SAC Ralhrang Drone an kah khawh: Timit ummi CNA le CDF hna nih atu langhtermi Ralhrang Drone an kah khawh ning
June 4, 2023 Tuchun Timit lei Lungkhar pawng ah SAC Ralhrang hna nih Drone in kan pasaltha CNA le CDF hna cu a zoh hna i Bomb in an kah lengmang hna caah kan Pasaltha hna nih cu Ralhrang Drone cu tla lak in an kah tiah theih a si. Atu Drone hi a man faak ngaingai mi a si i Tuluk nih a sermi Drone a si tiah kan theih. CDF kan ralkap pa pakhat nih a chimmi cu
Drone kan kah thlak khawh hi cu nizan ahkhan a si cang Timit in Lungkhar tlang lei ahkhan a si tiah a chim. cun a peh chapmi cu tuchun ahkhan Jet Vanlawng pakhat a rak zuang i bomb a thlak men lai kan ti nain Bomb thla lo in a kan hel hnu ah a kir than tiah a chim ve. Atutiang Timit kahdohnak ahhin SAC Ralhrang lei hi minung 28
an thi cang i, Chin pasaltha lei in minung 12 nih an nunnak an pek ve cang tiah kan theih. Atutan hi ram khat le ram khat i doh bantuk bak in Ralhrang nih Jet Vanlawng siseh, Miakpi siseh, ke ralkap siseh a hman caah Timit lei Van Kham operation hi a caan a sau kho mi a si i, Chin mipi hna zong nih biatak tein thazaang kan chuah chinchin a hau tinak a si.
Yangon ah NUG nih Ralkap Battalion Thar No. 5101 An Dirh Salai Mangpau June 2, 2023 National Unity Government (NUG) kuttang um Yangon ramthen hriamtlaih cawlcanghnak fak deuh in hmalak ding timhtuahnak he June 1 ah PDF Battalion no. 5101, a thar an dirh tiah theih a si. SAC ralkap le a bawmchantu dohnak Underground Movement (UG) lawng si tilo in, PDF taktak cawlcangh thawk ding ah in June 1 ni ah Yangon hrambumh a hmasa bik Battalion 5101 cu dirh a si cang tiah NUG nih thawngthanhnak a tuah cu a si.
NUG chimnak nawlngeitu Nay Phone Latt nih, “Battalion 5101 dirhnak a ruang ah atulio khuachung cawlcangmi, Underground Movement (UG) zeihmanh donhkhanhnak a um lai lo, UG zong pehzulh in a um peng ko lai, SAC ralkap nawlngeihnak le uknak a thawnnak khuapi deuh ah mah bantuk Battalion thar kan dirh” tiah a chim.
“Kan ral nih a uk (control) khawh mi khuapi deuh ahhin mipi ralkap (PDF) thawnter ding a herh. Atu ah, Bago, Mandalay, Ayeyawaddy, Yangon ah Battalion thar dirh a si cang. Mah battalion hi a tu dirh hram thawkka a si caah a herhmi timhtuahnak, training peknak, hriamnam kong ah kan buaipi lio i Khuachung kahdohnak cu ni le can nih lai a rel te lai. A bik in Kan ral SAC tei khawh hi a biapi cem ko, SAC ralkap nih Mipi uknak a lak hnu in khuate lei kahdohnak a um. Khuapi chungah
raldohnak a fak tuk leng rih lo. Nihin ah Khuachung tiang battalion a hun um cang. Dohthlennak hi a rannak in dih cang seh ti kan duh. Khuachung cawlcanghnak NUG nih Battalion thar a dirh mi ah Dalan pawl fimtawl kho ding lam thar a ser a si ko. Khuachung Dalan fimhlawmnak mission hi palh lo ding hi a biapi nga” tiah NUG chimnak nawlngeitu Nay Pone Latt nih a chimchap