Thawngpangthar: Kan pasaltha hna nih tuchun ah SAC Ralhrang Camp an laak i Ralhrang hi zat an thi

KNU Brigade 5 Hmunram March Thla Chung I Kahdohnak Ah Captain Pahnih Telh In SAC Ralkap 42 An Thi || 3 April 2024 Karen ramkulh, Hpapun pengkomh, KNU Brigade 5 hmunram March thla chung ah kahdohnak voi 99 a chuak i Captain pahnih telh in SAC ralkap 42 an thih kong KNU Brigade 5 nih phungning tein an thanh. A luancia March 1-31 tiang ah KNU Brigade 5 hmunram chung ah KNLA Brigade 5 tang ralkap le SAC ralkap kar kahdohnak voi 99 a chuak mi ah SAC ralkap 42 an thi i minung 55 hliam an pu, tiah theih a si. KNU Brigade 5 hmunram chung kahdohnak a thi mi SAC ralkap lak ah

Captain pahnih, Second Lieutenant pakhat, Sergeant pahnih le Lance Corporal pahnih an i tel, KNLA lei in minung 8 nih ram le miphun ca ah nunnak an pek i minung 14 hliam an tuar, tiah theih a si. Kaphnih kar i kahdohnak ah cun SAC ralkap nih tualchung mi an umnak inn le leikuang hna ah hriamngan voi 42 an kah pin ah Drone le vanlawng in bomb lung 1,485 an thlak ruang ah naupawi lio nu pakhat telh in tualchung mi 8 nunnak a liam i minung 30 hliam an tuar, minung 1,624 cu a himnak hmun kawl in ral an zaam, tiah theih a si.

Mindat Peng Ah SAC Ralhrang Nih Bomb A Thlak Ṭhan I Tualchung Mi 5 Hliam An Tuar | Vaupi 3 | 2024 Chin ramkulh thlanglei, Mindat peng, Aukchaing khua cu April 2 ah SAC ralhrang nih cunglei in bomb a thlak caah tualchung mi 5 nih hliam an tuar i sianginn telh in tualchung mi hna inn cheukhat a rawk, tiah tualchung mi hna nih

an chim. 2024, April 2, chun suimilam 2:00 tluk ah SAC ralhrang nih raltuknak vanlawng 3 in Pound 500 a rit mi bomb telh in bomb 10 a thlak i kahdohnak pawl zong a um caah sianginn, tualchung mi hna inn cheukhat an rawk i an kaang, tiah an chim. Raltuknak vanlawng 3 in chun ah voi 1, zanlei ah voi 1 tiin voi 2 tiang bomb a rak thlak, ni 2 chung pehtlai in a thlak cang. Atu bantuk in bomb a thlak mi ruang ah tualchung mi 5 nih

hliam an tuar i inn cheukhat zong an kaang, an rawk” tiah Mindat tualchung mi pakhat nih a chim. A luancia April 1 zong ah Mindat peng Sattion 1 um khuate hna cu SAC ralhrang nih cunglei in voi 10nak tlawm lo bomb a thlak caah Khrihfa Biakinn telh in inn cheukhat an rawk, tiah theih a si.

Mizoram Sangau Khua Ah Fak Ngaiin Rial A Tla: Motor Chokvak Pawl Lamcung Ah An Taang | Vaupi 2 | 2024 2024 April 2 zanlei suimilam 3 tluk ah Mizoram Sangau khua le a pawngkam hna ah fak ngai in rial a tlak caah khua mi harnak an tong tiah theih a si. Rial tamtuk a tlak ruangah khuachung lampi motor aa chok mi cheukhat zong kal kho lo in an taan caah YLA le tuanvo ngeitu hna nih JCB Tank in an hui piak chom hna. Mahpin ah

khuachung inn le lo cheukhat hna zong inn cung (Camphio) a pemh len, Ralzam an i dornak Forest Camp le Thantlang khua PCH ngaktah an i dornak inn zong hrawh in a pemh dih hna. “A tu bantuk in rial mah tluk fak a tlak hi ka hngal rih lo, tuni rial tlak cu a mak tuk, kan khuaruah zong a har dih i ṭih zong a nung taktak” tiah Sangau khua ralzam pakhat nih a chim.

Sami Khuapi Ah Bomb Lamhsualnak In Pa 1 Nunnak A Liam | Vaupi 2 | 2024 Chin ramkulh thlanglei, Paletwa peng, Sami khuapi No.2 sang ah Chinmi pa 1 cu nizan 2024, April 1 ah bom aa lamhsual i a nunnak a liam, tiah theih a si. “Ihkhun 16 sii-inn sakthar mi pawng ah a si i inn a um lo. Atu bantuk in bomb aa lamhsual caah a vorhlei ke a bul. AA sii-inn ah an kalpi nain an thlop khawh ti lo caah Rakhine ramlulh, Kyauktaw sii-inn i an kalpi hnu ah

a nunnak a liam. A ruak cu Kyauktaw in Leikkaung hleidonh tiang an rak thlah lai” tiah Sami khuami pakhat nih a chim. Nunnak liam mi Pu Lai Thang kum (68) cu a chungkhar hna he khuate lei ah ral an hrial i Sami khuapi an kir ṭhannak hi ni 3 lawng a si rih, tiah theih a si. SAC ralhrang le Rakhine ralkap AA kar kahdohnak ruang ah Sami khuapi tualchung mi hna cu aa naihnak khuate hna ah ral an hrial i atu hi khuapi chung ah a kir ṭhan mi minung tlawmpal an um cang, tiah theih a si.