(Video+) Kan pasaltha hna nih SAC Ralhrang minung hi zat bak an tlaih lio Video an langhter
Atang ah Video a um: Hpasawng In A Ra Mi SAC Ralkap Pawl An Kah Hna, Battalion Commander Telh In Ralkap 58 An Tlaih Hna | 2024 April 13 — Karenni ram, Hpasawng khua ah bawmhnak pek ding in a kal mi SAC ralkap pawl an kah hna i Battalion Commander Lt. Colonel telh in SAC ralkap 58 a nung in an tlaih hna tiah Khit Thit nih a langhter. April 11 zinglei sml 4:00am hrawng ah Bawlakhe peng in Hpasawng khua lei ah bawmhnak pek ding in a kal mi thazang 100 hrawng SAC ralkap phu pawl cu Papu khua pawng ah Karenni dothlennak phu pawl nih an kah hna i Battalion Commander Lt. Colonel telh in
ralkap tampi an tlaih hna. Cubantuk in March 20 lio zong ah Bawlakhe khua in Hpasawng lei a kal mi SAC ralkap pawl an rak kah bal cang hna i Byuha-hmu telh in ralkap 15 an rak i hliam, 16 an thi i 1 a nung in an rak tlaih. February 29 in an thawk mi Hpasawng kahdohnak ah SAC ralkap sakhaan cheukhat Karenni dothlennak phu nih an lak khawh. Hpasawng khua ah SAC ralkap LIB 134 le 135 an um i khua la kho ding in adang sakhaan pawl zong an kah cuahmah lio a si.
Kah bawmh ding in a kal mi SAC ralkap kah an tong; Battalion Commander le a changtu tel in 60 deng an tlaih hna. April 13 || Kahdohnak bawm ding in a kal mi SAC ralkap phu cu lam tanṭim ah Karenni ralkap phukomh nih an kah hna i, battalion commander le a changtu tel in 58 an tlaih hna tiah theih a si. April 11 zinglei sml. 4:00 hrawng ah Karenni ramkulh, Bawlakhe in Hpasaung khua lei ah kahdohnak bawm ding in a kal mi SAC ralkap 100 hrawng cu
Papu khua pawng ah an kah hna. “Battalion commander le commander changtu tel in 58 kan tlaih hna. Hma a pu mi zong an um i kan thlop hna,” tiah ralram thawng hram nih a chim. Hpasaung khua hrambunh SAC ralkap battalion Kha La Yah – 134 le Kha La Yah – 135 cu Karenni ralkap phu komh nih an kulh hna i thla hnih chung an kah cang hna. SAC nih vanlawng in bomb a thlak caah Hpasaung khuachung inn zatuak 80 tluk a kaang cang tiah theih a si.
Min Aung Hlaing Thlak Timh Ruang ah Ralbawi Cheukhat Tlaih an Tong April 12 || SAC Chairman Min Aung Hlaing ṭhumhthlak ding in rian an ṭuan tiah puh mi ralbawi pahnih le USDP Party cungtel upa pakhat cu SAC ralkap nih an tlaih hna, tiah theih a si. Tlaih a tong mi hna cu U Thein Sein chan ah Myanmar ram cinthlak lei vuanci a rak ṭuan mi U Myint Hlaing, Min Aung Hlaing ruahnak petu Lieutenant General Nyo Saw le Lieutenant General Aung Soe an si. U Myint Hlaing cu
April 9 ah khan an tlaih i ni hnih a rauh hnu April 11, zaan sml. 9:00 hrawng ah Lieutenant General Nyo Saw le Lieutenant General Aung Soe zong an tlaih ve hna. Min Aung Hlaing thlak ding in an i zuam ruang ah an tlaih hna tiah thawngpang a leng ngaingai nain an pathum ning in ziknawh eihmuarnak case in tazacuai an si. Nihin April 12 zong ah Naypyidaw khuapi chung lamṭe le luhchuahnak kip ah SAC ralkap nih runvennak chah ngai in a tuah i ralbawi dangdang tlaih an timh mi hna an um rih kho, tiah an zumh.