A poi tuk ee; CDF Mindat nih kum thum chung ah minung hi zat bak kan thi cang timi an langhter

Dohthlennak Kum 3 Chung ah CDF-Mindat Ralkap 65 an Thi. April 24 || Myanmar ram Pau Dohthlennak kum 3 chung ah CDF-Mindat in ralkap 65 nih ram le miphun ca ah an nunnak an pek, tiah theih a si. CDF-Mindat an dirhnak kum 3 tlin camtuak cu nihin April 24 zinglei ah Zoom in an tuah i, CDF-Mindat nih kum 3 chung an cawlcanghnak pawl report an tuah mi ah

a cunglei bang in an langhter hi a si.  Kum 3 chung ah CDF-Mindat in ralkap 65 nih nunnak an pek pin ah hliamhma a pu mi ralkap 100 leng zong an um.  Nihin zinglei ah an tuah mi CDF-Mindat kum 3 tlin camtuak ah CRPH, CRCH, ICNCC, NUCC, MTC le dohthlengtu ralkap bu cheukhat in aiawhtu pawl an i tel kho, tiah theih a si.

Chinram SAC minister pawl Hakha khuachung ah an i ṭhial. April 24 || Chinram ah SAC rianpek mi minister hna cu an um tawnnak minister pawl inn ah um ngam ti lo in Hakha khuachung ah an i ṭhial tiah theih a si. April 12 ah Ministers pawl inn in zung kai an i thawh lioah, CDF-Hakha nih an rak kah hna. Cu hnu cun minister pawl inn ah an um ngam ti lo caah khuachung ah an i thial mi a si tiah kan theih. Khuachung i an i ṭhialnak hmun cu Chinoosi sang Taik-Ku-Lung tian auh mi cozah rianṭuan bawi pawl umnak quarter ah a si i inn kua a um. An i ṭhialnak zarh khat a tling rih lo tiah theih a si.  Taih-Ku-Lung quarter cu 2010 lio ah minister pawl an rak umnak a si. Minister pawl inn an lim hnu ah

cozah rianṭuan bawi pawl an rak chiah hna.  Taik-Ku-Lung ah a um mi pawl cu MEB Bank hmai tlakrawh inn dot thum le Pengkomh Zung hnulei ah a um mi quarter ah an ṭhial hna tiah tualchungmi nih an chim.  Nizan April 23 ah SAC helicopter pakhat cu Hakha khua ah a rak ṭum i, April 12 lio kah ton ruang hma a pu mi pawl a kalpi hna tiah kan theih. CDF-Hakha nih April 12 ah SAC rianpek mi minister pawl motor tlar cu drone in an doh caah Social Affairs Minister le Minister of Economy tel in minung paruk hma an pu tiah theih a si. Ref: Khonumthung

BCM,Bethel Khrihfabu Nih Salen Khua IDP Camp Um Indawng 143 Caaah Facang le Thildang An Hlut Hna April 24,2024 Aizawl hrambunh,BCM Bethel Khrihfabu nih Thantlang peng Salen khua IDP camp ah aa dor mi ralzam indawng 143 caah facang tun 143 leng ah thil dang tete pekchanhnak an ngei hna tiah kan theih. April 20 ah khan Bethel khrifabu lei in Salen khuan an phan i a zanlei ah ralzam dawng khat ah facang tun 1 cio in an phawt hna hnu ah Pi Siang Hem Sung in nu nih thlachiar hman mi bawm 170 a pek chanh hna.hrukaih zong tlawmpal an ken chih tiah kan theih. BCM Bethel khrihfabu nih hin eidin lei lawng si loin taksa le thlarau,lunghtin lei an thawn khawh nak hnga ruahchannak he

a tu bantuk rian an tuan hi a si i pumhnak le Pathianbia in thazaang laak tinak zong an ngei fawn. A luancia kum zong ah khan Bethel Khrihfabu hna nih Thantlang peng Bungkhua um IDP camp ah a tu bantuk tein bawmhnak an rak pek bal cang hna. A tutan bawmhnak an pek mi hna hi ramdang le he pehtlaihnak zei hmanh um lo tein an mah Bethel Khrihfabu Budget tein an va pekchanh mi hna a si tiah kan theih. A tutan facang le hruk-aih bawmhchanhnak ah hin Upa Zoduata Hrahsel, Pu Biak Cung, Nungak Rebecca, Pi Siang Hnem Sung le Pu Ringa hna an va kal kho tiah kan theih.

Mizoram  Tuipuiral Group YMA le CNF cu April 22 ah khan tonbiaruahnak an ngei i, rithaisi dohnak rian hmun khat ah ṭuanṭi ding in hnatlaknak an ngei. Tuipuiral Group YMA le CNA nih hin Myanmar lei in Mizoram ah rithaisi a lut tawn mi khamnak ding ah rianṭuanṭi ding in hnatlaknak an ngeih kong aa hrawm in

cathanh an chuah.Tuipuiral YMA hi Champhai district huap chung an si I riithaisiia luh tamtuk ruang ah a tu bantuk in CNF he hmunkhat ah riantuan an I timh nak a si. CNF zong nih biatak tein Chinram chung riithaisii thianhhlimh aa zuam I hmailei zong ah a thianh chin chin lai tiah kan theih.