Zualko: Australia ram a ummi Pu Cung Lian Uk nih ruah lo tuk in a kan thih taak ee
Zualko (Thih Daar) Australia Chin Community (EM) le Victorian Chin Baptist Church chungtel a simi, Pu Cung Lian Uk (39) nih ruah lo pi in 29 Feb 2024 ah a kan liam tak ṭhan. Ruak vuinak kong a fian tikah thawngthanhnak kan tuah ṭhan te lai. A mah hi hlasak zong a thiam i a aw zong
a tha ngai mi a si. Ngaihchiatnak a tongmi chungkhar community nih an ngaihchiatnak kan hrawmpi ve hna. Pehtlaihnak: +61 0406 146 086 Thong Za Tawng + 61 0431 640 099
SAC Kuttang Palik Pakhat Cu CDF Mindat Sin Ah Hriamnam He Aa Ap 1 March 2024 Mindat khuapi um SAC kuttang Myoma palik sakhan in palik pakhat cu hriamnam i put in CDF Mindat sin aa ap, tiah CDF Mindat nih nihin March 1 ah an thanh. Hriamnam tling he CDF Mindat sin ah aa ap mi palik pakhat cu ṭuanvo ngeitu nih tangka kyats sing 50 an pek i, hriamnam he aa ap nithla langhter a si lo caah February thla chung ah
aa ap mi a si lai, tiah ruahdamh a si. “Myoma palik sakhan in palik pakhat cu G-3 meithal le kuanfang 84 i put in kan sin ah aa ap,” tiah CDF Mindat in chimnak nawlngeitu nih a chim. “A hlan ah kan rak thanh cang bantukin hriamnam he aa ap mi vialte cu tangka kan pek hna i a himnak hmun ah kan umter hna,” tiah CDF Mindat General Headquaters nih a luancia February 12 ni ah an chim. “Nah-Ah-Phah cozah chan lio a liamcia 2010 November thla ah
an rak fehter mi ram mino ralkap tlakternak phunglam cu SAC Chairman Min Aung Hlaing nih tukum 2024 February 10 ni ah minsen thut in a nunter ṭhan caah hriamtlai in dohthlennak ah tel a duh mi paoh nih CDF Mindat sin ah pehtlaihnak tuah khawh peng a si ko,” tiah CDF Mindat General Headquaters nih cun an langhter.
Sittwe Khuapi Bazar Cu SAC Ralkap Nih Hriamngan In An Kah! Tualchung Mi 7 Nunnak A Liam || 29 February 2024 Rakhine ramkulh Sittwe khuapi bazar cu SAC ralkap nih hriamngan in an kah ruangah tualchung mi 7 hrawng a hmun ah an thi, tiah tualchung mi hna nih Khit Thit Media ah an chim. Nihin February 29 zing suimilam 8:00 ah SAC ralkap nih Sittwe khuapi bazar chung ah hriamngan an kah i, tualchung mi 7 cu a hmun ah an nunnak a liam colh, sii-inn phakpi hnu ah nunnak a liam mi hna he cun minung 10 an si. Hliam tuar mi zong an tam pi tiin
tualchung mi pakhat nih cun a chim. Tualchung mi hna nih an chim ning ah cun, SAC ralkap nih hriamngan an kah mi kuan cu Sittwe khuapi bazar chung ah a tla i minung 10 leng an nunnak a liam pin ah minung 30 deng hliam an tuar, tiah an chim. SAC ralkap nih hriamngan an kah lio zing suimilam 8:00 ah Sittwe khuapi bazar chung ah mehhang a caw mi an tam lio a si i nunnak a liam mi hna hi mehhang a zal mi a si. Bazar dawr le innlo tampi zong a rawk, tiah theih a si.