tuah cang tiah theih a si. ASEAN hnatlaknak 5, UN Security Council nih Myanmar ram caah
bia a khiah mi 2,669 (UN Security Council Resolution 2,669) hna a zulh lo leng ah hngakchia thah, hliamh le sianginn pawl tinh hramhram in kahdohnak hna hi International Humanitarian Law siseh, Universal Declaration of Human Rights siseh, Hngakchia he aa pehtlai mi cahren pawl, Geneva cahren, Rome Statute hna fiang tuk in a buar caah War Crime le sualnak ngei lo mipi cung ah a buar mi sualnak (Crimes Against Humanity) pawl hi fiang le tliang tein a buar hrim ko tiah NUG nih a chim. SAC ralkap pawl
an thiltuah hi War Crime, Crimes Against Humanity hna a buar caah Security Council nih International Court of Justice rian pek ding tiah UNHCHR amah pumpak zong nih a chim i NUG nih cu bantuk sual buarnak vialte cung ah ṭuanvo a ngeitu, a tuahtu, thazang a petu vialte cu ramchung taza cuainak phung ning tein tlaih le dantat an si lai tiah a thanh.
September Thla Chung Ah FRF Le SAC Ralkap Karlak Ah Kahdohnak Voi 3 A Chuak, SAC Chungtel 10 Hrawng An Thi. 2023 October 5 — September thla chung ah Free Revolution Force (FRF) le SAC ralkap karlak ah kahdohnak voi 3 a chuak i SAC ralkap 10 hrawng an thi tiah Free Revolution Force nih thawng a thanh. FRF le
dothlennak phu dang pawl bawm in kahdohnak voi 3 an tuah khawh i 40MM bom Launcher hmang in kahdohnak voi 2 an tuah khawh tiah theih a si. Kahdohnak pawl chung ah SAC ralbawi telh in 10 hrawng an thi i hriam pawl zong an lak khawh tiah theih a si.
Tedim Ah Hngakchia 1 Bomrap Aa Lamh Sual I A Ke Khatlei A Bul. 2023 October 4 — Chin ramkulh, Tedim khua, September 30 ah kum 12 hngakchia pakhat cu bomrap aa lamh sual caah a orhlei ke an tan tiah theih a si. Nu Nyaung Ngaih Nuam cu SAC ralkap LIB 269 nih hram an bunhnak tlang pawng ah thing a hlam lio ah bomrap aa lamh sual hi
a si tiah an chim. Nu Nyaung Ngaih Nuam cu Sagaing ramṭhen, Kalay sizung ah aa thlop lio a si. Aa lamh mi bomrap hi SAC ralkap pawl nih an phum mi a si tiah khuami hna nih an chim. Chin ramkulh ah hramhram in uknak lak a si hnu thawk in 2023 August tiang bomrap ruang ah mipi 20 an thi cang i 37 an i hliam cang tiah CHRO nih September 11 ah a thanh.