Zualko: Mizoram ah ralzam in aa hlawhfami Salai Lal Tlan Mawi nih innsaknak ah a kan thih taak ee

Mizoram Aizawl khualipi,Phunchawng sang ah inn tung khur a co cuahmah mi pakhat cu a cung lei vawlei nih a cimh hnawh caah a nunnak a liam tiah theih a si. A Nunnak a liam mi hi Myanmar,Sagaing ramthen, Kalay peng Tlangzawl khua mi Salai Laltlanmawi a si i kum 24 mino te a si. Inn sak nak ding tungkhur cu

a thuh pe 9 in cawh a si i Laltlanmawi nih a tang vawlei a remh cuahmah lio ah a cung vawlei nih a cimh tak hi a si i a ran nak in vawlei cu hlai a si nain a nunnak a rak liam cang.a ruak cu zanlei slm 2 tluk ah YMA nih an hlai khawh tiah theih a si. Salai Laltlanmawi cu Aizawl West College ah BA a cawng cuahmah lio mi a si i a ruak cu thaizing slm 12 ah vui a si te lai.

KIA nih Winemaw SAC Ralkap Sakhaan Pahnih an Laak Chap; SAC Ralkap Sakhaan 12 Hrawng an Laak Cang  March 8 Kachin ramkulh, Winemaw peng ah a um mi SAC ralkap sakhaan pahnih cu nihin March 8 chunhnu sml. 1:00 hrawng ah KIA nih tlamtling tein an laak khawh chap, tiah theih a si.  Aung May (A) khua ah a um mi Inlungkha SAC ralkap le Pyituhsit sakhaan cu nihin zinglei ah KIA nih Drone in bomb an thlak hmasa i chun hrawng ah

an luh hnawh.  “Chun sml. 1:00 hrawng ah khan Pyituhsit Sakhaan cu tlamtling te in an laak. Cuka ah cun kum 60 leng a si mi pyituhsit putar pakhat tel in pyituhsit pahnih an nung in an tlaih hna. Cun, sml. 2:00 hrawng ah an sakhaan cu mei in an khanghpiak hna,” tiah Aung May (A) khua upa pakhat nih The 74 Media ah a chim.  Kan Daw Yan khua pawng ah a um mi Malikhan SAC ralkap sakhaan zong KIA nih nihin ah an laak fawn.  “Nihin ah Aung May (A) khua i

SAC ralkap sakhaan le Kan Daw Yan khua pawng i Malikhan SAC ralkap sakhaan pahnih cu KIA nih an laak hna. Nizaan ah khan SAC nih vanlawng in a rak kah tuk hna caah an la manh lo i, nihin ah a pahnih ning in an laak hi a si,” tiah khua upa nih cun a chim.  March 7 thawk in Kachin ramkulh, Winemaw peng, Moemauk peng le Hpakant peng chung i SAC ralkap sakhaan tampi cu KIA nih voi khat te ah kahdoh hram a thawk i, nihin March 8 tiang ah SAC ralkap sakhaan 12 hrawng an laak khawh cang, tiah theih a si.

CDF-Hakha nih Hakha ah SAC palek panga a nung in an tlaih hna. March 8 Mach 6, Zanlei sml 7:30 hrawng ah Hakha khua Nah-Tah-Lah Zung a hngak mi SAC palek panga cu CDF-Hakha Brigade-4 ralkap nih an luh hnawh hna i a nung in an tlaih hna tiah theih a si. Cuti an tlaih mi hna cu nihin Mach 8 zinglei ah video he CDF-Hakha nih zapi sinah hmuhsaknak a tuah. “Kan that hna lai lo …a nung in kan tlaih mi hna cu tite hin

kan chiah hna lai… Ram kip zulhphung ning tein kan tawlrel hna lai tiah” CDF-Hakha nih a langhter. An tlaih mi hna cu Bohnih tel in palek panga an si i an i tlaih mi G-3 meithal zun 5 le pistol zun khat zong CDF-Hakha nih an laakchih. Cucu “Operation Rung” cawlcanghnak in tuah mi a si i, meithal zunkhat hmanh puah lo tein hriamnam he an tlaih khawh mi hna si tiah kan theih.

Chin Miphun Lak Ah Lungrualnak A Chuah Khawh Nakhnga USA Um Chin Khrihfabu Tonnak An Ngei. 8 March 2024 Chin miphun lak ah lungrualnak, dinnak le remdaihnak a chuah khawh nakhnga USA ah a um mi Chin Khrihfabu pawl cu tonbiaruahnak an ngei. March 5-6 tiang Idiana Chin Baptist Church (ICBC) ah Chin Baptist Churches, USA (CBCUSA) le Chin Baptist Association, North America (CBANA) in hruaitu pawl cu tonbiaruahnak an ngei i Chin miphun lak ah lungrualnak, dinnak le remdaihnak a chuah khawh nakding ah ceihmainak tete zong an ngei. Cu tonbiaruahnak ah cun

Chin miphun kan dihlak in laihritlai unau kan si bantukin Chinram le Chin miphun umnak kip ah lungrualnak, dinnak le remdaihnak a um nakhnga mahle thiltikhawhnak he thazaang chuah in rianṭuanṭi ding le Chin miphun lak ah biahar le i alhnialnak a um tik ah thazaang hmang lo in biaruahnak in remdaihnak kawlṭi ding in biafunnak an tuah. Cu pin ah Jesuh Khrih thawngṭha a karhnak ca ah vawlei killi ah Mission rianṭuan ding le Chin miphun ṭhangthar mino hna lak ah i hawikomhnak le rianṭuanṭinak thazaang pek ding, tiin March 5-6 tiang Indiana Chin Baptist Church (ICBC) ah tuah mi tonbiaruahnak ah biafunnak an tuah. Hmanthlak : CBCUSA