Zualko: CDF Pasaltha Salai Samuel Zo Than Pui nih Timit kahdohnak ah a kan thih taak ee, A Farnu Mai Elizabeth nih mahtihin ca a tial

CDF Hakha Pasaltha Salai Samuel Zo Than Pui cu a far a simi Mai Elizabeth nih mahtihin ca a tial. Ziah dah ka tta te kha a thi le hnai lak le a hma le rung lak he zong khan mah tluk hin aa dawh rih hnga kan ti ee ka tta. Kei ka tta cu zei dang ruang ah nunpe in a thi sawsawh mi si lo .Jesuh Pathian zum bu te le ram le miphun ca nun pe mi pasal ttha pei si fom cu yh dawh ko hnga lo cu kan ti ee ka tta aw.

Ka tta aw aa dawh tuk mi na muisam te le aa mirh peng mi na mithmai te kha thi le hnai he zoh ngam lo tiang in an in tuah ko nan mu ka tta kei ka mit ah cun aa dawh bik mi ka tta na si tthiam peng ko mu.Na nunzia,na tuanbia , na nunnak pek tiang na kilven mi na ram le na miphun na dawtnak lungthin le na thih tiang na ttuan mi na rian nih an dawh pi tuk ko ee ka tta. Dawh tuk in an in hmuh cio ko lai dah ka ti ee ka tta aw. Ka tta kan tei hlan tiang kan doh lai na ti peng kha ta na tei manh rih ttung lo e na lungsia herh tuk rih ko lai mu.

Na tem tuar mi zat kha na duh bik mi kan Pathian Jesuh nih khan a za cang ko a ti i si lai ee ka tta aw. Amah ttihzah bu te nung mi a fa kha sautuk harsat le fah tuar an siang ti lo i si lai mu ka tta. A liam lai te zong ah kan biakinn ka ngai tuk e ti i zerh fatin pumh ah a kal mi ka tta te kha e…na caah tihnung ko e ti i thloh zong i a ngai lo mi Pathian thangtthat duh tuk mi ka tta te kha tu ah cun zalong te in Pathian a thangtthat cang lai ti ka ruah ah ka hna ngam tuk ee ka tta. Naa nuam ko lo maw?maw na chungkhar na sia kan herh tuk rih dah?

Na nau le nih na keneh zulh kan rak in zuam lai mu ka tta Kanu zong ttha ten kan rak zohkhenh ko lai ee Nangmah sik lawng ngai mi na nau hniang le tete zong tthat tthan ten an rak tthang ko lai mu ka tta na siaherh hrim hlah law..an i hmuh thiam lo caan i uu el kan phuan lai an i ti tawn mi te kha phuan awk na um ti lai lo ee ka tta.An in ngai tuk ruangmang cang lai ee ..Sinan zeihmanh siaherh le lungnuam lo in rak um hlah muh ka tta na thil a rit tuk chin sual lai kan in siang hrim lo ee.. Ka far te kha pakhat te kan ngeih mi si ko nan kaa bochan tuk mi si na rak ti makha ka tta mah ca ma tuan tuk ah na kal ai ee..

A sinan mu ka tta vawlei cu na hlasak mi bang khan ee chiatserh mi ram,duhtlin lo nak ram cu pei si fom cu ti a tuar zia thiam kan rak i zuam lai mu Kan in sian ruang ah si hrim lo kha moh tta. Kan nih tta far rual te cu ee kan ka in kan i daw kho lo nan mu kan thinlung te le kan tuahser nak tete in aa daw tuk mi kan rak si hna kha ka tta Kan chim lo zong ah kan in dawt tuk kha na theih tuk ko ee. Kum 24 chung nunnak le dam nak an pe i kan caah bochan tlak le zohchunh tlak in

nun an sianh tu ,dawtu ttha a kan thlah piak tu kan Pathian Jesuh cung ah kan i lawm tuk ko mu ka tta. Mang ttha tuk ko kun mu ka tta.. na kong chim kan dai kho lai lo ee vawlei cung kan miphun pi nih dawt mi le upat mi pasal ttha ka tta aw.. Upat nak sang bik kan pek mu ka tta (pasal ttha SAMUEL ZO THAN PUI ) RIP 29.5.2023 cu kan nih caah philh khawh ti lo ding ni le thla ah an cang ai mu ka tta Mang ttha in cah ra rih ko nung mu ka tta mangttha tuk. Na dawt tukmi na far ngeihchun.