CNA Lei In Chim Rel Nak Nawl Ngei Tu Salai Htet Ni Nih Ti Mi Kah Doh Nak Kong A Chim

Hakha Le Thantlang Kar Timit Kahdohnak Ah SAC Ralkap 27 An Thi – Salai Htet Ni Chin ramkulh, Hakha le Thantlang kar Timit kahdohnak ni li chung ah SAC ralkap 27 an thi, tiah CNA chimphuannak nawlngeitu Salai Htet Ni nih a chim.

SAC ralkap pawl cu Hakha in Thantlang lei ah rallam an sial i, rallam an sial hlan ah Hakha, Khusihlubo tlang in SAC ralkap nih hriamngan in an kal nakding lam a venpiak hna, tiah theih a si.

Ni li chung kahdohnak ah SAC ralkap 27 an thi i, Chin ralkap lei in ralkap 12 nih ram le miphun ca ah an nunnak an pek. Kan ralkap pakhat hliamhma pumi an va chanhnak ah hriamngan kuan nih a tlak hna i, atu bantukin kan ralkap an nunnak a liam hi a si, tiah Salai Htet Ni nih cun a chim.

SAC ralkap pawl cu hmun hnih in rallam an sial i khatlei in rallam a sialmi hna cu ralkap an dih cang. June 1 zinglei kahdohnak ah SAC ralkap meithal zun 2 le kuan zong kan laakpiak hna, tiah a chim.

“Hakha le Thantlang kar a ummi CDF le CNA hi kan ṭhio dih hna lai i, Thantlang kan sakhan ah ralkap thazaang kan chap lai tiin timhtuahnak an ngeih hi a si. Nikum zong ah atu bantuk rallam an rak sial cang nain an kan nam kho lo.”

“Rallam a sialmi SAC ralkap pawl cu CNA, CDF Thantlang, CDF Hakha, CDF Zophei le CDF Lautu hna i bawm in kan kah hna. Rallam a sialmi SAC ralkap hi 150 hrawng an si i, Victoria Base lei panh in an ra nain an kan nam kho lai lo,” tiah CNA chimphuannak nawlngeitu Salai Htet Ni nih cun a chim. Crd: the chin post