Zualko: Malaysia um Peter Biak Tha Cung nih a kan thih taak ning konglam a hnubik updates thar

Peter Biak Țha Cung A Donghnak Ruak Thlahnak A Tuah Cang. Vaupi [ April ] 17, 2024_  Malaysia ram a ummi Chin ramkulh, Hakha peng, Malsawm khuami kumtling lo ngakchia Peter Biak Țha Cung cu a luancia April 14 (Zarhpi Ni) ah Hrang Tling Thang (Hmaikhah khua) nih a rak thah. Peter Biak Țha Cung ruakvuinak cu nihin April 17 zaanlei suimilam 3:00 (Malaysia caan) ah dawtu hna he Malaysia ram ah tlamtling tein an tuah cang tiah kan theih. “Peter hi a ngakchiat tein duhnung chimhngai le mi nunnem te a si, hringtu a nu le a upa he khua an sa, an umnak innkhan a lawng mi ah lainawng Hrang Tling Thang cu um ter ding in a hawipa nih Peter anu cu ka kawi hi mi felfai le zuding lo, a holh zong a tam lo mitha le midai te a si tiah a chimh piak ruang ah

a hlanhmi a si, zei huatnak le i theihthiam lo nak zong pakhat hmanh an ngei lo, an inn a umnak zong thlakhat hmanh a tling rih lo “tiah naihniam nih CCN ah an chim. Peter a nu hi rianțuannak ah a kal i lainawng pa le Peter le a upa lawng inn an um lio ah a thah hi a si, lainawng pa hi a zaam lai ah a upa cu Peter hi aa hngilhnak a sau ngai cang rak hlau te a ti, caan tlawmpal a rauh ah a upa nih a va zoh ahcun Peter cu puan aa rak thawnh i

a lu cu chantling aa nanhmi cu a va hmuh, Peter tho law tiah a hlauh len cu aa hlau ti lo, a nu cu phone chawnh khawh a si lo caah, chungkhat an Ni cu ka Ni keimah lawng ka um ngam lo tiah a chawnh, a Ni nih Peter tah a ti i, Peter a tho bal ti lo tiah a leh, hlau law a ti i ka hlauh zong ah a tho lo, a thaw a dih cang rua, tiah a leh. A ni cu rian rang ngai in Peter te inn ah cun a va kal i, tlawmpal ah innpa chakthlang nih kan chuahhnawh hna, tiah a chim chap. Lainawng Hrang Tling Thang cu Laimi inn pakhat ah a kal i keimah nih ka thah mi a si lo hi

kaa ka rat hi ka phuan piak hlah uh a ti hna. Inn ngeitu nih amah hi a si ko lai tiah ṭuanvo ngeitu cu an chawnh hna i April 15 zaan ah an tlaih khawh. Lainawng pa hi a sianginn kai ṭi hawi le amah a theihngal mi hna nih hi pa hi misual taktak a si a ziaza a tha lo, ṭih a nung tuk mi a si tiah CCN ah an chim. Atu hi tuanvo ngeitu hna kutchung ah a um cang i zeibantuk dantatnak le biakhiah nak an tuah piak te lai ti cu theih a si rih lo.

A Zungzal Remdaihnak Um Khawhnak Dingah Timhlamhnak Fakpi In Ka Ngei _ Min Aung Hliang | Vaupi 18 | 2024 2024, April 18 ah SAC ralhrang hruaitu General Min Aung Hlaing nih kawl kumthar Thingyan ti toihpuai tuahnak hmun ah a zungzal in remdaihnak um khawhnak dingah biatak tein cawlcanghnak ka ngei tiah a chim. Khat le khat karlak ah a chuakmi thisen hi remdaihnak in lehrulh a herh cang. Kan ram fimnak, ngandamnak le

chaw lehthal naak ah ṭhawng chin chin in kan dir khawhnak lai pehzulh in cawlcanghnak ka tuah lai tiah kawl kumthar Thingyan ti toihpuai tuahnak ah a chim. Hi kong he pehtlai in ramkhel rianṭuantu U Than Soe Naing nih an chim mi cu, a zungzal Myanmar ram remdaihnak a um khawhnak ding ahcun SAC ralhrang cozah uk hruainak ṭha lo hi a tlau hmaisa a herh tiah a chim. General Min Aung Hliang nih cun Myanmar ram remdaihnak ding caah Multi-Party democratic kalning hi pehzulh in a kalpi lai naak kong a chim.

Mindat Peng Ah Kahdohnak Um Lo Nain SAC Nih Bomb A Thlak Ṭhan | Vaupi 18 | 2024 Chin ramkulh, Mindat peng ah SAC ralhrang nih kahdohnak um lo nain nizan 2024, April 17 ah cunglei in kahdohnak a tuah ṭhan, tiah tualchung mi hna sin in theih a si. Mindat tualchung mi pakhat nih “Mindat peng, Daar hmunram chung khuate pakhat ah SAC ralhrang nih bomb a thlak, nunnak liam mi le hliam tuar mi kong ah thawngfiang kan thei kho rih lo” tiah a chim. Paletwa ramri, Mindat peng chung Station (13) in khuate pakhat ah SAC ralhrang nih cunglei kahdohnak voi 3nak tlawm lo a tuah cang i

nunnak liam mi, hliam a tuar mi le thilri rawk mi kong cu kan theifiang kho rih lo, atu hi pehtlaihnak kan tuah cuahmah hna lio a si, an Phone Line a ngah lo, vanlawng 2 in bomb a thlak tiin kan theih, tiah a chim chap.  Mindat peng ah SAC ralhrang nih 2024 kum thla 3 chung lawng ah cunglei kahdohnak voi 25 tiang a tuah i tualchung mi 2 le CDF ralkap 2 an nunnak a liam pin ah tualchung mi 11 le CDF ralkap 2 nih hliam an tuar.