A poi tuk ee: Thantlang peng Bungkhua ah thil a canng mi kong kan theihmi cu a poi tuk ee
Zahan Zan Thilchia Nih Bungkhua Ralzam Inn Tlawmpal A Hrawh || 19 April 2024 Nizan April 18, zan suimilam 8 hrawng i a hrang mi thlichia nih Thantlang peng Bungkhua ralzam inn 3 a hrawh, tiah Bungkhua Khuabawi secretary Pu Zo Nun Sang nih The Chin Post ah a chim. A luancia March 31 zong ah khan thlichia nih ralzam inn 5 a rak hrawh cang nain pehtlaihnak lei a ṭhat lo caah thawng an kan thanh kho lo. Zahan zan a rawk mi inn 3 lakah inn khat cu umnak tlak loin a rawk a rawk dih i, a dang pahnih cu a vaam le a cungcih tlawmpal a hawh mi an si hna. Nihin ah inn a rawk mi pawl cu an remh piak hna lai kong Pu Zo Nun Sang nih a chim. Bungkhua ralzam camp ah
hin inn 146 an um i, a milu in minung 550 hrawng an um. Ralzam hi an tam tikah Bungkhua nih lo tuahnak hmunhma ram an pek khawh hna lo caah eikawlnak ah an harsa i, atulio cu CBCUSA in IDPs bawmhnak an pek tawn mi hna lawng an i rinh caah a har ngai ko. Cupinah ṭhal a vun chuah hnu cun dinti kong zong ah an har ngai kong Khuabawi secretary nih cun a chimchap. Bungkhua hi Thantlang peng, Zahnak tlang, Mizoram ramri naih ah a um mi a si i inn 136, milu 546 hrawng an umnak khua a si. Thantlang peng ah ralzam an tam biknak khua pakhat a si.
SAC ralkap nih Hpakant peng, Loi Hseng camp an zaam taak; KIA nih motor pahnih phor kuanzen an laak April 18 || Kachin ramkulh, Hpakant peng ah SAC ralkap nih an zaam taak mi Loi Hseng khuate SAC camp cu KIA nih rallam sial in an va kal hnawh i hriam ngan kuanzen tampi an laak tiah theih a si. Loi Hseng khua Tower bo SAC camp cu April 17 zinglei ah SAC ralkap nih an zaam taak i Kamine Byuha Sakhan ah an i fon. Hriamnam dihlak in an i kalpi nain kuanzen tampi an kal taak. KIA nih rallam an va sial tik ah
kuanzen tampi an laak tiah ramchung media ngan hna nih an tial.”Hriamnam cu a um lo. Kuanzen tampi kan laak. Hriam ngan kuan a phunphun motor pahnih phor kan laak,” tiah KIA thawnghram nih a chim. Hpakant peng chung SAC ralkap camp tampi cu KIA nih an laak khawh cang hna i, a taang mi pawl zong laak ding in an i zuam cuahmah tiah theih a si. Hmanthlak: KIA ralkap cheukhat hmanthlak hlun a si.
Passport A Rak I Tuah Mi CDM Rianṭuantu Paoh Tlaih Ding In SAC Nih Nawl Chuah || 19 April 2024 Hramhram in nawlngeihnak a latu SAC ralkap uknak ṭha lo dohkalh in a cawlcang mi CDM rianṭuantu pawl cu ramleng kalnak vanlawng Ticket pek lo ding le Passport an i tuah tikah tlaih ding in SAC nih nawl an chuah, tiah Myanmar ram chung siangcachim phu in ṭuanvo ngei Ko Kyaw Way Phyo nih nihin April 19 ah RFA a chimh. “A luancia March 26 ni ah Yangon Airport ah ramleng kal aa tim mi CMD rianṭuantu pahnih tlaih an ton hnu in
CDM rianṭuantu cung ah fak deuh in cawlcangh an i timh caah atu bantukin SAC nih nawl an chuahnak a si,” tiah Ko Kyaw Way Phyo nih cun a chim. “CDM rianṭuantu pawl hi ram chung ah an him ti lo caah ramleng ah phungning tein a lut mi le phunning lo in a lam kip in a lut cang mi tampi an um cang, atu bantukin ramleng chuah aa tim mi CDM rianṭuantu pawl cu a hlan ah SAC ralkap nih an rak tlaih bal cang hna, ka theihhngal mi pahnih zong ramleng chuah an i timh caah an rak tlaih hna i
nihin tiang an thawng kan thei kho ti hna lo,” tiah CDM tuah mi fimcawnnak zung rianṭuan pakhat nih a chim ve. Ministry kip nih CDM a tuah mi rianṭuantu an konglam cu April 18 ni tiang ah laak dih ding le ramleng kalnak vanlawng Ticket an cawk tik le Passport an i tuah tikah tlaih ding in SAC nih March 30 ni ah nawl an chuah, tiah CDM tuah mi nih an chim. NUG sin cazin an pek mi ning ah hramhram in nawlngeihnak a latu SAC ralkap uknak ṭha lo duhlonak langhter in CDM a tuah mi vialte hi sing 4 leng an si.