Halkha kong cu a poi tuk e: Tuchun Halkha khuachung kahdohnak ah kan Laipa pakhat hliam a tuar a dang minung hi zat ralhrang nih an tlaih hna ee
Nihin Hakha Khuachung Kahdohnak Ah Tualchung Mi Pakhat Hliam A Tuar, Tualchungmi Zeimawzat An Tlaih Hna. 7 November 2023 Chin ramkulh, Hakha khua chung GTI pawng kahdohnak ah tualchung mi pakhat hliam a tuar i, tualchungmi zeimawzat an tlaih hna, tiah theih a si. “Nihin November 7 zinglei suimilam 8:00 in Hakha GTI pawng hrawng ah kahdohnak a chuak i chun tiang meithal thawng a dai lo. Kahdohnak a daih tlawmpal ah rianṭuan dingin in
a chuakmi tualchung mi pakhat cu an inn in a chuah tlawmpal ah SAC ralkap lei nih an kah,” tiah tualchung mi pakhat nih The Chin Post ah a chim. Meithal thawng a daih hnu tlawmpal ah tualchung mi pa pakhat cu rianṭuan dingin a chuak i an inn he aa hlat lonak a phak ah SAC ralkap lei nih a ṭaang ah meithal in an kah. Chanh ngam loin caan saupi a um hnu ah an chanhchuah khawh i sii-inn ah an lanhpi, tiah a chim chap. “Hliamtuarmi pa hi
a ṭang in tleng lak an kah i a thi tamtuk a chuak nain Pathian nih a nunnak cu a zuah. Kahdohnak pawng hrawng ah a ummi tar le Rev. Hoi Cung Tum sianginn ah ca a cawngmi siangngakchia tampi zong SAC ralkap lei nih an tlaih hna,” tiah a dang tualchung mi pakhat nih The Chin Post ah a chim ve. Crd: TCP
Matupi Khuahung Kahdohnak Ah SAC Ralkap 2 An Thi I pakhat 1 Hliam A Pu. 7 November 2023 . Chin ramkulh Matupi peng, Hakha-Matupi lampi pengkomh zung pawng Cawngthia lamṭhen ah tualchung hriamtlai phu CDF-Matupi le SAC ralkap kar kahdohnak a chuak i SAC ralkap 2 an thi i 1 hliam a pu, tiah theih a si. “SAC ralkap thazaang 60 cu rallam hmun hnih; Cawngthia lei le pengkomh zung lei ah an i ṭhen i CDF-Matupi nih November 6 zanlei suimilam 4:45 ah
an kah hna. SAC lei ralkap 2 an thi i ralkap 1 hliam a pu, CDF-Matupi lei cu him tein hnu an tolh kho, November 5 ah SAC ralkap pakhat mipi sin i aa fonh ruang ah atu bantuk in an cawlcanghnak a si,” tiah CDF-Matupi Battalion 2 in ṭuanvo ngei Salai Van Lawm nih Zalen ah a chim. “CDF-Matupi cu
pehzulh in kahdohnak a tuah ṭhan ding kan si, a hlan nakin bawmhnak kong ah kan thazaang a der deuh caah tualchung mi zong nih thazaang chuah rih in kuanfang cawknak ding ca ah tangka le a lamkip in thazaang kan chuahpi rih ko u,” tiah CDF-Matupi Battalion 2 in ṭuanvo ngei pakhat nih cun a chim.
Zualko; Tuchun ah Hakha khua ah ngaihchiatnak kan tong tthan ee. Tuchun ah khan Pu Siang Tum – 68 (Siang Bor pa, Lawngtlang) Hakha ummi Zophei nih kan bochan tukmi kan pa nih tuchun 7 November 2023 ni Chun 12:00Noon ah mual a kan liam tak. Kan ngaih a chia hringhran. Tantaakmi a chungkhar hna zong Bawipa nih hnem hram ko hna sehlaw. Culawng si loin Zophei kan innpi a cim chun ah khua a mui. Zophei Baptist Church, Hakha nih kan ngaihchiatnak kan langh ter.
Kokang Ram Thein Ni Khua SAC Taaganthang Byuha Sakhan Telh In Sakhan 4 Le Ralkap Motor Runrual MNDAA Nih An Lak. November 6, 2023 — Shan ram chaklei, Kokang ram Theinni peng SAC Taaganthang Sakhan telh in sakhan 4 le ralkap motor runrual cu MNDAA nih hriamnan tampi he an lak tiah MNDAA lei nih an chim. November 4, MNDAA Kokang ram ah SAC Byuha sakhan pakhat a si mi Taaganthang sakhan kahdohnak ah SAC ralkap nih an meithal hriamnan tampi an tlik tak, Kokang ralkap phu hna nih November 4 in 5 tiang Taaganthang sakhan cu din lo in
an kah i SAC lei vanlawng nih bom a thlak, November 4 zing 9:00am ah Kokang ralkap nih an kah ṭhan hna, November 5 ni zanlei 3:05pm ah sakhan dihlak an lak khawh. Mah sakhan kahdoh lio ah SAC vanlawng bom thlaknak in tualchung mipi 3 hliam an tuar. November 4 zaan 8:30pm le November 5 zing ah Mipi ralkap lei nih Drone in Lashio peng um SAC LIB 507, LIB 291 ah bom an thlak, November 5 zinglei 3:00am ah unau hawikom phu hna nih
Theinni peng lei in a rak kai mi SAC motor 5 cu an kah, Motor 1 an hrawh khawh, Motor chung ah 60MM kuan 200, Kutcheh bom 150, Rifle zuun 1, kuan bawm 22 le sii ai tampi an lak, November 5 zaan 9:00 -10:00 pm tiang ah unau hawikom hna nih Drone in SAC LIB 291 ah bom an thlak. November 6 zinglei ah Kokang ram um Sakhan 2 an lak khawh tiah Kokang thawngzamhnak in theih a si.