CDF Hakha thawngpangthar: CDF Hakha nih Hakha peng chung mizapi nih theih hrimhrim thawngthanhnak an tuah colh

Hakha Peng Chung Thing Hau le Meihol Rawh Duh ahcun Sok Hmasa Ding April 22 || Hakha peng (Zokhua peng, Mie peng le Hakha khuachung) thingkung hau, tihthing laak le meiholh rawh kong he pehtlai in Vawlei le Thingram lei zung i ṭuanvo ngeitu hna sin ah sok hmasa a si lai, tiah CDF-Hakha Central Council nih nihin April 22 ah theihternak a tuah.  Pumpak hman awk, biaknak lei hman awk le mizapi hman awk ah thing hau, tihthing laak le meiholh rawh a duh mi hna nih ahlanken ni 5 in ṭuanvo ngeitu hna sin ah

sok a hau, tiah an langhter.  Cun, Hakha peng chung in hmun dang/peng dang ah thing le meiholh phorh duh ahcun Vawlei le Thingram lei zung i ṭuanvo ngeitu hna sin ah ahlanken ni 4 in sok hmasa ding, tiah an langhter chap.  Nawl onhnak catlap ngei lo le phungning lo in a cunglei rian a ṭuan mi hna cu upadi ning in dantat nan si lai, tiah theihternak an tuah.

Breaking News; CDF Mindat Tatzin 2 minung hi zat bak CNF/CNA ah an hung i fonh tthan hoi ee  Thawngpangttha taktak kan theih tthan hoi. CDF Mindat chungtel Tatzin 2 cheukhat hna cu Mindat peng chung ah AA nih an duh poh in hmun an khuar le an cawlcangh mi cu a celh bak ti lo ruang ah an chuak i kan hnu zarh ah khan CNF CNA ah an rak i tthial ttthan tiah theih a si. CNF lei zong nih lunglawm tein an rak don hna i,

atutan a rak i tthial mi hna cu CDF Mindat TATZIN 2  minung 20 hrawng  an si tiah Salai Aik Thang Hwan nih a  a chim. CDF Mindat hi a hlan ah minung 100 renglo CNA ah an rak i tthial cang i atutan he fonh cun meithal a tlai kho he a tlai kho lo kum upa he cun CNA chung ah CDF Mindat a rak i tthial mi hi inung 150 hrawng an si cang lai ti zong a chim chap.

Myawaddy lei a Panh mi SAC Ralkap Tank le Motor pawl Karen Hriamtlai nih an Hrawh Khawh Hna. April 22 || Karen ramkulh, Myawaddy lei ah bawmh ding in a kal mi SAC ralkap Tank (Armoured vehicle) le Machine Gun an tarh mi motor pawl cu Daw-Nah tlang hram ah Karen hriamtlai KNLA le PDF nih nizaan April 21 ah an hrawhpiak khawh hna, tiah theih a si.

Thailand-Myanmar ramri Myawaddy khua i a donghnak bik SAC ralkap sakhaan (Kha La Ya 275) cu Karen hriamtlai nih an rak laak i Kha La Ya 275 ah a um mi SAC ralkap pawl cu Thailand-Myanmar ramri hlei pawng ah an zaam hna.  Nizaan ah an hrawh mi SAC tank le motor pawl hi ramri hlei ah a um mi SAC ralkap pawl bawmh ding in a kal mi an si, tiah an chim. Bawmh ding in a kal mi SAC ralkap pawl cu Daw-Nah tlang hram ah KNLA le PDF nih an kah hna i SAC raldohnak tank pakhat le Machin Gun an tarh chih mi motor paruk an hrawhpiak khawh hna, tiah theih a si.

Kawkareik Peng Kahdohnak Ah Albino Tiger Company -1 In Ralkap Pali Nunnak Liam. Vaupi [ April ] 21, 2024 Kayin ramkulh, Kawkareih peng kahdohnak ah tualchung hriamtlaiphu chung in ralkap pali nunnak a liam tiah Albino Tiger Compay-1 nih cathanh an chuah. April 19 kahdohnak ah ralkap San Tun, April 20 ah ralkap Achawgyi le ralkap Pagyisaya, April 21 ah ralkap Zin Min Aung cu hramhram uknak a laatu SAC an dohnak ah an nunnak a liam tiah an langhter. Myawaddy khuapi cu tualchung hriamtlaiphu nih an laak hnu ah SAC lei nih cunglei he tanglei he rallam fak piin an sial i nihin ni tiang kahdohnak a fak tiah theih a si. Nizan April 20 Myawaddy kahdohnak zong ah Blak Panther Column in Ṭetsuhhmu Nay Min Khanh zong a nunnak a liam tiah theih a si.

Khampat Le Sawbuayishin Khua Ah SAC Nih Bombthlak Ruang Ah Minung Panga Nunnak Liam, 10 Leng Hliamtuar Vaupi [ April ] 22, 2024_ Sagaing ramṭhen, Ṭamu peng Khampat khuapi le Sawbuayishin khua cu tualchung hriamtlai phu nih an laak hnu April 22 zinglei sml 2:00 hrawng ah SAC nih raltuknak vanlawng in bomb a thlak caah tualchung minung panga nunnak a liam i, 12 nih hliam an tuar tiah kan theih. Nunnak a liammi hna hi Khampat khua in Pastor pa fapa telh in pahnih, Sawbuayishin khua in

pathum an si, nunnak a liam mi nu pakhat hi a ruak zong laakawk tha loin a man dih, hliamtuar mi chung zong in a zualmi an um hna tiah theih a si. Khampat khua hi 2023 kumdih lai ah tualchung hriamtlaiphu nih an rak laak mi khua a si. A luancia January thla hram lio zong ah Khampat khua le Kanaan khua Sianginn, Biakinn le inn cu zerhpi ni pumh lio pi ah SAC nih raltuknak vanlawng in bomb a rak thlak i minung 17 nunnak a rak liam cang.