A poi taktak: SAC Ralhrang minung 3 cu Min Aung Hliang nih a zumh lo ruang hna ah a tlaih colh hna

Min Aung Hlaing Thlak Timh Ruang ah Ralbawi Cheukhat Tlaih an Tong  April 12 || SAC Chairman Min Aung Hlaing ṭhumhthlak ding in rian an ṭuan tiah puh mi ralbawi pahnih le USDP Party cungtel upa pakhat cu SAC ralkap nih an tlaih hna, tiah theih a si.  Tlaih a tong mi hna cu U Thein Sein chan ah Myanmar ram cinthlak lei vuanci a rak ṭuan mi U Myint Hlaing, Min Aung Hlaing ruahnak petu Lieutenant General Nyo Saw le Lieutenant General Aung Soe an si.  U Myint Hlaing cu April 9 ah khan an tlaih i ni hnih a rauh hnu April 11, zaan sml. 9:00 hrawng ah

Lieutenant General Nyo Saw le Lieutenant General Aung Soe zong an tlaih ve hna.  Min Aung Hlaing thlak ding in an i zuam ruang ah an tlaih hna tiah thawngpang a leng ngaingai nain an pathum ning in ziknawh eihmuarnak case in tazacuai an si. Nihin April 12 zong ah Naypyidaw khuapi chung lamṭe le luhchuahnak kip ah SAC ralkap nih runvennak chah ngai in a tuah i ralbawi dangdang tlaih an timh mi hna an um rih kho, tiah an zumh.

Kachin ramkulh ah RC Father pakhat Missa raithawinak tuah lio ah meithal in an kah April 12 || Kachin ramkulh, Mohnyin Catholic Biakinn in Rev. Fr. Paul Khui Shane Om cu April 12, zinglei Missa raithawinak an tuah lio ah aho ti hngalh lo mi pahnih nih meithal in an kah tiah theih a si. “April 12, zinglei sml. 7:00 hrawng ah

a hmai aa hup mi minung pahnih nih meithal in an rak kah,” tiah Catholic Youth cahmai nih a tial. Rev. Fr. Paul Khui Shane Om cu meithal zun nga in an kah i zun thum nih a khen caah sii-inn ah an thlop cuahmah tiah theih a si. A kaptu ahodah an si ti mi tu cu hngalh an si rih lo. Rev. Fr. Paul Khui Shane Om cu kum 40 a si i Chin miphun, Mindat peng mi a si tiah theih a si.  Photo: Catholic Youth

Hakha Khuapi Kahdohnak Update || 12 April 2024 Nihin April 12, Zinglei ah SAC Vuanci zung a kai mi pawl cu CDF-Hakha nih Hakha khuathar, Thantlang lampial ah rak bawh in an kah hna i an kah hna tlawmpal ah SAC ralkap zeimawzat an phan colh.  SAC lei hi an tam tuk caah aa hliam mi cu an um an ti nain

mizapi ralkap maw an si SAC lei ti fiang in theih a si lo. Vuanci motor pakhat a rawk i mizapi mawtaw zong pakhat a rawk ve, tiah kan thawnglaknak nih a chim. Hi kong he pehtlai in CDF-Hakha pehtlaihnak kan tuah hna nain khuallam an um lio a si caah thawng fiang an kan thanh kho deuh rih lo.

Atang ah Video kan langhter: KIA Nih Nan-ya Sakhaan An Lak Chap | 2024 April 12 – Kachin ram, Hpakan peng, Nan-ya sakhaan cu KIA nih an lak khawh i hriam tampi an lak khawh tiah KIA lei thawngzamh nih an langhter. SAC ralkap le SNA pawl nih hmunhma an khuarnak Nan-ya sakhaan cu April 9 ah an kah i April 11 ah

tlamtling tein an lak khawh hi a si. Nan-ya sakhaan lak kahdohnak chung ah SAC ralkap 50 leng nih hriam an chiah, SNA ralkap pawl zong an i tel tiah an langhter. KIA nih April 9 zong ah Hpakan peng Se-yin sakhaan an lak lhawh. Cu lio zong ah SAC kuttang palek 23 nih a sung an pek i meithal zuun 22 an lak khawh tiah KIA lei kahdohnak thawngzammh nih an langhter.

India Cozah Palai Nih India Le Myanmar Chawlehthalnak Hmun A Zoh ll 12 April 2024 India cozah palai Abhay Thakur cu Mizoram nichuahlei um Champhai khuapi ah cawnnili ni(April 11) ah khan a phan i India le Myanmar ramri Border Trade, Rih-Zokhawthar zohfelnak a ngei. Abhay Thakur cu Champhai Circuit House rianngeitu le ramri chawlettu pawl he ramri chawlehnak kong biaruahnak an ngeih hnu ah Rih-Zokhawthar Border Trade cu an va zoh. “India le Myanmar pehtlaihnak a ṭhat hi a biapi ngai mi a si i, humhimnak le ṭhanchonak cu then awk ṭha lo mi a si. Myanmar ram chung i a cang cuahmah mi thil ruangah India le Myanmar ramri chawlehnak ca ah a ngan tuk mi zuamcawhnak a um,” tiah Abhay Thakur nih

cun a chim. Cu bantuk si ko hmanhsehlaw cuhlan bantuk in ramri chawlehnak a kal khawh nakhnga ruahchannak kan ngei, tiah a chim chap. Upadi nih a kham mi thil ṭha lo hna cu lungrual tein dohṭi ding ah India palai nih cun mizapi sin sawmnak a tuah. India le Myanmar chawlehnak ah a biapi mi Rihkhuadar khuapi cu a luancia 2023, kum dongh lei ah CNA hruainak in Chin hriamtlai phu nih an rak laak i, Chin hriamtlai phu le mizapi ukhruainak tang ah a um. Hi ramri chawlehnak hi a kal peng ve ko nain Myanmar ram buai ruangah chawlehthalnak tampi in a zor cang, tiah theih a si.