Thawngpangthar: Kan pasaltha hna nih SAC Ralhrang Tank pakhat le hriamnam tampi an laak, ralhrang hi zat an thi

Myawaddy lei a Panh mi SAC Ralkap Tank le Motor pawl Karen Hriamtlai nih an Hrawh Khawh Hna. April 22 || Karen ramkulh, Myawaddy lei ah bawmh ding in a kal mi SAC ralkap Tank (Armoured vehicle) le Machine Gun an tarh mi motor pawl cu Daw-Nah tlang hram ah Karen hriamtlai KNLA le PDF nih nizaan April 21 ah an hrawhpiak khawh hna, tiah theih a si. Thailand-Myanmar ramri Myawaddy khua i a donghnak bik SAC ralkap sakhaan (Kha La Ya 275) cu Karen hriamtlai nih an rak laak i Kha La Ya 275 ah

a um mi SAC ralkap pawl cu Thailand-Myanmar ramri hlei pawng ah an zaam hna.  Nizaan ah an hrawh mi SAC tank le motor pawl hi ramri hlei ah a um mi SAC ralkap pawl bawmh ding in a kal mi an si, tiah an chim. Bawmh ding in a kal mi SAC ralkap pawl cu Daw-Nah tlang hram ah KNLA le PDF nih an kah hna i SAC raldohnak tank pakhat le Machin Gun an tarh chih mi motor paruk an hrawhpiak khawh hna, tiah theih a si.

Kawkareik Peng Kahdohnak Ah Albino Tiger Company -1 In Ralkap Pali Nunnak Liam. Vaupi [ April ] 21, 2024 Kayin ramkulh, Kawkareih peng kahdohnak ah tualchung hriamtlaiphu chung in ralkap pali nunnak a liam tiah Albino Tiger Compay-1 nih cathanh an chuah. April 19 kahdohnak ah ralkap San Tun, April 20 ah ralkap Achawgyi le ralkap Pagyisaya, April 21 ah

ralkap Zin Min Aung cu hramhram uknak a laatu SAC an dohnak ah an nunnak a liam tiah an langhter. Myawaddy khuapi cu tualchung hriamtlaiphu nih an laak hnu ah SAC lei nih cunglei he tanglei he rallam fak piin an sial i nihin ni tiang kahdohnak a fak tiah theih a si. Nizan April 20 Myawaddy kahdohnak zong ah Blak Panther Column in Ṭetsuhhmu Nay Min Khanh zong a nunnak a liam tiah theih a si.

Khampat Le Sawbuayishin Khua Ah SAC Nih Bombthlak Ruang Ah Minung Panga Nunnak Liam, 10 Leng Hliamtuar Vaupi [ April ] 22, 2024_ Sagaing ramṭhen, Ṭamu peng Khampat khuapi le Sawbuayishin khua cu tualchung hriamtlai phu nih an laak hnu April 22 zinglei sml 2:00 hrawng ah SAC nih raltuknak vanlawng in bomb a thlak caah tualchung minung panga nunnak a liam i, 12 nih hliam an tuar tiah kan theih. Nunnak a liammi hna hi Khampat khua in Pastor pa fapa telh in pahnih, Sawbuayishin khua in

pathum an si, nunnak a liam mi nu pakhat hi a ruak zong laakawk tha loin a man dih, hliamtuar mi chung zong in a zualmi an um hna tiah theih a si. Khampat khua hi 2023 kumdih lai ah tualchung hriamtlaiphu nih an rak laak mi khua a si. A luancia January thla hram lio zong ah Khampat khua le Kanaan khua Sianginn, Biakinn le inn cu zerhpi ni pumh lio pi ah SAC nih raltuknak vanlawng in bomb a rak thlak i minung 17 nunnak a rak liam cang.

Hakha Khuathar Ah June 20 Tiang Dawr Khar Dingin Le Biakinn Ah Minung 5 Cung I Pumh Lo Ding Tiah SAC Nih Nawl Chuah April 22,2024 Hakha um SAC ralhraang hna nih Hakha khuathar um dawr hna cu June 20 tiang khar dingin le Biakinn hna zong ah minung 5 nak tam i pumhkhawmh lo ding tiah nihin April 22 ah an thanh. Aluan cia April 12 lio ah khan SAC rian khinh mi minister hna an i cit mi motor cu CDF-Hakha nih an rak kah hna i Minister 2 telh in minung 6 tluk hliam an rak tuar i minister pakhat hna cu a hliam a faak ngai tiah theih a si. Cu tin SAC VIP pawl motor kah an ton caah a tu bantuk in dawr khar le mi i but lo ding in nawl an chuah hi a si i nawl chuah thar mi a um hlan June 20 tiang in nawl a buar mi cu dantat an si lai kong SAC nih cun an langhter chih.

Yedashe Peng Ah Kahdonak A Chuak I Ralhraang 50 Tluk An Thi,Dothlennak Ralkap 4 Nunnak Liam Ve April 21,2024 Bago ramthen,Yedashe peng,Suayuamahgyi khuate pawng ah SAC ralhraang le dothlennak ralkap hna karlak ah kahdohnak voi 2 a chuak i SAC lei minung 50 tluk an thi i dothlennak ralkap lei 4 nunnak liam ve tiah theih a si. April 17 zinglei slm 5:45 tluk ah Yehdashe peng Myaung-To khua in Suayuamahgyi khua lei panh in akai mi SAC ralhraang thazaang 150 tluk cu

dothlennak ralkap ttangti phu hna nih an kah hna caah zanlei slm 3 tiah kahdohnak voi khat a chuak,cu hnu ah zanlei slm 6 le 7 kar ah kahdohnak voi 1 a chuak than tiah theih a si. A voikhat nak kahdohnak ah hin SAC ralhraang 30 leng an thi i hliam tuar zong an tam ngai ngai,SAC a thi mi le hliam tuar mi hna cu Motor lian mi in an phurh hna,a voihnih nak kahdohnak zong ah hin SAC ralhraang tam ngai an thi than i cu ni kahdohnak ah SAC ralhraang a thi mi hi 50 tluk an si tiah theih a si.