A poi tuk ee: Thantlang peng Salen khua ah Inn duahpiaknak thawngpang kan theihmi cu a poi tuk ee

Salen Khua Ah Inn I Duahpiaknak A Chuak. 2024 Vuapi 16: Thantlang Bualpeng Salen khua ah 2024 Vaupi 16 zinglei suimilaam 3 hrawng ah khuami inn 4 cu a ho ti hngallo mi nih an duahpiak hna, tiah thawng kan theih. Khuami pakhat nih ” Zinglei suimilaam 3 hrawng ah Saya Bawi Tha Bik, Pu Tha Bik, Pu Tial Ceu Uk, Pu Hrang Lian Thang inn hna cu a ho ti fianghlang in hngalhlo mi nih an duah piak hna. Inntang in duahhram an thawk i, inn ngeitu nih thawng an theih i, an hmih manh. Inn kaangh taktak nak cu a chuak lo. Inn pakhat cu an facang chiahnak tiang an duah piak hna i,

vanthat ah a tlaih manh hlaan ah an hmih manh, tiah a chim. Ralzaam inn hna zong thla tampi chung zaanchiar lung le thing in an chehpiak hna, a sinain a minung taktak a ho set a si fianghlang in hngalhfian an si rih lo, tiah a chim chap. Salen khua ah bu pakhat anmah chung lila i hmuhthiam lo nak a chuah caah kaphnih in an um i, innlam i fanhnak le biakinn kong tiang ah i hmuhthiam lo nak a um i, pengtlang i thithruainak le Khrihfabu lei zong nih an remh kho rih hna lo, tiah kan theih.

Myanmar lei ah Petrol, Diesel le Edin Tirawl Kuat Lo Ding in CYLA nih a Thanh. April 16 || Mizoram, Lawngtlai District chung in Myanmar ram lei ah Petrol, Diesel le Editin tirawl luhter ti lo ding in CYLA Kumpuan Committee nih nihin April 16 ah thawngthanhnak a tuah.  “Myanmar ram buainak ruang ah Mizoram hmun tampi in Rakhine/Arakan ramkulh Myanmar ramchung ah Petrol, Diesel le eidin tirawl tampi luhpi a si. Hi kong ah hin faak ngai in khuaruahnak kan ngeim” tiah CYLA Kumpuan Committee nih a langhter. “Myanmar, Manipur, Bangladesh ram buai ruang ah kan ramchung ah

ralzaam tampi an phan i, nichiar in eidin a herh tuk lio ah kan ramchung in thilri tampi laak a si caah mizapi nih harnak an tong hnik cang. Aluancia thil sining zoh tikah thilri phur motor ngeitu hna le driver hna ca ah himnak zong a um lo,” tiah a langhter chap.  Cucaah, nihin April 16 thawk in Lawngtlai District chung in le lenglei in Lawngtlai District pal in Myanmar ram lei ah thilri phurh ti lo ding in CYLA Kumpuan Committee nih mizapi sin ah nawlnak a tuah.

Myeik Peng ah SAC Ralkap Leutenent Colonel Telh in Minung 58 cu KNU sin ah Hriamnam he An i Pe ll 16 April 2024 Tanintharyi ramthen, Myeik peng Sakhan pi Kah-Yah-Khah tang um Khah-Lah-Yah 103 chung in Leutenent Colonel Aung Hin telh in minung 58 cu hriamnam 68 he KNU sin ah

an i pe tiah Khit Thit Media nih a ṭial. April 15 ah Leutenent Colonel Aung Hin nih a hruai mi SAC ralkap Khah-Lah-Yah 103 in minung 58 cu KNU Brigade 4 sin ah hriamnam 68 he an i pe tiah theih a si. April 15 zanlei sang le zaan ah hriam chiah in KNU sin i aa pe mi Leutenent Colonel Aung Hin le a hruaimi ralkap pawl i an nupile hna cu SAC ralkap nih an tlaih dih hna, tiah Khit Thit Media nih a ṭial.

Ramkhel Kong Ah Tinh Mi Aa Khat Mi NUG He Ṭangṭi In A Dihdongh Tiang Kahdohnak Ah Kan I Tel Lai Tiah CNF Nih An Thanh || 16 April 2024 Nihin April 16 hi National Unity Government(NUG) dirh kum thum tlin ni a si i Chin National Front(CNF) nih NUG lawmhpinak cathanh an chuah. CNF nih cathanh an chuah mi ah cun nawlngeihnak ṭha lo vialte cu a dihdongh tiang kan doh lai i Federal Democracy ramkomh sernak ca ah

ramkhel kong ah duhnak le tinh mi aa khat mi NUG cozah he ṭangṭi in kahdohnak kan kalpi lai, tiah an langhter. A liamcia 2021 May 29 ni ah CNF le NUG cozah kar ah phun 8 in kaphnih kar hnatlaknak an rak ngeih bantukin hmailei karhlannak zong ah hmunkhat ah ṭangṭi in SAC ralkap nawlngeihnak le a dik lo mi nawlngeihnak vialte a hram bongh in Federal Democracy ramkomh a chuah khawh nakhnga kahdohnak ah kan kalpi lai i Chinmi hmelchunhnak Vakok dawtnak le zumhthlak a sinak minchal in kar kan hlang lai, tiah CNF nih an thanh mi ah an langhter.