Thawngpangchia: Mizoram Laimi ralzam umnak Inn cu thlichia hrang nih tamtuk a hrawh dih ee
New Ngharchhip Khua Laimi Ralzam Buk Zeimawzat Thli Nih A Hawh! 31 March 2024 Mizoram nichuahlei Hnahthial peng, New Ngharchhip(Hngarchip) khua ralzam buk hna cu nihin March 31 zinglei suimilam 10 hrawng i a hrang mi thlichia nih a hawh hna i, sakremh ṭhannak ding kongkau ah lungrethei ngaiin an um kong New Ngharchhip khua ah ralzam in aa dor mi Pu Ni Lian Cung nih The Chin Post ah a chim. Nihin Bawipa Tho ni ah
a hrang mi thlichia hi a faak ngai i, Mizoram hmun dangdang zong ah inn rawkral an tam hna, tiah theih a si. New Ngharchhip ralzaam camp ah hin ralzam buk 20 hrawng a um i, cu lak ah buk 9 cu thli nih a hawh dih. A dang buk pawl zong hi a cungcih a zut mi le a rawpcak ngai mi an si cang hna, tiah Pu Ni Lian Cung nih cun a chim. New Hngarchip khua ah hin ralzam in aa dor mi milu 118 hrawng an um i, cu chung ah chungkhar 13 hrawng cu
khuachung ah inn hlang in khuasa mi an si hna. Ralzam bawmhnak a um setsai ti lo caah ramleng leiin bawmtu a ngei lo mi hna cu an harsa ngai hna i, buk a rawk mi sakremhnak ding thilri zalhnak zong a ngei lo mi an tampi, tiah a chim chap. New Ngharchip ah ralzam in aa dor mi hna hi Ṭhal a vun chuah cang caah dinti zong an har ngai, tiah theih a si.
Hualngoram Police Nih Rithaisi Tamlak An Tlaih || 30 March 2024 Nizan March 29, zan suimilam 10 hrawngah Mizoram lei i phurh ding rithaisii Heroin tam lak cu Hualngoram chung ah Hualngoram Police nih an tlaih. Rothaisii ngeitu hi Pi Zing Ṭial(kum 51) d/o U Phai Phai, Sekan khua; Rihkhawdar ward 1 i khuasa lio mi le Pi Lalrami(kum 44) d/o Pu Chawn Tin Zam, Sekan khua ṭhiamṭhiam; Rihkhawdar ward 2 i a um lio mi hna an si. Rithaisii an tlaih mi Heroin hi bawm 228, international merket ah ₹82,00,000 man hrawng le rithaisii an zuarnak phaisa ₹4,33,000 he an tlaih chih hna. Rithaisii an tlaih mi he pehtlai in
motor khaltu Agape Thang(kum 36), s/o Pu Thawng Hlei Kulh, Tahan khuangbawih veng le ritsii a zuartawn mi Pu Ngun Khual(kum 31) s/o Pu Than Ṭi, Pu Lalsailo(kum 25) s/o Pu San Dum, Sekan khua veve zong Hualngoram Judiciary board biaceih ding ah an tlaih hna. “Hualngoram chung mizapi ukhruainak cozah kalpi cuahmah lio a si i, cozah phungphai upat buin rithaisii khamnak kong ah rianṭuan hung kan bawm u,” tiah Hualngoram Police nih mizapi sin sawmnak an tuah.