Kan pasaltha hna nih phurh cawk lo bak in SAC Ralhrang Camp ah hriamnam tam taktak an laak mi kan langhter

KIA Le Ṭangṭi Phu Nih SAC Ralkap Seinlong Byuha Sakhan Cu A Ningpi In An Laak || 2 April 2024 Kachin ramkulh, Momauk peng, Seinlong khua SAC ralkap Byuha sakhan cu KIA le ṭangṭi phu nih nizan April 1 ah a ningpi in an laak, tiah theih a si. Seinlong Byuha sakhan cu Tactical Operation Command nih amah pumpak in a ven mi sakhan a si i Bhamo–Lwegel lampi thluan uknak kong ah a biapi ngai mi sakhan a si. Momauk–Lwegel lampi thluan ah

a um mi Seinlong Byuha sakhan le Yawyon sakhan ngan mi telh in SAC ralkap sakhan 12 cu KIA le ṭangṭi phu nih March 27 ni in kah hram an rak thawk i nizan April 1 ah a ningpi in an laak khawh, tiah theih a si. Seinlong Byuha sakhan kahdohnak ah cun KIA le ṭangṭi phu nih hriamngan telh in hriamnam dang tam ngai an laak caah motor ngan mi in atu le atu in an thiar, tiah theih a si. KIA nih a luancia March 7 ni in Operation an kalpi i nihin tiang ah SAC ralkap sakhan 61 an laak cang, tiah theih a si.

Tedim Khuapi Ah Hriamtlai Phu Min Hmang In Mizapi Sin Ah Tangka A Khawltu An Tlaih Hna || 2 April 2024 Chinram, Tedim khuapi ah hriamtlai phu min hmang in lih le hrokhrawl in mizapi sin ah tangka le thil dangdang hal in a vak mi pa pakhat tlaih a si kong Tedim peng mizapi ukhruaitu phu nih an thanh. Mang Shin Tung(kum 20) cu Tedim khuapi chung ah ZFU/PDF-Zoland chungtel ka si tiin tualchung mi tangka a khawlh hna ruang ah PDF-Zoland le PPF palik phu nih nizan April 1 ah an tlaih. Mang Shin Tung cu Tedim khuapi le a kiangkap khua hna ah tualchung mi atu le atu in

tangka a hal hna hlei ah hriamtlai phu min hmang in a duh mi thil paoh laak a hmang mi a si, tiah an chim. Cu bantuk ṭhiamṭhiam in Gin Za Van(kum 19) zong Tedim khuapi le a kiangkap khua tualchung mi cu tangka le thilri a hal hna ruang ah a luancia March 15 ni ah tualchung hriamtlai phu nih an rak tlaih. Mang Shin Tung le Gin Za Van cu hriamtlai phu min hmang in tangka khawl tawn mi an si hlei ah, a hlan zong ah thil a fir tawn mi an si, tiah tualchung mi nih an chim. “Atu bantukin tlaih a tong mi hi caan saupi kan ngiatthlai cang hnu hna ah tlaih mi an si, thilsual an tuah mi he aa tlak ning in dan kan tat hna lai, aho kan si paoh ah hriamtlai phu min hmang in thilsual tuah hna hlah usih, kan ram a ṭhat khawh nakding tu ah

a lam kip in ṭuanṭi hna sih,” tiah Tedim peng mizapi palik phu in ṭuanvo ngei pakhat nih a chim. Hi hnu pinlei zong ah mizapi harnak pek in ZFU/PDF-Zoland min hmang in thilsual a tuahtu cu fak piin dantat an si lai, tiah Tedim peng mizapi palik phu nih a luancia March 23 ni ah ralrin peknak cathanh an rak chuah. SAC ralkap nih hramhram in nawlngeihnak an laak hnu kum 3 chung ah mi thil chuh le fir, rithaisii zuar le tawnghtham, hriamtlai phu min hmang in thilsual a tuah mi tiin tlaih a tong mi 30 leng an um i thlah ṭhan cang mi zong an um, tiah theih a si.

Chinram thlanglei Sami Khuaipi Um Tualchung Mi Pakhat Bomb I Lamhsualnak In A Nunnak A Liam! || 2 April 2024 Chinram, Paletwa peng, Sami khuapi ah a um mi tualchung mi pakhat cu nizan April 1, chun ah leiphum mi bomb aa lamhsual ruang ah a ke pahnih ah hliam fak ngai a pu i, ni khat hnu ah a nunnak a liam, tiah theih a si. Hliam fak ngai tuar in nunnak a liam mi hi Pu Leih Thang a si i nizan April 1 chun ah khan dum a kalnak ah leiphum mi bomb aa lamhsual. Pu Leih Thang cu a ke pahnih in aa hliam i Rakhine ramkulh, Kyauktaw siizung ah an kalpi nain

a hliamhma tuar kho lo in nihin April 2, zinglei suimilam 9:00 ah a nunnak a liam, tiah theih a si. March 31 ni ah Chinram, Khaikam khuapi um (kum 40) hrawng tualchung mi pakhat zong ral an zaamnak hmun in an chuahtak mi inn va zoh ding in a kalnak ah leiphum mi bomb aa lamhsual ve i a ke pahnih in a bul, tiah theih a si. SAC ralkap nih hramhram in nawlngeihnak an laak hnu kum thum chung ah Chinram ah leiphum mi bomb i lamhsualnak in Chinmi 30 leng an nunnak a liam cang i, minung 50 leng hliam an tuar cang, tiah theih a si.