Thawngpangthar: Kan pasaltha hna nih Myanmar le Tuluk ramri SAC Ralhrang Camp an laak, ralhrang hi zat an thi

Myanmar-Tuluk Ramri Um Lwegel Khuapi Cu KIA Nih An Humhak Cang I Tuluk Ram Ah Ralhrang Chungtel An Zaam | Vaute 30 | 2024 Myanmar-Tuluk ramri hmunram chung Kachin ramkulh, Lwegel khuapi cu Kachin ralkap KIA nih nizan 2024, March 29 ah an humhak i SAC ralhrang pawl le zung rianṭuan pawl cu Tuluk ram lei ah an zaam hna, tiah KIA he naihniam in ummi hna sin in theih a si. Lwegel khuapi um No.142 SAC ralhrang battalion nih

umhmun an khuarnak Mada Bum sakhan cu March 25 ah an chuahtaak i KIA nih SAC ralhrang sakhan pawl kahdoh in an laak khawh hna ruang ah ralhrang pawl cu Tuluk ram lei ah zaam dih an i tim, tiah Tachileik News Agency nih a langhter. Lwegel khuapi cu KIA nih an kulh dih i SAC ralhrang pawl nih i kaap loin kan chuak lai tiin an hal hna ruang ah an zaam dih i KIA nih a humhak cang, tiah a langhter chih. Atu hi SAC ralhrang pawl cu Tuluk ramchung ah zaam dih an i tim i Tuluk ramri Gate hngaktu hna sin ah an ramchung luhkhawhnak nawl an hal hna, tiah KIA he naihniam in a ummi hna nih an chim.

Sagaing–Minkun Lampi Ah Rian In A Ṭin Mi Tualchung Mi 50 Hrawng Cu SAC Ralkap Nih An Tlaih Hna || 30 March 2024 Sagaing ramṭhen, Sagaing peng, Sagaing–Minkun ah rianṭuannak in a ṭin mi tualchung mi 50 hrawng cu SAC ralkap nih Checkgate ah an tlaih hna i minung pakhat ah Kyats sing 5 in an tlanhter hna, tiah tualchung mi nih an chim. Nizan March 29 zanlei ah Sagaing–Minkun lampi ah rianṭuannak in a ṭin mi tualchung mi 50 hrawng cu Sagaing hleipi cung Checkgate hngak SAC ralkap nih motorcycle ah minung pahnih nan i cit tiin sual an phawt hna i

an tlaih hna, minung pakhat ah Kyats sing 5 in an tlanhter hna i aa tlanh kho lo mi cu SAC ralkap ah luhter nan si lai tiin sakhan chung ah an kalpi hna, tiah an chim. Tlaih a tong mi tualchung mi 30 hrawng cu an chungle cio nih tangka Kyats sing 5 in an tlanh ṭhan hna nain tangka a ngei lo mi midang 20 hrawng cu Shweminwun No.2 palik sakhan an chiah hna hnu ah No.33 Division Headquater ah ralkap tla ding in an kalpi hna, tiah Khit Thit Media nih a ṭial.

Ralkap Tlakter Ding Ah Mincazin A Latu SAC Chungtel Pawl Cu CDF-Mindat Nih Phone In Ralrin An Pek Hna Hnu Ah An Zaam || 30 March 2024 Chinram thlanglei Mindat khuapi ah mino pawl ralkap tlakter ding ah mincazin a latu SAC palik le zung rianṭuan pawl cu CDF-Mindat nih phone in ralrin an pek hna i an zaam dih, tiah theih a si. Mindat khuapi chung ah a um mi SAC kuttang zung rianṭuan cheukhat nih a luancia March 23 ni ah Mindat khuapi, Sanpya sang ah

ralkap tlakter ding mino mincazin an rak laak lio ah CDF-Mindat nih phone in ralrin an pek cang hna, tiah theih a si. “Sanpya dawr tiang an phanh ah pehzulh ti lo ding in CDF-Mindat nih ralrin an pek hna, cazin a latu ah SAC ralkap cu an i tel lo, palik le zung rianṭuan deuh a si. Sanpya sang dah ti lo sang dang ah cun cazin a la manh lo, ralrin pek an si hnu cun an zaam dih,” tiah CDF-Mindat he naihniam in a um mi pakhat nih a chim. CDF-Mindat nih

a luancia March 23 ni ah phone in ralrin peknak an tuah hnu cun Mindat khuapi chung ah ralkap tla ding mincazin a latu an um ti lo. SAC ralkap pawl cu Mindat khuapi chung SAC zung deuh lawng ah umhmun an khuar kho i khuapi kiangkap le a peng chung khuate lei cu CDF-Mindat nih an uk dih, tiah theih a si. SAC nih ram mino ralkap tlak dih ding ti mi phung a nunter mi a cohlang in mino pawl mincazin a latu SAC kuttang rianṭuan vialte nan nun himnak ca ah ṭuanvo kan la lai lo, tiah CDF-Mindat nih ralrin peknak an rak tuah.

Lih chim hi an dohthlennak hriamnam thabik ah an ruah cang rua. Atang ah Salai William Hlawnceu nih a tialmi hi rel chih. Falam peng um Surbung Airport CNF nih an hrawh dih tiah video an taar mi hi anmah tuahchom mi a si. Airport umnak Surbung ah hin CNDF nih gate ser in kumkhat an um cang. Video an post hi March 30/2024 ah an post.  Kumkhat leng Gate ser in CNDF nih an hngahmi ah CNF nih airport an hrawh dih tiah video an post mi cu,

Falam le a peng mipi nih CNF hua hna seh tiah airport chung zeimaw thilri va hrawh in online ah an taarmi a si kha a fiang. Surbung airport thutdan pawl hi 2022 thok ka lio ah CNA nih an rak lak bal, CNDF zong nih zeimaw an herh mi thilri an laak len ve ko tiah kan theih. Zeitin dah Surbung check gate an hngahnak kumkhat a tling cangmi anmah CNDF an um lio ah CNF nih an va hrawh tiah a post tu le video thla tu nih hin airport chung thilri a hrawh hnuah video a thlak i CNF thangchiatnak dingah a tuah mi a si. CNF/A lei ah kan hlat tikah mah btk in thilri kan hrawk bal lo, 2022 thokka ah thutdan ti pawl kha kan rak laak bal le siko an ti. Crd. Salai WH