Thawngpangthar: Tuchun kan pasaltha hna he kahdohnak ah SAC Ralhrang minung hi zat bak an thi

Yedashe Peng Ah Kahdonak A Chuak I Ralhraang 50 Tluk An Thi,Dothlennak Ralkap 4 Nunnak Liam Ve April 21,2024 Bago ramthen,Yedashe peng,Suayuamahgyi khuate pawng ah SAC ralhraang le dothlennak ralkap hna karlak ah kahdohnak voi 2 a chuak i SAC lei minung 50 tluk an thi i dothlennak ralkap lei 4 nunnak liam ve tiah theih a si. April 17 zinglei slm 5:45 tluk ah Yehdashe peng Myaung-To khua in Suayuamahgyi khua lei panh in akai mi SAC ralhraang thazaang 150 tluk cu

dothlennak ralkap ttangti phu hna nih an kah hna caah zanlei slm 3 tiah kahdohnak voi khat a chuak,cu hnu ah zanlei slm 6 le 7 kar ah kahdohnak voi 1 a chuak than tiah theih a si. A voikhat nak kahdohnak ah hin SAC ralhraang 30 leng an thi i hliam tuar zong an tam ngai ngai,SAC a thi mi le hliam tuar mi hna cu Motor lian mi in an phurh hna,a voihnih nak kahdohnak zong ah hin SAC ralhraang tam ngai an thi than i cu ni kahdohnak ah SAC ralhraang a thi mi hi 50 tluk an si tiah theih a si.

Karen ramkulh,Myawaddy peng chung ah tualchungmi ral a zaam mi motor pakhat kah a ton caah nungak no tete pakhat nunnak a liam i hringtu an nu le an pa hliam an tuar tiah theih a si. Nizan April 20 zinglei sang ah khan No.2 Thailand-Myanmar hawikomhnak hlei lei ah kahdohnak a fah tuk caah tualchungmi hna cu ralzam/ralhrial dingin tlik zam cio a si,cu lio ah motor pakhat cu cak ngai in a hung tli ve i cu lio ah kah a ton caah a cung cuang nungak no 2 an thih hi a si. “No.2 hlei lei ah kahdohnak a fah tuk caah U Kyaw Swa te chung ralhrial dingin an motor in an rak tli,cu ah cun kah an ton hi a si,a kap tu hi zei phu dah an si a fiang rih lo.a thi mi hi U Kyaw Swa i a monu le

a fanu hniang hna an si.an mah nupa cu hliam an tuar i Mesout sizung ah an chiah hna” tiah Myawaddy khuami pakhat nih a chim. SAC ralhraang nih hin Jet Fighter le Y12 raltuknak vanlawng hna hmangin nizan April 20 in tuzing April 21 zinglei tiang pehtlai in kahdohnak a tuah caah tualchungmi a thi le aa hliam an tam ngai fawn. “tualchungmi umnak lei ah bomb a thlak tuk caah a thi le aa hliam zong an tam ngai te, a ho hmanh bomb thlak nak lei ah kal ngam a si lo i a thi le hliam zat hi fiang in kan thei kho rih lo” tiah khuami pakhat nih a chim ve.

Kalaymyo Chaklei Ah SAC Nih Pehtlai In Ralhmai A Nor Cuahmah I Zapi Inn Zong An Khangh Cuahmah. April 21,2024 Kalaymyo in chaklei Mainuai khuate lei panh in SAC nih ralhmai a nor cuahmah i khuachung zapi inn pawl zong mei in an khangh tiah theih a si. April 21 zinglei slm 6 tluk khan Yaut-Chu-kun (ယောက်ချိုကွင်း) ah um mi SAC ralhraang hna cu Mainuai khua lei panh in ralhmai an nor i khuami inn mei in an khangh leng ah Pyidawtha khua zong Drone in bomb an thlak caah

tualchungmi hliam tuar zong an um len tiah theih a si. “Mainuai khua an luh hlan ah Drone in bomb an thlak hmasa,khua chung an luh sinin khuami inn hna cu mei in khangh hram an thok colh,drone in bomb an thlak mi chung zong ah hin mei bomb an i tel” tiah khuami pakhat nih Zalen ah a chim. A luancia April 5 thok khan SAC ralhraang nih Kalaymyo chaklei See-Kyi khua lei ah ralhmai nor an rak i thok i an phaak nak khua poah i zapi inn 600 leng an khangh cang. Cu tin SAC nih ralhmai an nor lengmang caah Kalaymyo chaklei khuami minung 30,000 leng cu ralzam dirhmun an phan tiah theih a si.

Kanpetlet Peng Ah SAC Nih Vanlei In Bomb A Thlak Caah Tualchungmi 3 Hliam Tuar April 19,2024 Chin ramkulh,Kanpetlet peng ah SAC nih vanlei in bomb a thlak caah ngakchia telh in tualchungmi 3 hliam an tuar tiah theih a si. April 17 ah khan SAC ralhraang nih Kanpetlet peng chung khuate 3 ah pounds 500 a rit mi bomb hna telh vanlei in bomb a thlak lawng si loin,

Machine gun hmangin a kah chih hna. “Chun slm 2 tluk ah Ung khua ah kahdohnak a chuak,kahdohnak a dih bak in vanlei in kahdohnak a rak tuah,bomb a thlak lawng si loin machine gun (Seh meithal) zong in a kah chih caah tualchungmi 3 hliam an tuar.khuami hna hi a hlaankan tein an hrial chung caah khawnden a tlawm,inn cheukhat zong an rawk” tiah Kanpetlet khuami pakhat nih a chim.