Laitlang lei ah a ra cuahmah mi SAC Ralhrang Motor 100 chung ai ciitmi SAC Ralhrang Captain 1 Telhin Minung 4 Nih Hriam An Chiah.

Chinram Le Yaw Lei Panhin A Kai Mi SAC Motor Rual Chungin SAC Ralhrang Captain 1 Telhin Minung 4 Nih Hriam An Chiah. March 25,2024 Chin ram le Yaw peng ah thazaang chapdingah Pakokku in a rak kai mi SAC motor rual chung in SAC captain pakhat telhin minung 4 cu tualchung hriamtlai hna sinah hriamnam tling he

an i ap tiah theih a si. “Captain pakhat aa tel,a dang SAC ralkap 3 an zapi 4 an si.meithal le kuanzen hna an rak i ken i kan sin ah an rak i ap” tiah tualchung hriamtlai pakhat nih a chim. SAC ralkap a rak kai mi hi 100 tluk a si i March 22 ah khan Pakokku in an rak i thawh i March 24 ah Kaba (ကမ္မမြို့ ) khuapi an phan tiah theih a si.

Hakha khuachung khuachia fa kan tleihchap tiah CDF Hakha upa nih an chim. Bawipa bawmh nak in..2024 March 24 ni ah Police bo(2) rank a si mi Kyaw Lin Oo cu CDF-Hakha nih meithal kuan khat hmanh thlah lo tein kan tlaih chap ṭhan. Ralhrang hna an cawlcangh ning, an itimh mi tete tampi zong

kan vun theih khawh chap ngai. Kan tuan cuahmah rih lai, kan doh cuahmah rih hna lai caah raltei a duh mi kan miphun hawi hna poah nih cun rak kan ṭan pi ve cio uhlaw. Tiah an chim chapmi cu a si. CDF Hakha nih Rung Operation min in biatak tein Hakha khuachung an kah cuahmah lio tiah theih a si.

Chinland Cozah Nih Hramhram Ralkap Tlakter Duhlonak Cathanh Chuah || 25 March 2024
SAC nih a luancia March 10 thawk in Myanmar ram chung mino a si mi paoh ralkap tlak ding ti mi phung an chuah ni thawk in Myanmar ram hmun kip ah hramhram in mino an tlaih mi hna cu Chinland cozah nih an cohlan lonak cathanh an chuah. Chinram chung zong ah SAC kuttang rianṭuan pawl nih ralkap tlakter ding ah mino mincazin an laak hna i hramhram in ralkap ah tlakter an timh mi hna cu Chinland cozah nih kan duh hrimhrim lo, SAC nih

hramhram in ralkap tlakter ding ti mi phung a chuah mi zulhpiak in a cawlcang mi khuabawi le pumpak ahopaoh Chiland cozah nih dan kan in tat hna lai, tiah Chinland cozah nih an langhter. SAC Chairman Min Aung Hlaing nih uknak duh ruang le hramhram nawlngeihnak pehsauh duh ruang ah kum 2010 phunghram ning in ralkap tlak hrimhrim ding ti mi phung a nunter ṭhan i Myanmar ram hmun kip ah mino tlaihkhih in ralkap ah an tlakter cang hna caah caan a um liote ah CNF/CNA sin ah rak lut dih hna u, tiah CNF nih kum (36) tlin camtuak March 20, Chin Dohthlen Ni cathanh an chuah mi ah sawmnak an rak tuah.

Zualko: Mizoram ah Motor Pahnak in Chinmi Pakhat a Nunnak a Liam. March 25 ll  Mizoram, Aizawl khua ah motor pahnak in Chinmi pakhat a nunnak a liam, tiah theih a si.  March 23 ah khan Aizawl khuapi chung ah kum 33 a si mi Salai Lal Hre Lian cu motor nih a pah caah a nunnak a liam.  Salai Lal Hre Lian hi Tamu peng, Khampat khua in Aizawl ah riantuan ding in a kal mi a si. A ruak cu nihin ah an Aizawl ah an vui tiah thawng kan theih.

Thawngpangthar: PDF-Zoland Nih Ralkap Tlakter Ding Ah Mino Mincazin A Latu Pawl An Tlaih Hna || 25 March 2024 Chinram, Tedim peng chung ah hrambunh mi PDF-Zoland hriamtlai phu nih hramhram in ralkap tlakter ding ah mino mincazin a latu SAC kuttang rianṭuan minung 5 an tlaih hna kong nihin March 25 ah an thanh. Mah le mah tiin i zaangfahnak le i theihthiamnak um ti lo in SAC kuttang ah rian a ṭuan rih mi le SAC ralkap a lamkip in

a bawmtu cu ahopaoh atu bantukin dan kan in tat thluahmah cang hna lai, tiah PDF-Zoland nih an langhter. SAC ralkap tlakter ding ah mino mincazin a latu minung 5 hna cu:- Kap Suan Khual ( kum 36), Khual Lian Mung (kum 55), Lian Lam Khai ( Kum 48), Sian Khan Khual (Kum 48) le Nang Suan Gin( Kum 57) hna an si.