Thawngpangthar: Tuchun kahdohnak ah kan Pasaltha hna nih SAC Ralhrang Camp an laak, ralhrang hi zat an thi

Myingyan Peng Ah Sin-min Operation An Tuah I SAC Ralkap Sakhaan Pawl An Kah | 2024 April 24 — Mandalay ramṭhen, Myingyan peng chung um SAC ralkap pawl nih hmunhma an khuarnak sakhaan pawl cu Sin-min Operation min in an kah hna i 60 MM telh in hriam le kuanzen pawl an lak khawh, SAC ralkap 20 hrawng an thi tiah Myingyan pengkomh PDF Battalion 2 (MGN Tiger) nih a thanh. April 20 thawk in Sin-min operation min in Myingyan khuachung SAC ralkap nih hmunhma an khuarnak hmun 4 cu

hmakhat te ah an kah hna. SAC ralkap le pyusawhti minung 60 hrawng umnak Myingyan khua chaklei Irawaddy tiva kam ah a um mi Gyi khua cu MGN Tiger le a hawikom phu nih an kah hna hi a si. Kahdohnak hi sml 3 hrawng a rau i sakhaan an lak khawh, SAC ralkap le pyusawhti 15 hrawng an thi tiah MGN Tiger nih an thanh. SAC lei nih Semikhone tiva kam in bawmhnak an rak pek hna caah dothlennak phu lei an kir ṭhan, Myingyan pengkomh PDF No. 2 in hriamtlai Arka Min a nunnak a liam i

adang hriamtlai 4 an i hliam tiah theih a si. Gyi khua sakhaan lak kahdohnak ah 60 MM bom lung 9, MA-3 zuun 2, 5.56 kuan 125 an lak khawh. Cun Myingyan peng hrambunh LIB 15 zong 107MM lung 2 in an kah i an i dornak buk a khen caah SAC ralkap 4 a khen hna i an thi tiah an langhter. Cu bantuk in Myingyan peng, Semikhone tiva kam in SAC ralkap tilawng 2 le zung inn pawl zong Shock Missile in an kah hna leng ah Myingyan khuachung SAC ralkap hrambunhnak pawl zong drone in an foh hna tiah theih a si.

CNDF Falam 3 nih Zanniat minung faak tuk in an velh. Nai te 11 april 2024 ahkhan  Falam peng chung ah CNDF Falam nih anmah CNDF Aikawn gate ah Kalaymyo in a vun i thawhmi Motor in kuva tlai a phur mi minung 3 lak ah 2 an velh hna. Motor khaltu nih lam hi kal a ngah maw tiah a hal hna i cu ahcun CNDF  Zu ri pawl nih Motor in an tumter i

an motor mawngtu le a zultu cu an velh hna. An lu le an keng pawl ah hliam an tuar tiah theih a si. Motor mawngtu hi  Zaniat mi Simcing khua pa le a zultu cu Falamsiizungah ai thlop ti a si. Atu hi Mawtaw mawngtu pa chawnhbiak kan i zuam lio a si. CNDF falam ralkap  3 lak ah minung 2 hi zuu an rii tuk ti theih a si fawn. Motor a mawngtu le a zultu pahnih hi an vuak hna le. Simcing khuapa hi a faak ngaingai tiah kan theih

Dohthlennak Kum 3 Chung ah CDF-Mindat Ralkap 65 an Thi. April 24 || Myanmar ram Pau Dohthlennak kum 3 chung ah CDF-Mindat in ralkap 65 nih ram le miphun ca ah an nunnak an pek, tiah theih a si. CDF-Mindat an dirhnak kum 3 tlin camtuak cu nihin April 24 zinglei ah Zoom in an tuah i, CDF-Mindat nih kum 3 chung an cawlcanghnak pawl report an tuah mi ah

a cunglei bang in an langhter hi a si.  Kum 3 chung ah CDF-Mindat in ralkap 65 nih nunnak an pek pin ah hliamhma a pu mi ralkap 100 leng zong an um.  Nihin zinglei ah an tuah mi CDF-Mindat kum 3 tlin camtuak ah CRPH, CRCH, ICNCC, NUCC, MTC le dohthlengtu ralkap bu cheukhat in aiawhtu pawl an i tel kho, tiah theih a si.

Chinram SAC minister pawl Hakha khuachung ah an i ṭhial. April 24 || Chinram ah SAC rianpek mi minister hna cu an um tawnnak minister pawl inn ah um ngam ti lo in Hakha khuachung ah an i ṭhial tiah theih a si. April 12 ah Ministers pawl inn in zung kai an i thawh lioah, CDF-Hakha nih an rak kah hna. Cu hnu cun minister pawl inn ah an um ngam ti lo caah khuachung ah an i thial mi a si tiah kan theih. Khuachung i an i ṭhialnak hmun cu Chinoosi sang Taik-Ku-Lung tian auh mi cozah rianṭuan bawi pawl umnak quarter ah a si i inn kua a um. An i ṭhialnak zarh khat a tling rih lo tiah theih a si.  Taih-Ku-Lung quarter cu 2010 lio ah minister pawl an rak umnak a si. Minister pawl inn an lim hnu ah

cozah rianṭuan bawi pawl an rak chiah hna.  Taik-Ku-Lung ah a um mi pawl cu MEB Bank hmai tlakrawh inn dot thum le Pengkomh Zung hnulei ah a um mi quarter ah an ṭhial hna tiah tualchungmi nih an chim.  Nizan April 23 ah SAC helicopter pakhat cu Hakha khua ah a rak ṭum i, April 12 lio kah ton ruang hma a pu mi pawl a kalpi hna tiah kan theih. CDF-Hakha nih April 12 ah SAC rianpek mi minister pawl motor tlar cu drone in an doh caah Social Affairs Minister le Minister of Economy tel in minung paruk hma an pu tiah theih a si. Ref: Khonumthung