A poi kho taktak: Kan Laitlang Paletwa ah AA Rakhine ralkap theihpinak tel lo in luh chuah a ngah ti lo ee

Paletwa Peng Ah Arakan Army(AA) Theihpinak Ca Tel Lo In Luhchuah A Ngah Ti Lo | 17 April 2024 Chinram thlanglei, Paletwa peng ah Rakhine ralkap AA theihpinak ca tel lo in tualchung mi luhchuah a ngah ti lo, tiah theih a si. Paletwa peng ah a um mi tualchung mi hna cu Paletwa khuapi in hmun dang ah khualtlawn an duh a si ah maw, hmun dang in Paletwa khuapi luh an duh a si ah maw AA nih theihpinak ca i ken lawng ah luhchuah a ngah cang, tiah Paletwa tualchung mi nih an chim. “Paletwa in chuah duh zong ah AA theihpinak ca ken a hau i luh lei zong ah cu ṭhiam, Paletwa khuapi chung AA Check Gate pawl ah theihpinak ca hal dih a si i Sami in si seh Kyaukdaw in si seh theihpinak ca i ken lawng ah

luh khawh a si, i ken lo ahcun luh a ngah lo. Sami in Paletwa kal duh ahcun Sami khuapi chung AA kuttang khuabawi sin ah theihpinak ca laak a hau, i ken lo ahcun mi an kirter,” tiah Paletwa tualchung mi nih a chim. AA nih 1027 Operation an kalpi mi ah Chinram thlanglei, Paletwa peng cu a liamcia 2023 November 13 ni in kah hram an rak thawk i tukum January 14 ni ah a ningpi in an laak khawh. Paletwa khuapi an uk hnu in Paletwa peng chung ah zatlang i ukhruainak an kalpi i rianṭuan hram an thawk, tiah theih a si. Paletwa khuapi ah a um mi tualchung mi hna cu khuate le ramri lei ah

khualtlawn an duh a si ahcun khuapi chung um AA thim mi khuabawi pawl sin ah Kyats 1,000 in theihpinak ca an laak i theihpinak ca i ken lo in khual a tlawng mi paoh cu AA Check Gate in kirter an si, tiah tualchung mi nih an chim. Paletwa khuapi ah a um mi tualchung mi a tam-u cu kahdohnak ruang ah ral an zaam hna i khuapi chung ah an kir ngam rih lo caah chungkhar 300 hrawng lawng khuapi ah an um. AA nih Paletwa peng tualchung mi nih an ngeih mi le chungkhar min cazin vialte an laak dih, tiah theih a si.

Kachin Baptist Convention Chairman Hlun Rev. Dr. Hkalam Samson Thonginn In A Luat Ve || 17 April 2024 SAC nih Myitkyina thonginn ah kum 6 thong thlak ding in bia an rak ceihpiak mi Kachin Baptist Convention Chairman hlun Rev. Dr. Hkalam Samson cu nihin thongtla luatnak a hmu mi lak ah aa tel ve, tiah theih a si. Rev. Dr. Hkalam Samson cu thawngṭha a chim mi ruang ah a liamcia 2022 December 5 ah Mandalay Airport ah SAC ralkap nih

an rak tlaih i, kum 6 tiang thong thlak ding in bia an ceihpiak nain kum khat le cheu hrawng thong a tlak hnu ah nihin April 17 ni ah luatnak a hmu ṭhan. Nihin April 17 ah SAC nih thongtla 3,303 a thlah hna i, cu chung ah cun ramdang mi 98 zong an i tel, ramkhel thongtla belte an tlawm, tiah theih a si.

Lawngtlai Pengkomh In Myanmar Ram Ah Petrol, Diesel Le Eidin Tirawl Phurh Cu CYLA Nih An Kham Cang || 16 April 2024 Mizoram ramkulh thlanglei, Lawngtlai pengkomh lampi zulh in Myanmar ram, Rakhine ramchung lei ah Petrol, Diesel le eidin tirawl rak phurh tawn mi cu April 16 ni thawk in ni rikhiah um lo in thawngthanhnak a um hlan tiang kham a si cang kong Central Young Lai Association (CYLA) nih nizan April 16 ah an thanh. “Myanmar ram buai ruang ah atu lio cu Mizoram hmun kip in Myanmar ram, Rakhine ramkulh lei ah Petrol, Diesel le eidin tirawl phunphun phurh le kuat a si i, hi kong he pehtlai in Central Young Lai Association (CYLA) Kumpuan Committee nih cun kherhhlainak kan tuah i,

kan ram chung ah Myanmar, Manipur le Bangladesh ram in ralzaam tam ngai an i dor caah nifatin in kan herh mi tirawl kong ah harnak kan tong, kan ram chung thilri tam tuk kuat a si ruang zong ah mizapi harnak kan tong. Cu pin ah thil a rak cang mi zoh ṭhan tikah atu bantukin thil a phurtu Driver te ca zong ah a him lo,” tiah CYLA Kumpuan Committee nih an langhter. CYLA Kumpuan Committee nih cun, “Nihin April 16 ni thawk in thawngthahnak kan tuah hlan tiang Lawngtlai pengkomh chung si ah, Lawngtlai pengkomh leng in si ah Myanmar ram ah thilri kua ti hlah u,” tiah mizapi sin ah nawlnak an tuah i

kan ram le miphun himnak ca ah tuah mi a si ti hngal in nawl kan chuah mi zulh khawh cio i zuam hna sih, tiah an langhter chih. Rakhine ramkulh chung ah SAC ralkap le AA i kahdohnak ruang ah Rakhine ramkulh chaklei le AA nih zatlang ukhruainak an kalpi cuahmahnak Chinram thlanglei, Paletwa peng ah Myanmar ram chung in Petrol, Diesel le eidin tirawl a thlathla in a luh ti lo caah Rakhine ramkulh chaklei le Paletwa peng tualchung mi nih zingzan in an herh mi Petrol, Diesel le eidin tirawl cu Mizoram ah an zalh tawn, tiah theih a si.