Zualko: US ram ah a ummi Nungak Zion Dawt Chin Thluai(Kum 17) nih ruah lo pin a kan thih taak ee

Ngaihchiatnak Kan Tong. US ram a ummi  CCBC chungtel Nungak Zion Dawt Chin Thluai kum 17 nih Monday March 11, 2024 zingka 8:30 am ah a ihnak tein mual a kan liam taak. Anih hi a tu lio Praise and Worship team ah a tel lio mi asi. Atu bantuk in ruahlo tukin a kan liam tak cu kan lung a faak hringhran ko.  A chuahnak khua cu

Thangzang asi. Ngaihchiat hrawmpinak program cu a tanglei bang in asi lai. 7:00 PM  1. March 12, 2024- Khrihfabu min in thutpinak um lai. 2. March 13, 2024- CBC ( Wednesday zaan) 3. March 14, 2024- CEBC (Thursday zaan) 4. March 15, 2024- ECBC (Friday zaan) Calvary Chin Baptist Church. Address: 1325 W Avenue F, Garland, TX 75040

Mizoram In Myanmar Ram Lei Ah Kuat Dingmi Wakie Talkie 170 Leng Assam Riffle Nih An Tlaih Vaute 13 | 2024 Mizoram ramkulh, Saiha pengkomh in Myanmar ram lei ah kuat dingmi Walkie Talkie pehtlaihnak seh 170 leng Assam Riffle le Mizoram palik nih an tlaih, tiah theih a si. March 11, ah Saiha pengkomh, Shahtalai khua ah Assam Riffle le Mizoram palik hna nih motor pakhat checkhlatnak an tuah i pa pahnih sin in sing 2,600,000 rupees man a simi

Walkie Talkie 175 an tlaih hna , tiah theih a si. A tu bantuk in tlaih a tongmi hna hi khoika rammi dah an si ti theih khawh a si rih lo, a herhning poh in dantat ding ah Saiha pengkomh palik sin ah an chiah hna, tiah theih a si. A luancia February 10, zong ah Mizoram ramkulh, Saiha khuapi ah Chin ramkulh, Hakha khuami pakhat sin ah Assam Riffle nih Walkie Talkie 100 an rak tlaih cang i March 7, zong ah Myanmar ram kuat ding Sniper kuan 3,000 an tlaih cang, tiah theih a si.

LIB-355 battalion laak kahdohnak ah SAC ralkap tampi an thi i hriamnam zun 140 an laak. March 13 . LIB-355 battalion laak kahdohnak ah SAC ralkap tampi an thi i RPG, machine gun tel in hriamnam zun 140 le kuanzen tampi an laak tiah KNLA nih a thanh.  March 7 zinglei sml. 10:19 ah KNLA Brigade-6 hruai mi phu komh nih

OCH-12 kuttang LIB-355 cu kah hram an thawk i zanlei sml. 6:45 ah an laak khawh tiah theih a si. Cu kahdohnak ah cun SAC ralkap motor paruk, RPG, Nato machine gun hna tel in hriamnam zun 127; 60mm, 81mm miakpi zun 13, bombthei hna le kuanzen tampi an laak khawh. SAC ralkap tampi an thi i tampi hma an pu tiah theih a si.  Photo: KNLA

Maungdaw Khuapi Ramri Hngak Ralhrang Nih An Chuahtaak Mi Sakhan Um Eidin Pawl Ah Siivai An Paih. Vaute 13 | 2024  Rakhine ramkulh, Maungdaw khuapi um Aungthapye ramri hngak ralhrang sakhan cu 2024, March 12 ah AA nih an laak i sakhan chuahtaak in a zaam mi SAC ralhrang pawl nih an sakhan ah an taantaak mi eidin pawl ah siivai an paih hna, tiah Rakhine ralkap AA sin in theih a si. Cu sakhan laak kahdohnak ah

SAC ralhrang thimi ruak cheukhat le hriamthil cheukhat zong an laak chih i sakhan in a zaam mi ramri hngak ralhrang 179 hna cu Bangladesh ram ah an lut, tiah theih a si. SAC ralhrang nih Aungthapye sakhan chung ah an taantaak mi eidin/tirawl pawl ahcun thihnak siivai an cawh hna. Cucaah dothlennak hriamtlai phu hna nih sakhan laak kahdohnak ah nan laak khawh mi ralhrang sakhan chung um eidin/tirawl pawl cu nan i ralrin a herh, tiah Rakhine ralkap AA nih thawng an thanh mi ah an langhter.

CNF Nih The Best Regional Committee Of 2023 Le Chinland Club Persons Of The Year 2023 An Thim Hna || 13 March 2024 Chin National Front (CNF) General Headquaters nih a liamcia 2023 kum chung ah miphun ca ah biatak tein a bu in rian a ṭuan mi Committee, chungkhar le pumpak chung in zohchuntlak Committee, chungkhar le pumpak in an thim mi hna cu a luancia February 29 le March 5 ah chuah mi cathanh ah an langhter. A liamcia 2023 kumpi kum khat chung ah miphun ca ah biatak tein rian a ṭuan i CNF/CNA ca ah kut a samh zungzaltu New Zealand Regional Committee cu

The Best Regional Committe of 2023 ca ah a voi khatnak Central Committee tonbiaruah biachahnak ah thim an si i dohthlennak ah a ṭha bik in rian a ṭuantu le zohchuntlak a si mi New Zealand Regional Committee chungtel vialte cu CNF/CNA nih upatnak kan in pek hna, tiah an langhter. A voi khatnak Central Committee tonbiaruah biachahnak bantukin miphun ca ah chungkhar le pumpak in rian a ṭuan mi hna chung in Australia um

Pu Bawi Lian le Pi Fung Thlia chungkhar, USA um Pu Van Uk Cung a chungkhar le ringawn lei in miphun dohthlennak ca ah thazaang a chuah mi Mai Honey Ṭial Chin Sung(Khuaitizuu) hna cu Chinland Club Persons of the Year 2023 ca ah thim an si. Atu bantukin Chinram le Chin miphun tunmernak ca ah tiin a fek mi zumhnak he rian a ṭuantu hna cu CNF/CNA nih conglawmh in upatnak kan in pek hna, tiah an langhter.