Breaking News: PDF Zoland nih CNF/CNA cu Tedim khuapi chung kah lo ding in ralrinnak a pek colh

Tedim Khuapi Chung Kahdohnak Kalpi Timh Kong Ah PDF-Zoland Nih CNA Ralrin An Pek || 17 April 2024 Chinram, Tedim khuapi ah CNF(CNA) nih kahdohnak kalpi an timh ti mi thawng cu ZFU(PDF Zoland) nih an theih caah “Kanmah nawl lo in kahdohnak nan tuah kho lo” tiah ZFU(PDF-Zoland) nih CNF(CNA) cu ralrin an pek hna. PDF-Zoland nih Tedim khuapi laaknak ding ca ah zatuak 90 timhlamhnak kan ngei i kahdohnak kan kalpi tikah

a herh a si ahcun ṭangṭi ding in a hlankan in kan in theihter te ko hna lai, a hlankan in kanmah theihpinak le ceihmaipinak um lo in Tedim khuapi chung ah luhchuah le cawlcanghnak a um ahcun i timh lo ning in i kahnak a chuak kho mi a si caah PDF-Zoland nih cu bantuk cawlcanghnak cu kan kham, tiah an thanh. Cu pin ah kanmah hmunram chung ah zeirel lo in ramri lonh in kahdohnak an kalpi ah cun mizapi nih an duh hrimhrim lai lo i

PDF-Zoland zong nih kan cohlang lai lo. Mizapi duhnak he aa kalh mi tuahsernak cu dohthlennak nih aa tinh mi muru a khen lo pin ah miphun kar ah buainak mei kau bantuk a si caah tualchung hriamtlai phu i kap lo ding in le a herh lo mi buainak a chuah lo nakhnga Tedim khuapi chung ah kahdohnak kalpi lo ding a si, tiah PDF-Zoland nih CNA cu ralrin an pek.

SAC Ralkap Nih Kalay Peng Pyinkhongyi Khua A Ningpi Ti Tluk In An Khangh || 17 April 2024 Sagaing ramṭhen, Kalay peng chaklei, Chin miphun Falam pengmi an tamnak, inn 300 hrawng a umnak Pyinkhongyi khua cu SAC ralkap pawl nih an khangh i Biakinn 5 zong a kaang, tiah theih a si. Pyinkhongyi khua cu SAC ralkap nih a luancia April 12 ni ah an khangh chap caah inn a zate ti tluk in a kaang i SAC ralkap nih khua mi hna an thil mansung zong an fir, tiah tualchung mi nih

an chim. RFA nih an khawmh mi cazin ning ah a luancia February 21 in April 7 tiang Kalaymyo ah SAC ralkap hriamngan le hriamhme ruang ah tualchung mi 60 hrawng an nunnak a liam cang. SAC ralkap nih hramhram in nawlngeihnak an laak hnu in Myanmar ram hmun kip ah SAC ralkap nih inn 80,000 leng an khangh cang, tiah innkang cazin khawmtu Data For Myanmar nih April 15 ni ah an thanh.

Paletwa Peng Ah Arakan Army(AA) Theihpinak Ca Tel Lo In Luhchuah A Ngah Ti Lo | 17 April 2024 Chinram thlanglei, Paletwa peng ah Rakhine ralkap AA theihpinak ca tel lo in tualchung mi luhchuah a ngah ti lo, tiah theih a si. Paletwa peng ah a um mi tualchung mi hna cu Paletwa khuapi in hmun dang ah khualtlawn an duh a si ah maw, hmun dang in Paletwa khuapi luh an duh a si ah maw AA nih theihpinak ca i ken lawng ah luhchuah a ngah cang, tiah Paletwa tualchung mi nih an chim. “Paletwa in chuah duh zong ah AA theihpinak ca ken a hau i luh lei zong ah cu ṭhiam, Paletwa khuapi chung AA Check Gate pawl ah

theihpinak ca hal dih a si i Sami in si seh Kyaukdaw in si seh theihpinak ca i ken lawng ah luh khawh a si, i ken lo ahcun luh a ngah lo. Sami in Paletwa kal duh ahcun Sami khuapi chung AA kuttang khuabawi sin ah theihpinak ca laak a hau, i ken lo ahcun mi an kirter,” tiah Paletwa tualchung mi nih a chim. AA nih 1027 Operation an kalpi mi ah Chinram thlanglei, Paletwa peng cu a liamcia 2023 November 13 ni in kah hram an rak thawk i tukum January 14 ni ah a ningpi in an laak khawh. Paletwa khuapi an uk hnu in Paletwa peng chung ah zatlang i ukhruainak an kalpi i

rianṭuan hram an thawk, tiah theih a si. Paletwa khuapi ah a um mi tualchung mi hna cu khuate le ramri lei ah khualtlawn an duh a si ahcun khuapi chung um AA thim mi khuabawi pawl sin ah Kyats 1,000 in theihpinak ca an laak i theihpinak ca i ken lo in khual a tlawng mi paoh cu AA Check Gate in kirter an si, tiah tualchung mi nih an chim. Paletwa khuapi ah a um mi tualchung mi a tam-u cu kahdohnak ruang ah ral an zaam hna i khuapi chung ah an kir ngam rih lo caah chungkhar 300 hrawng lawng khuapi ah an um. AA nih Paletwa peng tualchung mi nih an ngeih mi le chungkhar min cazin vialte an laak dih, tiah theih a si.

Kachin Baptist Convention Chairman Hlun Rev. Dr. Hkalam Samson Thonginn In A Luat Ve || 17 April 2024 SAC nih Myitkyina thonginn ah kum 6 thong thlak ding in bia an rak ceihpiak mi Kachin Baptist Convention Chairman hlun Rev. Dr. Hkalam Samson cu nihin thongtla luatnak a hmu mi lak ah aa tel ve, tiah theih a si. Rev. Dr. Hkalam Samson cu thawngṭha a chim mi ruang ah a liamcia 2022 December 5 ah Mandalay Airport ah SAC ralkap nih

an rak tlaih i, kum 6 tiang thong thlak ding in bia an ceihpiak nain kum khat le cheu hrawng thong a tlak hnu ah nihin April 17 ni ah luatnak a hmu ṭhan. Nihin April 17 ah SAC nih thongtla 3,303 a thlah hna i, cu chung ah cun ramdang mi 98 zong an i tel, ramkhel thongtla belte an tlawm, tiah theih a si.