(Video+) Tuchun kan Lairam ah ruah sur le Rial ngan taktak an tla ruang ah mipi harnak an tong Video kan langhter

Central Lairam Laiholh Holh Tambiknak Sangau Khua Ah Rial Fak Ngai In A Tla 2024 Vaupi 02: 2024 Vaupi 2 zaanlei suimilaam 2 hrawng khan Central Lairam Lawngtlai peng Sangau khua ah fak ngai in rial a tla, Rial tla nih hin Sangau khuachung inn zeimawzat a pemh. Asinain inn zeizat set dah a pem ti hngalh a si rih lo. Rial faktukin a tlak caah Sangau bazar Vengthar lamton ah rial tla luti nih a fonh i motor cheukhat cu kal kho lo in a taap caah

JCB in rial tla cu nor a si. Vengthar bazar lamton ah rial tla luti nih a fonh caah Pu H Lalremruat, Pu H Tial Irh te inn ah an luang, Sangau YLA le zaanghleicawi hna pumpak nih innchung i rial luangmi cu bawm in an thiar. Rial tla nih pumpak inn le cinthlak siseh, innleng pangpar cinmi a hrawh hlei ah, cozah inn rawk zong a um.

Zotung Hmunram In Rakhine Ralkap AA Nih Chin Miphun Ralkap Hna Cu Kahdoh Dingin An Bawh Hna  | Vaupi 2 | 2024 Chin ramkulh, Zotung hmunram Rancci, Sanset le Nawbong khua kiangkap ah Chin miphun ralkap CNA phu hna an rat ahcun kahdoh dingin Rakhine ralkap AA nih an bawh hna, tiah theih a si. “Atu hi Rancci, Sanset le Nawbong khua kiangkap ah AA phu pawl cu i ṭhen in Chin ralkap CNA chungtel hna kahdoh dingin an bawh hna. AA chungtel pakhat cu

CNA nih an tlaih caah AA nih ral ah an ser hna i atu bantuk in an tuah hi a si. CNA nih an tlaih mi Rakhine ralkap AA minung 1 cu an thlah ṭhan cang” tiah The Zotung Post nih a langhter. Cu pinah AA nih cu hlan tein Chin ramkulh chung khuapi hna cu an kutchung ah um dingin kahdohnak a tuah i atu AA cungtel minung 1 Chin miphun ralkap CNA nih an tlaih mi hi caan ṭha ah i laak in CNA kahdoh i Chinram chung ah hmunhma laak an timh caah Chin miphun hna nih AA phu pawl hi ṭha tein ralrin peek an hau cang, tiah The Zotung Post nih a langhter chih

Hakha Khuapi Fimcawnnak Pengkomh Zung Ah Rianṭuan Mi Sayagyi Sang Ceu Awi Cu CDM A Tuah Caah Ralhrang Nih A Rian In An Chuah Vaupi 2 | 2024 SAC ralhrang nih hramhram in nawlngeihnak a laak caah Chin ramkulh, Hakha khuapi um fimcawnnak pengkomh zung ah rianṭuan mi (Staff Officer) Sayagyi Sang Ceu Awi cu 2021, April 1 ah CDM a tuah i ralhrang nih 2021, May 5 ah a rian in an chuahnak cathanh an chuah. “Atu hi Oline in a ka dohdal mi an um i ka lungfaak ngai. Salen khua nu/pa hna zong nih kan in ngaihchiatpi tuk tiin an ka topi i nihin 2024, April 2 zong ah

vok an ka thah. Online in a ka dohdaltu pa nih CDM a tuah lomi a si caah rak i ralring uh! ṭihnung tukmi pa a si. A kalnak kip ah CDF-Lautu ṭhatlonak lawngte a chim phinah CDF tlamtlin lonak lawngte a soiseltu pa a si tiin a dik lomi lawngte in ka mual a ka phoh caah tazacuai dingin kai timh liopi a si” tiah Sayagyi Sang Ceu Awi nih Lungmili Post ah a chim. Fake Account in a ka dohtu pa hi kan hlat cuahmah lio a si i 100 ah 90% cu kan hngalh khawh cang. Ka zumh lomi minung 4 an um i khua nu/pa bawmhnak he

kan chek hna liopi ah Fake Account in a ka dohtu pa nihcun khuabawi ṭhat lonak kong a ṭialmi a van kuat mi zong kan hmuh. Chinram cozah biaceih zung ah tazacuai ka timh hna. Bual area ah Vice Chairman a ṭuan tiin a ka phuan mi zong hi SAC ralhrang sinah a ka report bak a si caah CDF zong nih ka zoh sawhpiak hlah u law ka duh, tiah a chim chap. Hmanthlak:SAC ralhrang nih (Staff Officer) Sayagyi Sang Ceu Awi rian an chuahnak cathanh a si.

Mindat Khuapi Chung Inn 8 A Kaang! || 2 April 2024 Chinram, Mindat khuapi, Bawathit sang chung ah nizan April 1, zan suimilam 10:00 hrawng ah meikangnak a chuak i umnak inn 8 a ciam dih, tiah theih a si. Bawathit sang, Forest zung thlanglei khuapi helnak lampi cung um inn pawl cu an kaang i mei phalhnak ding ca ti a har caah

an phalh khawh lo kong Mindat khua um tualchung mi pakhat nih a chim. Mindat khuapi chung ti an harnak hi kum khat hrawng a si cang, tiah Mindat khua tualchung mi nih an chim. Caan sau ngai a kangh hnu, inn zeimawzat a ciamh hnu ah meithat motor nih a phalh, tiah theih a si.  Zeiruang ah dah mei hi a chuah ti fiang tein theih a si lo.