(Video+) Kan pasaltha hna nih SAC Ralhrang Helicopter tla lak in an kah mi Video kan langhter
Cobra Column nih Tla Lak in an Kah mi SAC Ralkap Helicopter an Hmuh . April 9 Karen ramkulh chung ah Cobra Column nih tla lak in an rak kah mi SAC ralkap Helicopter rawk cu Karen hriamtlai KNLA nih an laak mi Thingannyinawng SAC ralkap sakhaan ah an hmuh, tiah theih a si. Hi SAC ralkap helicopter hi
2024 January 29 ah Cobra Column nih tla lak in an rak kah mi a si i, Helicopter chung ah aa cit mi SAC ralkap bawi Brigader General Aye Min Naung tel in ralkap panga an rak thi.
SAC nih a voi khatnak Military Service Law training a thawk . SAC nih Kawl ti toih puai dih in Military Service Law training a voi khatnak pek hram kan thawk lai tiah thawng a zamh nain a caan phak hlan ah a voi khatnak pek hram a thawk cang tiah theih a si. SAC ralkap nih rakap tuan lo ngah lo phung a nun ter hi 2024 February 10 ahkhan a thanh. Mipi sin i thawng a thanh ning ahcun Kawl kum thar (Water festival) dih in min cazin kan laak lai ti a si nain
atu ahcun hramhram in auh le tlaih mi hna cu ralkap cawnnak a thawk ter cang hna. Ralkap tuan lo ngah lo timi phunghram hi U Than Shwe nih a rak chuah mi a si i hi phunghram ning ahcun kum 18 in kum 27 kar poh kum nga tuan hrimhrim ding. Nu a si ahcun kum 2 tiang tuan ding tiah aa tel. Cun, siibawi, engineer le zung thiam an si hna cun pa hi kum 18 in kum 45 kar an si lai. Nu an si ahcun kum 18 in kum 35 kar an si lai tiah aa tel. Lakhruak in a si sual ahcun kum 5 chap than khawh a si tiah hmuh a si fawn.
CNA Bo Thum Captain Aung Aung Ruah Lo pi in Mual a Liam. April 9 || CNF/CNA ah ram a ṭuan lio mi Captain Aung Aung (Stenly Pa) cu April 7 ah khan ruah lo pi in a nunnak a liam, tiah theih a si. Captain Aung Aung hi Thantlang peng, Bungtlang khua ah CNF/CNA rian a ṭuan mi a si i, April 7 zinglei sml. 4:00 hrawng ah
ruah lo piin a nunnak a liam hi a si. A thih hlan zarh khat chung hrawng ah khuhkhuh le cumpih in a um i, April 7 zinglei ah a nunnak a liam hi a si, tiah chungkhar he naihniam nih an chim. Captain Aung Aung hi CNF/CNA ah kum 17 tiang ram rian a ṭuan cang mi a si. April 8 ah a ruak an vui, tiah theih a si.
June 1 ah Joshua Van le Tuluk Pa an i Ṭhua Lai . April 9 || A ra lai mi June 1 ah Joshua Van le Tuluk pa Su Mudaerji an i ṭhua lai, tiah thawng kan theih. UFC ah i ṭhuat ding in contract a tuah cangnak kong cu Joshua Van nih a Facebook cahmai zong ah theihternak a tuah. “Contract ka sign ṭhan cang, thawng kan thanh ṭhan te hna lai,” tiah Joshua Van nih a ṭial. US ram, Jew Jersey ah a ra lai mi June 1 ah an tuah ding mi UFC 302 ṭhuat zuamnak ah
Joshua Van le Su Mudaerji an i ṭhua lai, tiah Kawl zaangleknak thawngpang cahmai hna nih an ṭial. Joshua Van he aa ṭhua ding mi Su Madaerji hi kum 28 a si i, MMA ṭhuat zuamnak voi 22 aa ṭhua i voi 16 teinak a hmu mi a si. A luancia Apri 6 ah tuah mi UFC ṭhuat zuamnak ah Joshua Van le Brazil pa Lucas Rocha i ṭhuat ding in timhtuah a si nain Locas Rocha nih a rak lettak.
Breaking News: Hakha khuapi chung ah inn 4 a kaang, SAC ralkap zong an chuak: 2024 April 9 Chin Ramkulh khuapi Hakha khuachung, Bethany sang chung ah inn 4 a kaang i hliamtuar le nunnak liam cu an um lo nain thilri sunghral mi a tam tiah theih a si. Hi kong he pehtlai in, “Zing suimilaam 1:24 hrawng a si lai dah. Inn kangh hram aa thawknak inn hi mi um lonak inn a si. Inn a kangh bak in SAC ralkap tam tuk an rak chuak ca ah mizapi nih an fuh colh ngam lo. Hi inn kang mi ahhin CCU Principal Dr. Luke te inn zong aa tel,” tiah sang chung minung pakhat nih ChinTalk ah a chim. Inn a kang mi hna hi
Dr. Luke te inn ti dah lo cu inn hlang lawngte an si. Zeiruang ahdah a kangh ti theih a si rih lo. Cun, “Inn kangh hram aa thawk nak hi minung an um lo. Electric in kangh hram aa thawk i si lai ti kan zumh ko,” tiah SAC kuttang riantuan pakhat nih a chimchap. Zing suimilaam 1:24 in kangh hram aa thawk i SAC ralhraang nih an fuh ca ah mipi nih zuanhnawh ngam loin a um i zing suimilaam 4:00 tluk lawng ah mei an hmih khawh. A inn 5 nak hi an ti chiah nak lawng a kaang manh tiah theih a si.