Thawngpangthar: Tuchun ah SAC Ralhrang Min Aung Hliang nih Thongtla minung hi zat a chuah hna

Thongtla 3300 leng luatnak ka pek hna tiah SAC nih a thanh. April 17 || Thongtla 3303 luatnak ka pek hna tiah nihin April 17, Kawl kum thar ni ah SAC nih a thanh. Myamar ram thonginn kip ah thong a tla lio mi thongtla nu le pa 3303 cu kum thar lawmhnak le rammi lunglawmh nakding ah luatnak ka pek hna tiah an langhter. Hi hnu sualnak an tuah than ahcun hremnak an in ding mi le atu a taang mi thong tlak ding zat fonh in

hremnak an in lai, ti mi rikhiah he luatnak pek an si, tiah SAC thawngthanhnak ah an langhter. Thongtla 3300 leng lawng siloin Myanmar ram chung ah thong a tla lio mi ramdang mi pariat zong luatnak pek hnu ah ram chung in thawl an si tiah SAC nih nihin April 17 ah a thanh.  Ralkap nih nawlngeinak hramhram in an laak hnu kum 3 chung ah ram lenglei hneeknak a zor nakding ah thongtla voi tampi a chuah hna nain ramkheel thongtla tlawmte lawng an i tel tiah theih a si.

Hakha khua, Rungtlang SAC ralkap pathum nih hriamnam he CDM an tuah. April 17 || Hakha khua, Rungtlang um SAC ralkap pathum nih nihin April 17 ah hriamnam kuanzen he CDF-Hakha sin ah CDM an tuah tiah theih a si. “Hramhram in uknak a la mi SAC ralkap rianṭuannak ka duh lo, Mipi dohthlennak (Pau Dohthlennak) ah ka tel ve lai tiah hriamnam he Chinland Defense Force – Hakha sinah CDM an tuah” tiah CDF-Hakha nih

a thanh.  CDM a tuah mi SAC ralkap pathum nih cun MA1 meithal zun hnih, MA2 meithal zun khat, F1 grenade 18 le MA zenthong 1,000 an rak i ken tiah an langhter.  “Hi bantukin Chinland Defense Force-Hakha sinah CDM in dohthlennak a tuah mi cu lunglawm tein kan cohlan hna i phaisa sing 50 cio kan pek hna lengah himnak hmun an phak tiang ṭuanvo kan laak,” ti zong thawngthanhnak ah an langhterchih.

LUNGLAWMHNAK THAWNG. USA ram a ummi Amarillo, TX um (Pu Tluang Hnin -Loklung)Family nih , CNF/A ei din awk ca’h Dollar’s $ 7,200 ( thongsarih le zahnih cu US- Regional Committee sin ah pekchanhnak an tuah miphun nan dawtnak thinlung he chawva nan pekmi kan hmuh upat hmaizahnak kan in pek hna nan riantuan nak Bawipa nih thluachuah in pe ko hna seh. CNF CNA caah biatak tein phaisa chawva he thazaang chuah chin lengmang hna usih.

Tedim Khuapi Chung Kahdohnak Kalpi Timh Kong Ah PDF-Zoland Nih CNA Ralrin An Pek || 17 April 2024 Chinram, Tedim khuapi ah CNF(CNA) nih kahdohnak kalpi an timh ti mi thawng cu ZFU(PDF Zoland) nih an theih caah “Kanmah nawl lo in kahdohnak nan tuah kho lo” tiah ZFU(PDF-Zoland) nih CNF(CNA) cu ralrin an pek hna. PDF-Zoland nih Tedim khuapi laaknak ding ca ah zatuak 90 timhlamhnak kan ngei i kahdohnak kan kalpi tikah a herh a si ahcun ṭangṭi ding in a hlankan in kan in theihter te ko hna lai, a hlankan in kanmah theihpinak le ceihmaipinak um lo in

Tedim khuapi chung ah luhchuah le cawlcanghnak a um ahcun i timh lo ning in i kahnak a chuak kho mi a si caah PDF-Zoland nih cu bantuk cawlcanghnak cu kan kham, tiah an thanh. Cu pin ah kanmah hmunram chung ah zeirel lo in ramri lonh in kahdohnak an kalpi ah cun mizapi nih an duh hrimhrim lai lo i PDF-Zoland zong nih

kan cohlang lai lo. Mizapi duhnak he aa kalh mi tuahsernak cu dohthlennak nih aa tinh mi muru a khen lo pin ah miphun kar ah buainak mei kau bantuk a si caah tualchung hriamtlai phu i kap lo ding in le a herh lo mi buainak a chuah lo nakhnga Tedim khuapi chung ah kahdohnak kalpi lo ding a si, tiah PDF-Zoland nih CNA cu ralrin an pek.

SAC Ralkap Nih Kalay Peng Pyinkhongyi Khua A Ningpi Ti Tluk In An Khangh || 17 April 2024 Sagaing ramṭhen, Kalay peng chaklei, Chin miphun Falam pengmi an tamnak, inn 300 hrawng a umnak Pyinkhongyi khua cu SAC ralkap pawl nih an khangh i Biakinn 5 zong a kaang, tiah theih a si. Pyinkhongyi khua cu SAC ralkap nih a luancia April 12 ni ah an khangh chap caah inn a zate ti tluk in a kaang i SAC ralkap nih khua mi

hna an thil mansung zong an fir, tiah tualchung mi nih an chim. RFA nih an khawmh mi cazin ning ah a luancia February 21 in April 7 tiang Kalaymyo ah SAC ralkap hriamngan le hriamhme ruang ah tualchung mi 60 hrawng an nunnak a liam cang. SAC ralkap nih hramhram in nawlngeihnak an laak hnu in Myanmar ram hmun kip ah SAC ralkap nih inn 80,000 leng an khangh cang, tiah innkang cazin khawmtu Data For Myanmar nih April 15 ni ah an thanh.