Attha na ti ve maw? Min Aung Hliang nih A Zungzal Remdaihnak Um Khawhnak Dingah Timhlamhnak Fakpi In Ka Ngei tiah a phuan ve cang
A Zungzal Remdaihnak Um Khawhnak Dingah Timhlamhnak Fakpi In Ka Ngei _ Min Aung Hliang | Vaupi 18 | 2024 2024, April 18 ah SAC ralhrang hruaitu General Min Aung Hlaing nih kawl kumthar Thingyan ti toihpuai tuahnak hmun ah a zungzal in remdaihnak um khawhnak dingah biatak tein cawlcanghnak ka ngei tiah a chim. Khat le khat karlak ah a chuakmi thisen hi remdaihnak in lehrulh a herh cang. Kan ram fimnak, ngandamnak le
chaw lehthal naak ah ṭhawng chin chin in kan dir khawhnak lai pehzulh in cawlcanghnak ka tuah lai tiah kawl kumthar Thingyan ti toihpuai tuahnak ah a chim. Hi kong he pehtlai in ramkhel rianṭuantu U Than Soe Naing nih an chim mi cu, a zungzal Myanmar ram remdaihnak a um khawhnak ding ahcun SAC ralhrang cozah uk hruainak ṭha lo hi a tlau hmaisa a herh tiah a chim. General Min Aung Hliang nih cun Myanmar ram remdaihnak ding caah Multi-Party democratic kalning hi pehzulh in a kalpi lai naak kong a chim.
Mindat Peng Ah Kahdohnak Um Lo Nain SAC Nih Bomb A Thlak Ṭhan | Vaupi 18 | 2024 Chin ramkulh, Mindat peng ah SAC ralhrang nih kahdohnak um lo nain nizan 2024, April 17 ah cunglei in kahdohnak a tuah ṭhan, tiah tualchung mi hna sin in theih a si. Mindat tualchung mi pakhat nih “Mindat peng, Daar hmunram chung khuate pakhat ah SAC ralhrang nih bomb a thlak, nunnak liam mi le hliam tuar mi kong ah thawngfiang kan thei kho rih lo” tiah a chim. Paletwa ramri, Mindat peng chung Station (13) in khuate pakhat ah SAC ralhrang nih cunglei kahdohnak voi 3nak tlawm lo a tuah cang i
nunnak liam mi, hliam a tuar mi le thilri rawk mi kong cu kan theifiang kho rih lo, atu hi pehtlaihnak kan tuah cuahmah hna lio a si, an Phone Line a ngah lo, vanlawng 2 in bomb a thlak tiin kan theih, tiah a chim chap. Mindat peng ah SAC ralhrang nih 2024 kum thla 3 chung lawng ah cunglei kahdohnak voi 25 tiang a tuah i tualchung mi 2 le CDF ralkap 2 an nunnak a liam pin ah tualchung mi 11 le CDF ralkap 2 nih hliam an tuar.
Kachin KBC Chairman Hlun Dr. Samson Cu Thonginn Chung In Chuah A Si Hnu Ah An Tlaih Ṭhan | Vaupi 18 | 2024. Kachin Baptist Christian (KBC) Federation Chairman hlun Dr. Samson cu kawl kumthar Thingyan chungah hremnak zeihmanh tuar loin thonginn chung in chuah a si nain, zaan khat chungah tlaihkhih asi ṭhan tiah KBC chungtel hna nih an chim. “Kachin Baptist Christian (KBC) Federation Chairman hlun Dr. Samson hi
an rak tlaih ṭhan naak a ruang zeihmanh kan thei lo” tiah KBC chungtel pakhat nih a chim chap. 2024, April 17 zing suimilam 10:00 tluk ah SAC ralhrang nih a umnak inn ah an rak tlaih ṭhan i a tutiang in an chuah rih loh tiah an langhter. Hi kong he pehtlai in (KBC) chungtel cheukhat nih an chim mi cu SAC ralhrang nih biahalnak tuah dingin an tlaih i thonginn chung si loin zung khan ah an chiah tiah an chim.
Dr. Samson hi 2022, December 5 ah ngandam lonaak ruang ah Thailand ram ah zohkhenh dingin a kal i Mandalay vanlawng bual a phak ah SAC ralhrang nih phungning loin Khrihfabu pehtlaihnak Pauhmah 17 (1) pauhmah 505 (Kah), Pauhmah 52 in kum 6 chung thong thlak ding in Myitkyina thonginn ah an rak kuat mi ai tiah kan theih.
Rungtlang SAC Ralhrang 3 CDF-Hakha Sin Ah Hriamnam He CDM An Tuah | Vaupi 17| 2024 Chin ramkulh, Hakha khuapi, Rungtlang um SAC ralhrang 3 CDF-Hakha sin ah hriamnam he CDM an tuah, tiah theih a si. 2024, April 17 ah Rungtlang um SAC ralhrang 3 hna cu hramhram in uknak a lami SAC rianṭuannak kan duh lo, mipi dohthlennak (Pau Dohthlennak) ah kan i tel ve lai tiah MA1 zun 2, MA2 zun 1, F1 grenade 18 le MA kuan 1,000 he
CDF- Hakha sin CDM an tuah caah lawmhpinak caah phaisa sing 50 cio an pek hna pin a himnak hmun an phanh tiang ṭuanvo an laak hna, tiah theih a si. “SAC ralkap rianṭuannak doh in, mipi dohthlennak (Pau dohthlennak) ah CDM in tel a duh mi paoh cu, Chinland Defense Force-Hakha sinah pehtlai khawh peng kan si, a humhim nak nan phak tiang ṭuanvo kan i lak hna lai,” tiah CDF-Hakha nih an thanh.