Thawngpangthar: Kan pasaltha hna nih tuchun ah SAC Ralhrang Camp an laak i hriamnam cei taktak an laak khawh
Thawngpangthar: Myawaddy Khua Hngak SAC IB 275 Sakhaan Cu Nizan Ah Laak A Si I SAC Division 44 Hruaitu Le Hnuzul 200 An Zaam. April 11,2024 Karen ramkulh,Myawaddy khua hngak in a taang mi SAC Infantry Battalion 275 sakhaan cu nizan April 10,zaan slm 10 tluk ah laak a si i SAC diviosion 44,Brigadier general telhin ralkap 200 tluk cu Thailand-Myanmar hawikomhnak hlei lei panh in an zaam tiah KNU chimphuannak nawl ngeitu
Pado-Saw-Taw-Ni nih a chim. “Nizan zaan slm 10:00pm tluk ah IB 275 cu kan laak,SAC division 44 hruaitu le a hnuzul hna cu ramri hlei lei panh in an zam hna” tiah a chim. A tu ah SAC nih Myawaddy le Kawkareit lei a panh mi lamkip in ralkap thazaang a chap ve cuahmah,Kawkareit ah hrambunh in Myawaddy tuk than a timh cuahmah tiah theih a si.
Mindat Khuapi Ah Inn 21 A Kaang || 11 April 2024 Chinram thlanglei, Mindat khuapi chung ah nihin April 11, zanlei suimilam 2:00 hrawng ah kangh-uhnak a chuak i inn 21 a kaang, tiah theih a si. Inn a kanghnak hmun cu SAC ralkap pawl umhmun an khuarnak thlang ah a si i, a pawngkam ah bomb an hmanh dih caah tualchung mi nih
chuahhnawh in an phalh ngam lo ruangah inn a tlaih mi a tamnak a si. Kangh-uhnak a tong mi inn ngeitu pawl cu ralzaam in hmun dang ah an um lio a si, tiah Mindat lei thawngpang a thanhtu Hkl Mindat nih a ṭial. Zeiruang ah dah inn a kangh ti mi fiang in hngalh a si lo i, tuzanlei suimilam 6:30 hrawng ceo ah mei an phalh khawh, tiah theih a si.
Angṭeng Khua Ah Bomb Lamhsualnak In Tualchung Mi Pakhat Nunnak Liam! || 11 April 2024 Sagaing ramṭhen, Kalaymyo thlanglei, Angṭeng khua ah a um mi Pu David Hre Lian Thang cu nihin April 11 zinglei ah khan an khua pawng rian a ṭuan lio ah bomb aa lamhsual caah a ke orhlei a bul i
a nunnak a liam, tiah theih a si. Pu David Hre Lian Thang cu bomb lamhsual ruang ah a orhlei khuk in a bul i an thlopbul lio zanlei suimilam 7:00 ah a nunnak a liam. Pu David nih cun a nupi le a fa pakhat a kaltak hna.
Sittwe Le Kyaukphyu Um Tualchung Mi Vialte Khua Chuahtak Zok Ding In Twan Mrat Naing Nih Ralrin A Pek Hna The Chin Post || 11 April 2024 Sittwe le Kyaukphyu ah a um mi tualchung mi vialte cu a rannak in khuapi chuahtak dih ding in AA Major General Twan Mrat Naing nih ralrin a pek hna i, biachahnak an tuah cang bantukin a rauh hlan ah kahdohnak thawk an timh kong zong a chim. “Biachahnak kan tuah cang bantukin SAC ralkap nih
an uk cuahmah mi Rakhine ramkulh khualipi Sittwe le Rakhine thlanglei Kyaukphyu ah khua a sa mi tualchung mi vialte khuapi chuahtak in a rannakin a himnak hmun ah i ṭhialkam dih u,” tiah AA Major General nih ralrin a pek hna. Atu bantukin AA dirh kum 15 tlin camtuak lawmhnak ah Twan Mrat Naing nih cun a chim i, Rakhine ralkap rak ti tawn mi cu Arakan ralkap tiah auh si cang seh, tiah a chim chap. Cu pin ah an khualipi a si mi Sittwe le ramkulh thlanglei Kyaukphyu zong a rauh hlan ah an laak lai kong zong a chim. A liamcia 2009 kum ah KIA hrambunhnak Kachin ramkulh Laiza khuapi in
a rak i thawk mi AA cu chaklei hriamtlai unau he ṭangṭi in 1027 Operation an kalpi chung ah Kyauktaw, Mrauk-U, Minbya, Rathedaung, Ponnagyun, Pauktaw, Myebon, Ramree le Chinram, Paletwa tiin peng 9 an laak cang i ralbawi telh in SAC ralkap a thong leng AA sin ah an i ap cang, khuapi a taang rih mi ramkulh chaklei um Buthidaung le Maungtaw laak ding in kahdohnak an kalpi cuahmah, tiah theih a si