Lawmh um taktak: Mizoram BCM,Bethel Khrihfabu Nih Thantlang peng Salen Khua IDP Camp Um Indawng 143 Caah Facang tun hi zat bak an pekchanh hna
BCM,Bethel Khrihfabu Nih Salen Khua IDP Camp Um Indawng 143 Caaah Facang le Thildang An Hlut Hna April 24,2024 Aizawl hrambunh,BCM Bethel Khrihfabu nih Thantlang peng Salen khua IDP camp ah aa dor mi ralzam indawng 143 caah facang tun 143 leng ah thil dang tete pekchanhnak an ngei hna tiah kan theih. April 20 ah khan Bethel khrifabu lei in Salen khuan an phan i a zanlei ah ralzam dawng khat ah facang tun 1 cio in an phawt hna hnu ah Pi Siang Hem Sung in nu nih thlachiar hman mi bawm 170 a pek chanh hna.hrukaih zong tlawmpal an ken chih tiah kan theih. BCM Bethel khrihfabu nih hin eidin lei lawng si loin taksa le thlarau,lunghtin lei an thawn khawh nak hnga
ruahchannak he a tu bantuk rian an tuan hi a si i pumhnak le Pathianbia in thazaang laak tinak zong an ngei fawn. A luancia kum zong ah khan Bethel Khrihfabu hna nih Thantlang peng Bungkhua um IDP camp ah a tu bantuk tein bawmhnak an rak pek bal cang hna. A tutan bawmhnak an pek mi hna hi ramdang le he pehtlaihnak zei hmanh um lo tein an mah Bethel Khrihfabu Budget tein an va pekchanh mi hna a si tiah kan theih. A tutan facang le hruk-aih bawmhchanhnak ah hin Upa Zoduata Hrahsel, Pu Biak Cung, Nungak Rebecca, Pi Siang Hnem Sung le Pu Ringa hna an va kal kho tiah kan theih.
Mizoram Tuipuiral Group YMA le CNF cu April 22 ah khan tonbiaruahnak an ngei i, rithaisi dohnak rian hmun khat ah ṭuanṭi ding in hnatlaknak an ngei. Tuipuiral Group YMA le CNA nih hin Myanmar lei in Mizoram ah rithaisi a lut tawn mi khamnak ding ah rianṭuanṭi ding in hnatlaknak an ngeih kong aa hrawm in cathanh an chuah.Tuipuiral YMA hi
Champhai district huap chung an si I riithaisiia luh tamtuk ruang ah a tu bantuk in CNF he hmunkhat ah riantuan an I timh nak a si. CNF zong nih biatak tein Chinram chung riithaisii thianhhlimh aa zuam I hmailei zong ah a thianh chin chin lai tiah kan theih.
Kyindwe Khuapi Kahdohnak Kong Ah Chin Hriamtlai Phu Unau Nih Arakan Army(AA) Sin Ah Lawmhbia An Chim || 24 April 2024 Chinram, Kanpetlet peng, Kyindwe khuapi kahdohnak cu Rakhine ralkap AA bawmhnak le Chin hriamtlai phu unau Operation in kalpi a si i, Kyindwe khuapi kan laak hlan lo kahdoh kan ngol lai lo i hmainor in kahdohnak kan kalpi lai, cun a lam kip in bawmtu a si mi AA cung zong ah kan i lawm tuk hringhran, tiah Chin hriamtlai phu unau nih nizan April 23 ah an thanh. Chin hriamtlai phu unau nih
a kalpi mi Operation nih aa tinh mi bantukin Kyindwe khuapi kahdohnak ah SAC ralkap nih zeitluk hmanh in thazaang chap in vanlawng in kahdohnak tuah hmanh seh law hnu kan tolh hrimhrim lai lo, tiah Chin hriamtlai phu unau nih an thanh. Chin hriamtlai phu unau nih Kyindwe khuapi kan laak hlan lo fak deuh in kahdohnak an kalpi lai i khuapi laaknak ding ca ah a lam kip in a kan bawmtu AA cung ah a hlei in lawmh bia kan chim, tiah Chin hriamtlai phu unau nih cun an thanh. Kyindwe khuapi cu a liamcia 2023 December 22 ni in Chin hriamtlai phu
unau nih kah hram an rak thawk i a luancia April 20 ni tiang kahdohnak an kalpi ko nain SAC ralkap nih ralkap thazaang chap in vanlawng in kahdohnak an tuah ruang ah Kyindwe khuapi an laak khawh rih lo kong Chin hriamtlai phu unau nih mizapi sin ah theihternak an tuah. Chin hriamtlai phu unau ti mi cu Zomi Federal Union(ZFU), Chin National Organization(CNO), Chin National Council(Mindat), Maraland Territorial Council(MTC), Chin Defense Force – Kanpetlet(CDF-Kanpetlet) le Chinland Defense Force-Matupi(Brigade 1) i fonh in dirh mi phu a si.