CDF Asho sin ah Chin mino tam taktak an lut cuahmah ruang ah a herh taktak mi thawngthanhnak an tuah colh

Mino Zeimawzat CDF-Asho Sin An Luh Ca Ah Hriamnam Bawmhchanh An Herh || 26 March 2024 SAC ralkap nih hramhram in nawlngeihnak an laak hnu in Magway ramṭhen, Ngape peng ah hmunkhuar in hriam a tlai mi CDF-Asho nih hramhram ralkap tlak ding ti mi phung ruang ah an sin ah a lut mi mino zeimawzat an um i, mino a lut thar mi hna cu hriamnam an herh ca ah bawmhchanh an herh kong an thanh. “Atu bantukin CDF-Asho nih

hriamnam cawknak Project kan kalpinak cu hramhram in ralkap tlak ding ti mi phung thanh a si hnu in kan sin ah a lut mi ralkap thar hna ca ah hriamnam zalh kan herh ruangah a si,” tiah CDF-Asho in ṭuanvo ngei pakhat nih a chim. CDF-Asho cu hriamnam lei an chambau ngai i, atu tan a lut thar mi ralkap hna zong hriamnam tlaih ding an ngeih lo caah mizapi sin bawmhhalnak an tuah. “Hriamnam cawknak ding ca ah Nway Oo Kaan Let Project cu nizan March 25 in April 25 tiang, thlah khat chung kalpi kan timh i ralkap pakhat nih meithal pakhat cio tal an i tlaih khawh nakhnga, a tak in

a tlam a tlin khawh nakding ca ah ramchung, ramleng um mipi nih dirkamh in thazaang rak kan pe cio u,” tiah CDF-Asho in ṭuanvo ngei pakhat nih a chim.= CDF-Asho cu pau dohthlen caan kum thum leng chung ah Lai meithal he deuh lawng kahdohnak ah an i tel i, hriamnam ṭha deuh mi an ngeih khawh ahcun pehzulh in kahdohnak ah aa tel kho ding an si kong an thanh. CDF-Asho ralkap cheukhat cu meithal an ngeih lo ruang ah kahdohnak ah i tel kho lo in lungrawk ngaiin an um, tiah ṭuanvo ngeitu nih an chim.

Kawkareik Peng Kawh-Bing Palik Sakhaan Laak Kahdohnak Ah SAC 5 An Thi I 23 Nih Hriam An Chiah. March 25,2024 Karen ramkulh,Kawkareik Peng,Kawh-Bing palik sakhaan cu dohtlenak ralkap hna nih March 25 ah an laak i cu kahdohnak ah SAC ralkap minung 5 an thih leng ah 23 nih hriam an chiah. Meithal zun 27 le kuanzen zong tampi an laak kong Lion Battalion rian ngeitu Yebaw A Ngia Thar nih a chim. Cu sakhaan cu KNU Brigade 6 hmunram ah

a um mi a si i March 24 zinglei slm 7:00 tluk in kahdoh hramthok a si i March 25 chun slm 1:10 tluk ah tlamtling tein an laak khawh.kaphnih kar kahdohnak chung ah dothlennak ralkap lei in ralkap 2 nunnak a liam ve i tualchungmi pakhat zong a nunnak liam ve. Kahdohnak chungin tlaih mi SAC ralkap minung 23 le an chungkhar minung 18 hna cu an zapi in nuhrin covo he aa tlak ning in kan chiah hna i KNU hmunpi ah

kan kuat hna tiah A Ngia Thar nih cun Khit Thit Media ah a chim. Kawh-Bing SAC palik sakhaan laak kahdohnak cu Lion Battalion,Kalung Column, KNDO battalion 6, MLA,AD,KNLA le PDF hna ttangti in an doh mi a si. Ralhraang nih hramhram in ralkap tlaak ter ding mi kong ah mincazin a laa tu le an rian tuan a bawmtu khuabawi vialte a herh ning in tuanvo kan in laak hna lai tiah ralrin pek nak zong an langhter chih.

Hakha Ah Ralhraang Bomb In Pu Ro Bei A Nunnak Liam. March 26,2024 Chin ramkulh khualipi Hakha ah 2024 March 25 zaan suimilaam 10 (Kawlram caan) hrawng ah kahdohnak a um lo nain ralhraang nih hriamngan kahthlor in an kah caah Hakha Khuathar sang ah a ummi Pupa Ro Bei te inn cu ralhraang kahmi bomb nih a tlak caah chungkhar pabik Pupa Ro Bei a nunnak a liam tiah kan theih. Chungkhar ah ngakchia pahnih le upa pahnih nih

hliam an tuar. Chungkhar he naihniammi pakhat nih ‘ Bawipa khuakhan hi minung nih hngalhthiam a har ko, mi ziatha le sang le veng nih bochan mi, miziatha le upat thiam tuk mi a si, sian a um hrim lo, tiah a chim. Ralhraang bomb nih tlak ruangah an inn lo zong tampi a rawkral tiah kan theih.  Chin ramkulh chung ah ralhraang nih hriamngan kahthlorh in an kah theo caah khuami inn le lo kheng in hliamtuar an um pah theo tawn.