Zualko; Tu zarh chung SAC Ralhrang he kahdohnak ah kan pasaltha minung 25 bak nih an kan thih taak ee

Moebe Kahdohnak ah Mizapi Ralkap 25 an Nunnak a Liam Cang. April 23 || Shan le Karenni ramri Moebe khua i SAC ralkap sakhaan laak kahdohnak ah mizapi ralkap bu fonh lei in minung 25 an nunnak a liam, tiah theih a si.  Moebe SAC ralkap sakhaan (422) cu mizapi ralkap hna nih zarh hnih chung an tuk cang i, mizapi ralkap lei in a nunnak a liam mi an tam pin ah

a ke a bul mi ralkap 15 hrawng zong an um, tiah mizapi ralkap ṭuanvo ngeitu pakhat nih a chim.  “Sakhaan chung ah SAC ralkap tam an taang ti lo nain ralkhamnak ṭha tuk in an i ser caah vun luh hnawh taktak ding ah a har ngaingai. Kan ralkap hliam tuar le a thi mi an tam nain dinh lo in kan nor thluahmah ko,” tiah a chim.  Hi sakhaan dohnak ah hin mizapi ralkap lei in a ke a bul mi ralkap pali zong an i tel i pehzul in ral an do cuahmah ve, tiah theih a si.

Vice Senior General Soe Win Mizapi Sin In A Tlaunak Ni 20 A Si Cang  23 April 2024 Hramhram in nawlngeihnak a latu SAC ralkap chung ah Vice Chairman a ṭuan mi Senior General Soe Win cu mizapi sin ah aa langh ti lonak nihin April 23 in ni 20 a si cang. Voi dang tawn bantukin thla fatin tuah tawn mi SAC tonbiaruahnak cu SAC Chairman le Vice Chairman hruainak in tuah a si tawn nain nizan April 22 zinglei ah tuah mi SAC tonbiaruahnak ah cun Vice Senior General Soe Win aa tel ti lo. Nizan April 22 zinglei ah tuah mi SAC tonbiaruahnak ah cun

Senoir General Min Aung Hlaing lawng nih a hruai hna i cinthlaknak, kokek puicimh, fimcawnnak le zaanglek kong ceihmainak an ngeih kong SAC Information nih an thanh. April 8-9 ah Mon ramkulh, Mawlamyine khuapi hrambunh nithlak thlanglei Division Headquaters(Yah-Tah-Khah) cu Drone in an rak kahdoh hnu in Vice Senior General Soe Win cu nihin tiang mizapi sin ah aa langh ti lo. Cu kahdohnak cu Alpha Bats Drone Force nih an kalpi mi a si i Vice Senior General Soe Win telh in Division Headquaters in

ralbawi cheukhat hliam an tuar kong April 9 ni ah Alpha Bats Drone Force nih an thanh. Ramkhel lei a thiam ngai mi U Thein Soe Naing nih cun, “Drone kahdohnak ah hliam a pu i cucaaah Soe Win cu mizapi sin ah a langh ti lonak a si,” tiah RFA a chim. SAC chimnak nawlngei Major General Zaw Min Tun nih cun, “Vice Senior General Soe Win cu voi dang kel in a rian a ṭuan ko,” tiah a luancia zarh chung ah Media sin ah a chim ve. Vice Senior General Soe Win kong he pehtlai in a luancia April 3 ni ah tuah mi Bahtoo khuapi i ralkap training an dih lawmhnak a kal cu SAC Information nih a donghnak bik an langhter a si.

SAC Ralkap Nih Zarh Hnih Chung Ah Kalay Peng Khua 5 Ah Inn 700 Leng An Khangh || 23 April 2024 Sagaing ramṭhen, Kalay peng chaklei khua 5 cu April zarh hnihnak thawk in SAC ralkap nih rallam sial in an khangh i zarh hnih chung ah inn 700 leng a kaang, tiah cuka khua a um mi nih an chim. A luancia April 8 ni in nihin April 23 tiang ah Pyinkhongyi khua inn 450 leng, Pyinkhonlay khua inn 200 hrawng, Hantharwaddy khua inn 13, Kanthar khua inn 31 le Yaukchokwin inn 50 hrawng cu SAC ralkap nih

