Zualko: Malaysia ram ah kan Laipa pakhat mahte hri i awk in a kan thih taak ee

Malaysia ram Kuala Lumpur khua i restaurant ah rian a tuan cuahmah lio mi Laipa pakhat cu nizan April 25 ah khan hri aa awk caah a nunnak a liam tiah Mara Community Committee Malaysia sin in theih a si. A nunnak a liam mi hi Thantlang peng Mara tlang mi a si i kum 20 tluk mino te a si.a umnak inn khan chung ah a tu bantuk in a nunnak aa lak hi a si. “April 24 zinglei slm 8 hrawng ah a ruak hi

hmuh a si,a nih hi SAC nih uknak an laak hnu ah Malaysia a phan mi a si i kum hnih tluk lawng a um rih.zei ruang set ah dah a tu bantuk in a nunnak aa lak hi kan thei kho lo,Thantlang peng Mara Tlang mi a si” tiah Mara Community Committee Malaysia president nih Zalen ah a chim. A nunnak a liam mi Lai mino pa ruak cu nihin April 25 ah Mara Community Committee Malaysia nih tawlrel in khrihfa phung ning tein an vui tiah theih a si. Malaysia ram chung ah hin tu thla April thla chung lawng ah ngakchia pakhat telhin Chin mi 3 nunnak a liam cang.

Chin ramkulh, Kanpetlet peng Kyindwe khuapi cu AA bawmh nak in Chin brotherhood hna nih  a luancia March 7 kah tuk hram an rak thok cang i an laak kho bal lo ruang ah le kaphnih kar kahdohnak ruang ah khuapi cu a zapi ti awk in a rawk viar cang tiah kan theih. “kahdohnak hi pehtlai in a chuak peng ko,kahdohnak a fah deuh poah si le SAC lei nih Vanlawng in bomb a rak thlak,kaphnih hna zong nih hriampi an hman veve caah khuapi chung in zapi inn cu a zapi ngawt in a rawk cang” tiah khuami pakhat nih

a chim. Kyindwe khuapi ah hin khuami a ho hmanh an um ti lo i mah le siarem nak cio le ramtang hna ah an zam hna.ral an zaam nak hi thla 4 tluk a si cang caah eidin zong an har ngai leng ah an herh mi sii-ai lei hna an chan bau ngai tiah kan theih. “ ralzaam bawmhnak hi a caan ah cun a um tawn ko,nain a tlam cu a tling kho lo i harnak tete an tong pah ko” tiah pastor pakhat nih a chim. SAC Ralhrang bantuk in Paletwa ram a cuhkalhtu AA tanpi nak in Chin brotherhood nih Cindwe khua cu thla 4 chung an tuk cang nain an la kho bal lo. Cindwe khua hi Ralhrang minung 70 hrawng an um I, an khua inndawng zat hi 150 hrawng an si.

Sezin IB 116 Sakhaan Lak Kahdohnak Ah SAC Ralkap le SNA 30 Leng An Thi | 2024 April 25 — Kachin ram, Hpakan peng, Sezin khua um SAC ralkap sakhaan cu KIA nih April 23 zaan ah an kah i an lak khawh. Sezin ah a tang mi SAC IB 116 sakhaan cu April 20 thawk in KIA nih an kah i ni 3 a rauh hnu ah an lak khawh hi a si. SAC ralkap sin in hriam le

kuanzen pawl an lak khawh tiah an thanh ko nain a zat an thanh rih lo. KIA nih April zarh 2 nak ah Sezin um SAC ralkap palek sakhaan an lak khawh i palek 22 nih a sung an pek. KIA nih Hpakan um SAC ralkap sakhaan tampi cu 2024 chung ah an lak khawh i peng tampi le khua luhchuahnak lam pawl zong an tlaih khawh.

Dawei Peng Thailand-Myanmar Ramri Ah SAC Nih An Sakhaan An Zaam Tak Caah KNLA le PDF Nih Meithal Zun 34 Le Kuanzen Hna An Laak April 25,2024 Tanintharyi ramthen,Dawei peng Thailand-Myanmar ramri ah a um mi SAC Mawhta sakhaan um SAC ralhraang hna nih an sakhaan an chuahtak caah KNLA le PDF hna nih sakhaan cu an laak i meithal zun 34 le kuanzen hna an laak. Aluancia April 23 ah khan KNLA hruaimi dothlennak ralkap ttangti phu hna nih cu sakhaan cu doh hram an rak thok i kaphnihkar kahdohnak tlawmpal a chuah hnu ah SAC ralhraang minung 40 tluk nih an sakhaan cu an chuahtaak i dothlennak ralkap hna nih nizan April 24 ah khan sakhaan an laak khawh hi a si.