A poi taktak: Laimi nih kan hman bik mi Facebook cu a rawk caang Facebook ngeitu Mark Zukerberg nih fianternak a tuah colh

Suimilam Pakhat Chung Hrawng Facebook a Rawk. March 5 Nihin March 5, Myanmar caan zaan sml. 10:00 in 11:00 tiang hrawng Facebook, Instagram le Messager an rawk i sml. 11:00pm hrawng ah Facebook cu a ngah than cang.  Downdetactor nih a langhter ning ah cun vawleicung huap Facebook hmangtu 73% nih

hi caan chung ah hin Facebook an hmang kho hna lo, tiah a ti.  Facebook ngeitu Mark Zukerberg nih cun “Ahohmanh nan lungrethei hlah u, kan remh cuahmah lio a si,” tiah a chim. Facebook chikhat a rawhnak a ruang hi zei ruang bik timi an langhter lo nain kan remh cuahmah tiah FB ngeitu lei nih cun an chim.

CDF-Hakha Sin ah SAC Ralkap le Palik 40 Hrawng an Zaam Cang . March 5 || Kum thum chung ah SAC ralkap le palik 40 hrawng cu CDF-Hakha sin ah an zaam cang, tiah CDF-Hakha ṭuanvo ngeitu nih a chim. CDF-Hakha ṭuanvo ngeitu pakhat nih, “Ralkap nih uknak an laak ka ah khan cun SAC ralkap le palik CDM a tuah mi an rak tam ngai. Kan sin ah duhsah in an rak zaam i nihin ni tiang ah cun minung 40 hrawng an si cang,” tiah Khonumthung sin ah

a chim.  CDF-Hakha sin ah a zaam mi SAC ralkap le palik pawl hi Hakha khuapi chung in le Hakha peng chung in an si hna i, March 2 zong ah khan Hakha SAC palik pakhat cu CDF-Hakha sin ah meithal he a rak zaam.  CDF-Hakha sin ah a zaam mi lak ah palik an tam deuh i, meithal aa ken mi le aa ken lo mi ti in an um hna.  CDF-Hakha sin ah a rak zaam mi pohpoh cu himnak hmun ah thlah an si i, meithal aa zaampi mi pawl cu tangka ting 50 MMK zong laksawng pek an si.

CDF-Matupi ah Chinland Council ah Tel a Duh Mi Bu le a Duh Lo Mi Bu an Um Ve. March 5 || Chinram ah Chinland Council (CC) le Interim Chin National Consultative Council (ICNCC) ti in bu hnih in an um hnu ah CDF-Matupi chung zong ah CC ah um a duhtu le ICNCC ah um a duhtu ti in bu hnih an um ve, tiah theih a si. “CDF-Matuip Brigade-2 hi CC ah i tel a duhtu a si i, Brigade-1 belte hi CC an cawlcangh ning an ngiat lio a si. Brigade-1 hi cu

ICNCC lei ah an lung a um deuh,” tiah CDF-Matupi chimnak nawlngei Salai Naing John nih Khonumthung ah a chim.  Ramkhel lei ah CC ah maw, ICNCC ah dah kan i funtom lai ti mi kong he pehtlai in CDF-Matupi ah lung i khah lonak um hmanh sehlaw raldohnak lei kap ah cun Brigade-1 le Brigade-2 hi hmun khatte ah tuan ti a si peng ko, tiah a chim chap. CC a duhtu le a duh lotu ti in i khah lonak a um caah February 23 in 25 tiang an tuah mi Matupi peng chung zatlang bu hna le

CDF-Matupi hruaitu hna tonnak ah CDF-Matupi cu Brigade-1 le Brigade-2 ti in ser a si.  CDF-Matupi hriamtlai, Brigade pahnih ah ser a sinak kong cu March 3 ah khan CDF-Matupi nih phungning in thawngthanhnak zong a tuah.  CC ah i tel a duhtu Brigade-2 ah hin Battalion-2, Battalion-3, Battalion-4 le Battalon-6 an i tel i, ICNCC lei ah a tlu deuh mi Brigade-1 ah hin Battalion-1 le Battalion-5 an i tel, tiah theih a si.

Thawngpangthar: Minbya IB 541 In SAC Ralkap 200 Hrawng Nih A Sung An Pek | 2024 March 5 – Rakhine ram, Minbya peng um SAC ralkap IB 541 in ralkap a za nih AA sin ah hriam chiah in a sung an peknak micawl cu March 4 ah Social Media cung ah a lang. AA nih Chin ramkulh Paletwa, Rakhine ram Minbya, Kyaukdaw, Paukdaw, Mebon, Mrauk U khua hna cu a zapi in a lak khawh cang. Minbya IB 541 le LIB 379 hna cu February 6 ah

tlamtling tein a lak khawh hi a si. Social Media cung a lang mi muicawl chung ah hriam chiah in a sungpe mi SAC ralkap pawl aa tlang in an chuah lio hmuh khawh a si i muicawl chung a lang mi tuak tik ah minung 200 leng hrawng an lo. Cu minung 200 leng chung ah a cheu leng hi hliam a tuar mi an si hna i hliam a tuar mi pawl kha leng in an put hna, anmah le anmah an i pua hna, an i dawmh hna i thengthunh he a chuak mi zong an um kha hmuh khawh a si.

Arakan Army (AA) Nih Ponnagyun Peng A Ningpi In An Laak Cang || 5 March 2024 Rakhine ramkulh, Ponnagyun khuapi SAC ralkap Khah-Mah-Yah 550 Battalion sakhan cu Arakan Army (AA) nih an laak khawh i Ponnagyun peng zong a ningpi in an laak cangnak kong Rakhine ralkap AA nih phungning tein an thanh. Nizan March 4 ah Ponnagyun khuapi chung ah a taang mi sakhan pakhat Khah-Mah-Yah 550 sakhan cu SAC ralkap nih

an sungh lo nakhnga vanlawng le tilawng in kahdohnak an tuah nain Rakhine ralkap AA nih a ningpi in an laak khawh ṭhiam, Ponnagyun khuapi zong a ningpi in an laak khawh cang, tiah theih a si. Ponnagyun khuapi an sungh hnu ah SAC ralkap nih Rathedaung – Ponnagyun motor lampi cung um Setipyin hlei cu zanlei suimilam 4:57 in 5:17 tiang raltuknak vanlawng pahnih in voi 12 kahdohnak an tuah, tiah theih a si. AA nih Chinram Paletwa, Pauktaw, Kyauktaw, Mrauk-U, Minbya, Myaypone tiin khuapi 6 an laak hnu ah nizan March 4 ah Ponnagyun khuapi an laak chap caah a zate ah khuapi 7 an laak cang.