Zualko: Malaysia ah a kalmi kan Chinpa Doctor Khual Sian Tung nih ruah lo tuk in a kan thih taak ee

Malaysia lei a Zaamnak Lampi ah a Nunnak a Liam mi “Sibawi Khual Sian Tung” Ruak cu Karen ah an Vui . April 15 || Myanmar ram in Malaysia lei a zaamnak lampi ah a nunnak a liam mi Sibawi Khual Sian Tung ruak cu Chinram lei ah kirpi ti lo in Karen ram ah an vui, tiah theih a si. CDM a tuah mi Sibawi Khual Sian Thang cu Malaysia lei ah zaam ding in aa thawh i, Karen ramchung hmun pakhat ah thaditnak in April 13 ah khan ruah lo piin

a nunnak a liam. Kum 32 lawng a si rih mi Sibawi Khual Sian Thang hi CDM a tuah mi a si i, COVID-19 zawtnak a tlun lio zong ah khan mizaw hna inn ah amah pumpak kal in thlopbulnak a tuahtu a si. An Khrihfabu nih a tuah mi Medical Evangelism ti mi rianṭuannak zong ah a pum aa pe mi a si. Atulio kan ram sining ruang ah a ruak cu Chinram lei ah kirpi ti lo in April 15 ah khan Karen ram ah Khrihfa phungning te in an vui, tiah theih a si.

Malaysia Ah Lai Ngakchia Thattu Pa An Tlaihkhawh Cang. Chin ramkulh, Hakha, Zokhua peng Malsawm khuami Malaysia ah khuasa Pi Tha Tin Hnem fapa, Salai Peter Biak Tha Cung Kum 7 cu Malaysia ah nizan April 14 ah a hngawng reh in thah a rak tuar. Peter a that tu hi Chin ramkulh, Hakha, Mie peng Hmaikhah khuami

Malaysia ah Khuasa Hrang Tling Thang kum 21 a si i Peter a thah hnu ah a zaam. Salai Peter Biak Tha Cung thattu Hrang Tling Thang cu, a zaamnak in a hawipa inn ah a chuak i a hawipa nih a report hnuah zaan suimilaam 11:27 hrawng ah an tlaih, tiah thawng kan theih.

SAC Palik Pakhat Cu Hriamnam He CDF-KKG Sinah Aa Pe ll 15 April 2024 Nihin April 15 ah Sagaing ramṭhen, Kalaywah peng um SAC palik Sub-inspector pakhat cu BA 94 pakhat, kuanbawm 2, kuanfang 200, Revolver 1 le a kuan 12 he CDF-KKG sin ah aa pe i, lawmman ah tangka Kyats sing 50 an pek hnu ah a himnak hmun ah an chiah kong Chinland Defense Force Kalay-Kabaw-Gangaw (CDF-KKG) nih an thanh.

Chinram le Mizoram Ramri Motor Accident Ah Chinmi 1 Nunnak Liam, 9 Hliamtuar ll 15 April 2024 Mizoram, Siaha district ah khualtlawng a phur mi motor cu accident a tong i Thantlang peng, Vuangtu khua mi pakhat nunnak a liam pinah minung pakua hliam an tuar, tiah theih a si. Siaha district in Chinram Vuangtu khua lei ah a kal ding minung 17 nih an i cit mi Pickup motor cu Lungbun le Tipi karlak ah April 13 zanlei suimilam 5:30 ah khan accident a tong i Vuangtu khua Pu Mang Cung cu a nunnak a liam, tiah theih a si. “Motor accident nak a ruang hi a break a ṭhat lo ruang ah si. Kum 50 tluk a si mi Pu Mang Cung cu a lu aa khawng i a hmun ah a thi colh,” tiah motor accident ah aa tel ve mi pakhat nih

Zalen ah a chim. “Motor aa cit mi minung 17 chung ah minung 9 cu an i hliam i hliamtuar mi lakah kum tling lo ngakchia le kumkhat fai hrawng a si mi ngakchia zong an i tel. Hliamtuar mi pawl cu Siaha si-inn ah an kalpi hna hnu ah minung 3 cu Aizawl ah an lanhter hna,” tiah a chim chap. Motor Khawndennak in nunnak a liam mi Pu Mang Cung hi hlaṭial le hlasak a thiam ngai mi a si i 2013 kum lio i rak tuah mi Zophei Idol ah Theme Song a rak ṭialtu zong a si, tiah a chim. A ruak cu a chuahnak Vuangtu khua ah April 14 ah an vui tiah theih a si.

CDF ṭangti Phu Nih Rungtlang ah Drone in Bomb an Thlak ll 15 April 2024 Nihin April 15 ah CDF ṭangti phu nih Rungtlang ah Drone in bomb voithum an thlak i SAC ralkap thi le hliam tuar an um kong CDF Hakha nih an thanh, dikthiar deuh thawngthanhnak an tuah ṭhan te lai kong an langhter chih. Hi bomb thlaknak hi Quantum Project tiah min an bunh i, CDF-Hakha, CDF- Thantlang, CDF-Zophei le CDF-Lautu hna an i tel tiah CDF-Hakha nih

cun an langhter. “Chinram ralteinak caah Rungtlang hi tei a herh caah Rung Operation zong kalpi cuahmah a si. Ramchung le ramleng mipi vialte tangṭi rih hna usih. Ralhrang SAC le a minung pawl cu hohmanh hnangam tein dinh caan kan pe ti hna lai lo. Caan rau lo ah kan tei lai,” tiah thazaang chuah ding in mipi sawmnak he CDF-HAKHA nih thawng an thanh.