Thawngpangthar: Mizoram CYMA nih Mizoram Laimi ralzam hna theih hrimhrim ding cathanh an chuah colh

CYMA Nih An Hmunram Chung I Chin Hrinsor Ralzaam Nih Zulhding Phung 8 Chuah. 2024 Vuapi 18: Central Young Mizo Association nih cun an ramchung i Chin hrinsor ralzaam hna nih zulh dingmi le theih dingmi phung 8 cu 2024 Vaupi 18 ah an thanh. Cu an thanhmi cu a tanglei bantuk hna hi an si. 1. Mizo ramchung ah Myanmar, Bangladesh le Manipur Chin hrinfa unau nunhimnak kawl in a rak lutmi hna nih Mizoram an um chung ah ram phung le khuatlang lairelnak an zulh ding a si. Ram le khuatlang duh lo ning in an um ding a si lo. 2. Ralzaam hna hi cozah le khuatlang duhlo chawlehnak le rithasii he

an i pehtlaih ding a si lo. Khuaram caah tha te’n khuasak ding. 3. Ralzaam hna nih cozah theihpinak le siannak tello cun ram le inn an ngeih khawh lo caah , hi bantukin ram le inn ngeih aa timmi an um ah cun YMA nih theihpinak ca a țial piak kho hna lai lo. 4. Inn le dawr hlaan kongkau ah mi nih hlaan lio mi nak man tam deuh in hlaan lo ding. 5. Myanmar le Bangladesh in ralzaam a rak lutmi hna hi India ram misa an si lo caah , India khuaram mi lawng nih ngeih khawhmi – Voter ID, Aadhaar Card, Birth Certificate, Tribal Certificate , Residential Certificate, Driving License, Vehicle Registration etc. ngeih timh in

hmalak an timh ding a si lo. 6. Phung nih a onh lo mi chawlehnak le rithaisii dohnak ah a si khawhchung in cozah le khuatlang an țuanpi ding a si. 7. Ralzaam hna hi ralzaam an si bantukin an duhnak hmun paoh ah i țhialkam lo dingin , an umnak hmunte ah um peng dingin duhpiak an si. 8. Branch/Group le Sub Headquarters YMA hna nih mahle ramchung cio ah ralzaam dirhmun kherhlai in , zohthlir dingin ruahchan a si. Kan unau hna an si bantukin bawmhchanh an hauh ah cun bawmhchanh ding an si, tiah Center Young Mizo Association nih cathanh an chuah.

Chin ramkulh,Paletwa peng chung ah Rakhine ralkap AA theihpinak catlap he lawng khual tlawn khawh a si i cu catlap laak nak ah Kyats-1000 liam a hau tiah theih a si. Paletwa peng chung in hmundang kal duh ah siseh,Hmundang in Paletwa peng chung luh duh ah siseh AA nih theihpi nak catlap he lawng luchuah khawh a  si i cu catlap a ngei lo mi cu AA chekgate in khirh an si tawn tiah kan theih. Cu theipi nak catlap cu AA lei nih rian khinh mi khuabawi (အုပ်ချုပ်ရေးမှူး) sin ah

laak a si.a luan cia caan zong ah AA khinh mi khuabawi phu hna nih zei chim ta loin Paletwa khuami ngeihchia cazin an laak tiah theih a si. Paletwa peng chung ah hin zalong tein khualtlawn le umkal khawh peng a si tawn nain AA le SAC kar kahdohnak a um hnu ah khuate pakhat le khat kar i tlawn duh zong ah theihpi nak catlap theng te a herh peng mi cu khuami caah a har i lungthin a nuam lo ngai tiah  kan theih.

Peter Biak Țha Cung A Donghnak Ruak Thlahnak A Tuah Cang. Vaupi [ April ] 17, 2024_  Malaysia ram a ummi Chin ramkulh, Hakha peng, Malsawm khuami kumtling lo ngakchia Peter Biak Țha Cung cu a luancia April 14 (Zarhpi Ni) ah Hrang Tling Thang (Hmaikhah khua) nih a rak thah. Peter Biak Țha Cung ruakvuinak cu nihin April 17 zaanlei suimilam 3:00 (Malaysia caan) ah dawtu hna he Malaysia ram ah tlamtling tein an tuah cang tiah kan theih. “Peter hi a ngakchiat tein duhnung chimhngai le mi nunnem te a si, hringtu a nu le a upa he khua an sa, an umnak innkhan a lawng mi ah

lainawng Hrang Tling Thang cu um ter ding in a hawipa nih Peter anu cu ka kawi hi mi felfai le zuding lo, a holh zong a tam lo mitha le midai te a si tiah a chimh piak ruang ah a hlanhmi a si, zei huatnak le i theihthiam lo nak zong pakhat hmanh an ngei lo, an inn a umnak zong thlakhat hmanh a tling rih lo “tiah naihniam nih CCN ah an chim. Peter a nu hi rianțuannak ah a kal i lainawng pa le Peter le a upa lawng inn an um lio ah a thah hi a si, lainawng pa hi a zaam lai ah

a upa cu Peter hi aa hngilhnak a sau ngai cang rak hlau te a ti, caan tlawmpal a rauh ah a upa nih a va zoh ahcun Peter cu puan aa rak thawnh i a lu cu chantling aa nanhmi cu a va hmuh, Peter tho law tiah a hlauh len cu aa hlau ti lo, a nu cu phone chawnh khawh a si lo caah, chungkhat an Ni cu ka Ni keimah lawng ka um ngam lo tiah a chawnh, a Ni nih Peter tah a ti i, Peter a tho bal ti lo tiah a leh, hlau law a ti i ka hlauh zong ah a tho lo, a thaw a dih cang rua, tiah a leh. A ni cu rian rang ngai in Peter te inn ah cun a va kal i,

tlawmpal ah innpa chakthlang nih kan chuahhnawh hna, tiah a chim chap. Lainawng Hrang Tling Thang cu Laimi inn pakhat ah a kal i keimah nih ka thah mi a si lo hi kaa ka rat hi ka phuan piak hlah uh a ti hna. Inn ngeitu nih amah hi a si ko lai tiah ṭuanvo ngeitu cu an chawnh hna i April 15 zaan ah an tlaih khawh. Lainawng pa hi a sianginn kai ṭi hawi le amah a theihngal mi hna nih hi pa hi misual taktak a si a ziaza a tha lo, ṭih a nung tuk mi a si tiah CCN ah an chim. Atu hi tuanvo ngeitu hna kutchung ah a um cang i zeibantuk dantatnak le biakhiah nak an tuah piak te lai ti cu theih a si rih lo.