Pastor hi Tlangbawi Kan Ti Hna Ahcun Khrihfaupa Zong Hi Tlangbawi Ti Ve Ko Hna Usih
Pastor hi Tlangbawi Kan Ti Hna Ahcun Khrihfaupa Zong Hi Tlangbawi Ti Ve Ko Hna Usih
Biakam hlun kan zoh ahcun, Tlangbawi phunhnih an um ti ko usih, Tlangbawi ngan le Tlangbawi tiin. Tlangbawi ngan/High Priest nih cun, minung sualnak ( lainawng, nupa sualnak, fir etc) atuahmi hna cu kumkhat voikhat in sual ngaihthiamnak/sual thlahnak Day of Atonement Pathian sinah a tuah piak hna.
Cu lawng hlah, nichiar thawinak a tuah chih dih. Afawinak chim ahcun Minung le Pathian karlak lamkaltu, riantuantu/Ambassador an si, Misual pa/nu nih asual thlahnak ding caah a rak ikenmi saram pawl hna a thattu/a rak tawlreltu kha Tlangbawi pawl an si.
Pathian nih a riantuantu dingah aa thimmi an si caah Pathian inn ah chunchun zanzan in rian an tuantu i, riandang zeihmanh tuan kep mi an ngei lo.Biakam thar chung zongah Tlangbawi ngan timi hi a um ko rih.
Tipil petu Johan apa Zechariah kha High Priest/ Tlangbawi ngan asi. Kumkhat voikhat Sual ngaihthiamnak/The Day of Atonement ah Zechariah cu Jerusalem Temple ah a lut tonmi asi. Cubantuk Tlangbawi nih cun miphun nih an zulh ding, tlangbawi nih a zulh ding phung nunzia le biaknak he aa tlak (Rites and Rituals) ning tein phung an zulh I an tuah.
Rites and Rutuals timi hi tuchan thil sining in chim ahcun, Misurhang le changreu, Athiang thitum kutsih thlacampiak, Tipil pek phun ti ve ko usih.Jesuh Khrih vawlei a rat, ministry atuan I athih hnu in cubantuk Tlangbawi ngan le Tlangbawi pawl cawlcanghnak cu Bible ah Silent asi.
Zultu Lamkaltu hna chan in Biakam Thar Pathian zumtu hna cu Zultu hna nih an kurit hna I, anmah bawmtu ah mi an thim hna, rian an khinh hna. Paul nih cubantuk thiamthiam in zumtu hna kilkawi zohkhenhtu dingah Timothy te hna kha rian a khinh hna.
Zultu hna nih anmah bawmtu dingah upa an thimmi hna kha nihin ah Khrihfaupa kan ti hna I, Paul nih rian akhinhmi Timothy cu pastor tiah kan ti. (Hika zawnte hi ruah ding a um ve).
Biakam Thar pastor timi hna nih hin Biakam Hlun Tlangbawi Ngan nih a tuahmi zulhphung bantuk kha atuah dih ve. (Nau Pathian sinah up nak, Thitum Thlacampiak, Misurhang le Changreu, Tipil Pek, sual ngaihthiam thlacam piak etc). Pastor cu kan caah Levi Tlangbawi bantuk an si i cheuhra cheukhat cu amah ta asi, a eiawk asi ti zong kan pom.
Cubantuk in pastor cu Biakam Hlun Tlangbawi ngan bantuk in kan pom I kan cohlan ahcun amah bawmtu dingah Khrihfaupa thimmi zong hi Tlangbawi bantuk in zoh I cohlan ve ding khi an si.
Tlangbawi ngan rian bawmtu cu Holy Place ah zeizong vialte tawlreltu Tlangbawi an si. Tlangbawi rian bawmtu cu Tlangbawi lila asi awk asi.
Cu caah Pastor hi Tlangbawi bantuk in kan ruah I cheuhra cheukhat kan eiter ahcun amah bawmtu Khrihfaupa zong hi Tlangbawi ngan nih a ei mi cheuhra cheukhat a ei ve awk asi ko hnga.
Note: Hihi tu lio khrihfa zumtu kan lungput he zoh chih in ruahchuk ruahcho ding ah ka vun thai mi asi.Credit – Ceuuk Ceuuk