Thawngpangthar: Tuzingkan pasaltha hna nih Tuluk le Myanmar ramri um SAC Ralhrang Camp an laak khawh colh

Thawngpangthar: Lwegel Khuapi Cu SAC An Um Lonak Hmun A Si Tiah KIA Nih An Thanh || 9 April 2024 Kachin ramkulh, Momauk peng, China-Myanmar ramri Lwegel khuapi chung ah a taang mi Khah-Lah-Yah 142 SAC ralkap le Non-CDM vialte cu China ram ah an zaam dih caah Lwegel khuapi cu SAC an um ti lonak hmun a si i KIA nih khuapi a ningpi in an laak kong phungning tein an thanh. “Lwegel khuapi ah a um mi SAC ralkap le Non-CDM vialte cu China nih a cohlan hna i

an zaam dih caah Lwegel khuapi cu SAC an um ti lonak hmun a si i KIA kuttang ah a um dih cang, nizan April 8, zan suimilam 10:00 cun Lwegel khuapi chung ah SAC ralkap le Non-CDM pakhat hmanh an um ti lo,” tiah KIA thawng laaknak hrampi nih an chim. A luancia March 27 ni thawk in Bhamo–Lwegel lampi cung um SAC ralkap sakhan vialte cu KIA le ṭangṭi phu nih an rak kah i April 1 ah a donghnak bik a taang mi Seinlong Byuha sakhan an rak laak khawh, April 2 ni ah Lwegel khuapi cu a ningpi in an laak i nizan April 8 zinglei ah Lwegel khuapi chung Khah-Lah-Yah 142 sakhan ah KIA nih thianhfelnak an tuah, tiah theih a si.

Thantlang Peng, Vomkua Khua Ah Chungtlik Pawfah Rai A Tlung I A Zaw Mi An Tam || 9 April 2024 Chinram, Thantlang peng, Bual tlang, Vomkua khua ah chungtlik pawfah rai a tlung i a zaw mi an tam ngai, tiah theih a si. A luancia April 7 ni thawk in Vomkua khuachung ah chungtlik le pawfah in a zaw mi an karh ngai caah Tikir siizung ah kalpi in thlopbul cuahmah mi zong an um i a cheu cu siizung panh kho lo in mahte in aa zohkhenh mi zong an um, tiah theih a si. Hi kong he pehtlai in

Vomkua khua mi pakhat nih cun, “Apri 7 ni, zarhpi ni thawk khan khuachung ah chungtlik le pawfah zawtrai a tlung i khua mi a zaw mi an tam ngaingai, a cheu cu Tikir siizung ah an kalpi hna, nihin zong ah kalpi cuahmah mi an um, Tikir siizung cu khua mi dam lo lawngte an khat ko. A cheu cu chungkhar ning in a zaw mi hna an um i kan lungre a thei ngaingai, a cheu cu siizung panh kho lo in mahte aa thlop lio mi zong an um,” tiah The Chin Post ah a chim. “Kum dang ah cun

a khua ningpi ti tluk in atu bantuk zawtrai ngaingai cu kan tong bal lo. Vomkua hi cu a linhnak hmunram a si i kan dinti ruang hna ah hin a si hnga maw ti kan ruat ngai, ti kan thah mi zong chun ah cun lum vuapvap in an um dih i, a linh tuk caah atu bantukin rai a tamnak zong hi a si kho men, siizung ah kalpi cang mi le kalpi cuahmah mi an um caah mizaw zat hi fiang in hngalh a si rih lo,” tiah Vomkua khua mi pakhat nih cun a chim.

Cobra Column nih Tla Lak in an Kah mi SAC Ralkap Helicopter an Hmuh . April 9 Karen ramkulh chung ah Cobra Column nih tla lak in an rak kah mi SAC ralkap Helicopter rawk cu Karen hriamtlai KNLA nih an laak mi Thingannyinawng SAC ralkap sakhaan ah an hmuh, tiah theih a si.  Hi SAC ralkap helicopter hi 2024 January 29 ah Cobra Column nih tla lak in an rak kah mi a si i, Helicopter chung ah aa cit mi SAC ralkap bawi Brigader General Aye Min Naung tel in ralkap panga an rak thi.

SAC nih a voi khatnak Military Service Law training a thawk . SAC nih Kawl ti toih puai dih in Military Service Law training a voi khatnak pek hram kan thawk lai tiah thawng a zamh nain a caan phak hlan ah a voi khatnak pek hram a thawk cang tiah theih a si.  SAC ralkap nih rakap tuan lo ngah lo phung a nun ter hi 2024 February 10 ahkhan a thanh. Mipi sin i thawng a thanh ning ahcun Kawl kum thar (Water festival) dih in min cazin kan laak lai ti a si nain atu ahcun

hramhram in auh le tlaih mi hna cu ralkap cawnnak a thawk ter cang hna.  Ralkap tuan lo ngah lo timi phunghram hi U Than Shwe nih a rak chuah mi a si i hi phunghram ning ahcun kum 18 in kum 27 kar poh kum nga tuan hrimhrim ding. Nu a si ahcun kum 2 tiang tuan ding tiah aa tel.  Cun, siibawi, engineer le zung thiam an si hna cun pa hi kum 18 in kum 45 kar an si lai. Nu an si ahcun kum 18 in kum 35 kar an si lai tiah aa tel.  Lakhruak in a si sual ahcun kum 5 chap than khawh a si tiah hmuh a si fawn.

CNA Bo Thum Captain Aung Aung Ruah Lo pi in Mual a Liam. April 9 || CNF/CNA ah ram a ṭuan lio mi Captain Aung Aung (Stenly Pa) cu April 7 ah khan ruah lo pi in a nunnak a liam, tiah theih a si.  Captain Aung Aung hi Thantlang peng, Bungtlang khua ah CNF/CNA rian a ṭuan mi a si i, April 7 zinglei sml. 4:00 hrawng ah

ruah lo piin a nunnak a liam hi a si.  A thih hlan zarh khat chung hrawng ah khuhkhuh le cumpih in a um i, April 7 zinglei ah a nunnak a liam hi a si, tiah chungkhar he naihniam nih an chim.  Captain Aung Aung hi CNF/CNA ah kum 17 tiang ram rian a ṭuan cang mi a si. April 8 ah a ruak an vui, tiah theih a si.