(Video+) Kan pasaltha hna nih Drone in SAC Ralhrang Motor rual an puah hnawh i tam taktak an thi lio video kan langhter

Atang ah Video a um: Pakokku LIB 101 In A Rak Chuak Mi Riahcaw Phor Mawtaw Drone In Bom An Thlak Hnawh Hna SAC 8 An Thi 10 Leng Hliam An Tuar. March 26,2024 Magway ramthen, Pakokku peng, No. 101 LIB Headquaters in Kama khua lei ah riahcaw chanh ding in a kal mi SAC ralkap mawtaw pawl cu March 23 zinglei sml 6:00am in zaan sml 7:30pm tiang drone in bom an thlak hnawh hna i SAC ralkap 4 an thi tiah Myaing PDF nih thawng an thanh. Cun March 24 ah

Kama khua ah a rak phan mi SAC ralkap riahcaw phor mawtaw in ralkap 100 hrawng cu Myaing peng, Twin-ma khua ah ke in an luh lio ah zinglei sml 7:00am in zaanlei sml 5:00pm tiang bom lung 50 leng an thlak hnawh hna caah SAC ralkap 4 an thi, 12 hrawng an i hliam tiah theih a si. Kahdohnak chung ah Myaing PDF B01, Wolf Guerilla phu, MRTF, Black Cobra, PKU-ThuRein, Kamma Underground, PPDF, DMG, Freedom Frighters, Pauk PDF, Earthquake Defense Force, Young Force, Black Ceetah le adang dothlennak phu pawl an i bawm hna tiah theih a si. Muicawl- Myaing Garuda PDF

Hakha Ah Ralhraang Bomb In Pu Ro Bei A Nunnak Liam. March 26,2024. Chin ramkulh khualipi Hakha ah 2024 March 25 zaan suimilaam 10 (Kawlram caan) hrawng ah kahdohnak a um lo nain ralhraang nih hriamngan kahthlor in an kah caah Hakha Khuathar sang ah a ummi Pupa Ro Bei te inn cu ralhraang kahmi bomb nih a tlak caah chungkhar pabik Pupa Ro Bei a nunnak a liam tiah kan theih. Chungkhar ah ngakchia pahnih le upa pahnih nih

hliam an tuar. Chungkhar he naihniammi pakhat nih ‘ Bawipa khuakhan hi minung nih hngalhthiam a har ko, mi ziatha le sang le veng nih bochan mi, miziatha le upat thiam tuk mi a si, sian a um hrim lo, tiah a chim. Ralhraang bomb nih tlak ruangah an inn lo zong tampi a rawkral tiah kan theih.  Chin ramkulh chung ah ralhraang nih hriamngan kahthlorh in an kah theo caah khuami inn le lo kheng in hliamtuar an um pah theo tawn.

Chinram Le Yaw Lei Panhin A Kai Mi SAC Motor Rual Chungin SAC Ralhrang Captain 1 Telhin Minung 4 Nih Hriam An Chiah. March 25,2024 Chin ram le Yaw peng ah thazaang chapdingah Pakokku in a rak kai mi SAC motor rual chung in SAC captain pakhat telhin minung 4 cu tualchung hriamtlai hna sinah hriamnam tling he

an i ap tiah theih a si. “Captain pakhat aa tel,a dang SAC ralkap 3 an zapi 4 an si.meithal le kuanzen hna an rak i ken i kan sin ah an rak i ap” tiah tualchung hriamtlai pakhat nih a chim. SAC ralkap a rak kai mi hi 100 tluk a si i March 22 ah khan Pakokku in an rak i thawh i March 24 ah Kaba (ကမ္မမြို့ ) khuapi an phan tiah theih a si.

Chinland Cozah Nih Hramhram Ralkap Tlakter Duhlonak Cathanh Chuah || 25 March 2024
SAC nih a luancia March 10 thawk in Myanmar ram chung mino a si mi paoh ralkap tlak ding ti mi phung an chuah ni thawk in Myanmar ram hmun kip ah hramhram in mino an tlaih mi hna cu Chinland cozah nih an cohlan lonak cathanh an chuah. Chinram chung zong ah SAC kuttang rianṭuan pawl nih ralkap tlakter ding ah mino mincazin an laak hna i hramhram in ralkap ah tlakter an timh mi hna cu Chinland cozah nih kan duh hrimhrim lo, SAC nih

hramhram in ralkap tlakter ding ti mi phung a chuah mi zulhpiak in a cawlcang mi khuabawi le pumpak ahopaoh Chiland cozah nih dan kan in tat hna lai, tiah Chinland cozah nih an langhter. SAC Chairman Min Aung Hlaing nih uknak duh ruang le hramhram nawlngeihnak pehsauh duh ruang ah kum 2010 phunghram ning in ralkap tlak hrimhrim ding ti mi phung a nunter ṭhan i Myanmar ram hmun kip ah mino tlaihkhih in ralkap ah an tlakter cang hna caah caan a um liote ah CNF/CNA sin ah rak lut dih hna u, tiah CNF nih kum (36) tlin camtuak March 20, Chin Dohthlen Ni cathanh an chuah mi ah sawmnak an rak tuah.