an khangh, tiah an chim. “Nizan April 22 ni zong ah Kalay peng le Tedim peng ramri ah a um mi Mainuai khua cu SAC ralkap nih an khangh, Kalaymyo peng chaklei khua hna ah rallam sial in inn a khangtu SAC ralkap pawl cu nihin tiang Pyinkhongyi khua ah umhmun an khuar ko,” tiah tualchung pakhat nih a chim. Inn a kaang mi cazin a khawmtu Data For Myanmar nih April 15 tiang i cazin an khawmh mi ah SAC ralkap nih hramhram in nawlngeihnak an laak kum thum leng chung ah Myanmar ram hmun kip ah SAC ralkap nih inn 80,000 leng an khangh cang.

Malaysia Ram Helicopter I Pahsualnak Ruang Ah Minung 10 An Thi || 23 April 2024 Nihin April 23 zinglei ah Malaysia ti ralkap pawl military parade cawnnak an ngeih lio ah Helicopter pahnih cu an i pahsual i aa cit mi minung 10 an thi, tiah theih a si. “Hi accident hi nihin zinglei suimilam 9:32 ah a cang mi a si i, Helicopter aa cit mi minung 10 cu an dihlak in an thi dih, thil a cannak hmun hi Lumut ti ralkap base ah a si,” tiah Malaysia ti ralkap nih an chim. Social Media ah a lang mi video ning ah cun Helicopter cu a bu in an zuan lio ah pahnih cu an i pahsual caah vawlei ah an tla veve. Malaysia palik zong nih Social Media ah a chuak mi video cu a dik mi a si ko, tiah an fehter. “Malaysia ti ralkap nih

hi thil a cang mi kong chekhlatnak an tuah lio a si. A ralai mi April 27 ni ah tuah timh mi Malaysia ti ralkap kum 90 tlin camtuak lawmhnak ca ah tiin ti ralkap nih parade an ngeih ding mi cawnnak an ngeih lio ah a cangsual mi a si,” tiah Malaysia Defence Minister Mohamed Khaled Nordin zong nih a chim ve. Helicopter aa pah mi hna cu minung pasarih an i citnak HOM M503-3 le minung pathum an i citnak Fennec M502-6 an si i, a thi mi hna ruak cu ahodah an si ti fehter ding ah Lumut Military Hospital ah an kuat colh hna. “Hi accident ruangah nunnak a liam mi vialte nan ngaihchiatnak kan in hrawmpi hna i Malaysia ram mizapi kan ngaih a chia hringhran,” tiah Malaysia Prime Minister Anwar Ibrahim nih social media X ah a ṭial.

Chinland Cozah Upa Hna Cu Peng Cheukhat Ah Tlawnnak Le Mipi He Tonnak An Ngei II 22 April 2024 Chief Minister Pu Pa Thang hruai mi Chinland Cozah upa hna cu April 13-19 tiang Zophei, Lautu, Zotung le Senthang peng ah an tlawng i pengtlang uktu upa le mipi he tonnak an ngei kho tiah theih a si. Cu tonnak ah cun pengtlang uknak kong, cozah riantuannak ah a herh mi le Chinland Cozah konglam biaruahnak le fianternak an ngei hna. Chinland Cozah le pengtlang uknakbu karlak pehtlaihnak caah Federal phunglam he aa tlak mi pengtlang uknak phung ser in cu ning cun uknak kalpi a herhnak, Chin miphun nih kan ngeih bal lo mi kanmah uknak kongah kanmah tein

kan ser mi phunghram cu cu Chinland Cozah nih a ferter cang caah Chinland Cozah nih mipi he i bawm in Chinram le Chin miphun caah riantuan ding a si nak le Chinland Cozah a thawn khawh nakding ah mipi nih kan si khawhnak lam cio in dirkamh a herhnak kong cu Chief Minister Pu Pa Thang nih mipi sin ah sawmnak le fianternak a tuah hna. Tutan khualtlawnnak ah hin Minister of Humanitarian Affairs and Rehabilitation, Minister of Home Affairs le Minister of Construction hna zong an i tel ve tiah Chinland Cozah nih an thanh.